ल्हानान दिङ ङ्हाच्छा याखारगि नाम्सारि गिक्खे छारिब्योन मुबा । थे सिङ थाबारि सातान स्ह्योरिन थारेङला ह्रिरि निमुबा । ङ्यासे दुइरि सिङ बासिमाम दिमरि खामुबा । तिरेकुनु थे ह्रिरि दोसिमाम दोङ थाबारि चुजि, सिङला दोइ युजि ओम पुइसिमाम दिमरि खाजि ।
छाक्काल दिनि फेबासे थेदा क्युइ थुङ्गे म्हान्जि । ह्रिला गुङरि मुबा ब्रारि निसि थेसे क्युइ थुङ्जि । ह्रेच्छाक ब्लाप्बा न्हाजि ओम थेरिन फुस निजि । तिगाइ दुइलिच्छा थेनोन ग्यालाम ग्याम ह्रिरि सिकार म्हाइबारि निबा ह्रिबोन्बोजुगु ङ्हा ह्राप्सिकेन खाजि । थेनिकादे मेबा मुबा । ल्हुइनाङ क्रा नोन क्रासे गाप्बा मुबा । थेन्छे थे छारिब्योनदा पुइसिमाम ब्रा न्हाङरि मुबा जाजाबा गालग्याम ह्राङ्ला म्हारला दरबाररि दोना लाजि ओम याखारगि कोठारि डुङ्सि थान्जि । या काङरि ह्रेङ्बा ह्रेङ्बा छिन थेन पुइमुदोना च्योबा ङ्हेजाङ मुबा ह्रिबोन्बोस्या ह्राङ्ला जा जामेला छ्याम थेरि खाजि ।
थेन्छे छारिब्योनदा सेबारि म्हाइजि ।
थेनि गुङरि वादविवाद सुताइ ताजि । सेला आदे बिसिमाम ह्रिबोन्बोसे खामआखाम ङ्यान्ना लाजि । ह्रिबोन्बोसे छारिब्योनदा ङ्यासे दुइरि म्हारला खार्पारि म्ल्हाला कान थेन सालिला खु चाबारि पिन्जि । लोङ्बा, डोबा थेन फोख्रेन्बाला ङ्यान्दि छारिब्योनसे बेनान चाबास्हे चाजि । थेदा ह्रिबोन्बोसे सम्झब लासि पाङ्जि, ‘ङान्छे एदा विद्या थेन ग्युइ लोप्बारि बाबा हिन्ना, ए थालोङ्गो, लोपजिन्माहेन्से ज्याबान दिमरि दोसि निम्याङ्ला ।’
छारिब्योनसे चु प्रस्तावदा ज्याना लासि स्वीकार लाजि । ह्रिबोन्बोसे रेदाङ्से गिलिच्छा स्यान्दो लासि ग्युइ पिन्सिकेन निजि । छारिब्योनसे नोन बेनान ताम विश्वास लासिमाम सेमकिन्सि लोप्जि । ह्रिबोन्बोदा गुरु तेन्सिमाम फ्या लाजि । ह्रिबोन्बोसे नोन छारिब्योनदा खाजिबा रे, दुइ थेन ग्ला ग्याम खाराङ्लासि बाबा मुबा थेह्राङ्नोन लासि म्हारला दाप उपहार पिन्छि सकुशल दोसिमाम पुइजि । थेलिच्छा छारिब्योनसे सोतेदोना नाबाजुगुदा क्योन्सि प्रसिद्धि छाजि ।
चुनोन घटनाला दाःनरि तिनिदोना नोन तामाङतेन स्यान्दो सम्प्रदायरि ह्रिबोन्बो प्रथा कायम नोन मुला ।
(छिगकि दोनः छाक्काल– टन्टलापुर, ब्रा– पहरा, सालि– गँड्यौलो, ङ्यान्दि– कारण, दाप– सियो, नाबा– बिरामी/रोगी, क्योन्सि– उपचार गरेर, छाजि– कमायो, दाःन– आधार)
दोःबा : यकिना अगाध
तपाईको प्रतिक्रिया दिनुहोस