‘तिगा ङा एह्राङ्लान म्हि दोसिमाम लेङ्बा केवा एतेन थाम्याङ्ला ?’

लिच्छारि थेसे बाङ लासि म्यासेन्जरला ब्रिबा पंक्तिरि छिगजुगुदा रासिमाम चोत्ते याखारगि वाक्य स्होजि ओम पुइजि । पुइबा ङ्हाच्छा थेला सेमरि ल्होलो ताम जेक्खे आक्लाङनि, लोङ्बा नोन ओत्तेबान फुइबा मुबा । मुतेबा बाङ तेसिमाम ब्रिबा मुबा थेसे । थेसे बिले सुष्मा आलेसे ।

सुष्मासे +२ लिच्छाला दिङ डोबाकेन लामा थेलान ह्रोग्याम लोप्बा मुबा फेसबुक चलप लाबारि । ङ्हाच्छारिम थेदा डोबा बिमा नोन गाह्रो छोर्जि तासाइ बानी तासिकेन निमाहेन्से थेदा मोक्कोन बिमा देःबा फेसबुक चलाप लाबारि छोर्बारि चुबा मुबा । गोल्छेसे फेसबुक याकारपनला ङामला ह्रो तामाहेन्से थेसे थेला आपादा कर लासि स्मार्ट फोन ग्लु पुङ्बा मुबा । थेला आपासे १२ डारि गिक्छा श्रेणी बाबा काः पिन्मा हेन्छे जेक्खे ग्लुपिन्बा मुबा स्मार्टफोन । स्मार्टफोन याङ्बा म्हुन स्ह्यो २ ङ्ह्यादे दोना चलप लाबा मुबा सुष्मासे ह्राङ्ला फेसबुक । ङ्हाच्छारि क्याम्पसला तिगाइ ह्रोजुगुतेन जेक्खे ताम पाङ्बा सुष्मा गोल्छेसे स्यान्दोतेन नोन पाङ्बारि चुबा मुबा । चुनोन ताङरि थुइबा मुबा सुमन, सुष्माला फेसबुकरि नौलो म्हि दोसिमाम ।

१२ ला परीक्षारि उतिर्ण लाबारि बिसाम सुष्मासे स्यान्दो गोर ङ्ही नुरला परीक्षा ङ्हीरेम नोन पिन्तोबा मुबा ।

सुष्मा आले थेन सुमन गुङरि फेसबुकग्याम ताम ताबारि चुबा छ्योआछ्यो दिङ ङ्हा ताजिन्बा मुबा । ङ्हाच्छारि सामान्य ङोसेबाग्याम ताबा थेन्ना ताम दुइला ताङतेन गोल्छेसे फेल्सिकेन निबा मुबा ।  गुङ गुङरि कात्ते रेम कात्तेन ताम आपाङ्नान दुइ थाल्जि । लिच्छाला ला डु हेन्से बिसाम ङ्ही नोन गिसेम गिदा आउदिन महत्व पिन्सिमाम ताम पाङ्बारि चुबा मुबा । चोत्ते जेक्खे हिन्ना । चु ङ्ही नोन गिसेम गिदा ल्हानान ख्याल लाबा थेन चेगाइ नोन लाबा ताजिन्बा मुबा ।

सुमन लोप्खेन मुबा । नाम्साला लोप्खाङरि डोपिन्बा लामुबा । ग्योइकाइ ग्याम स्नातकोतर लासि नाम्सारि दोसि ह्राङ्ला ग्योइकाइदा झन ल्हेना लाबारि ह्रो तागाइ बिसिमाम लोप्खेन दोबा मुबा । सहररि मुमा व्हाइखा ब्रिमुबा । राप थेन ग्रेनराप नोन । मदन पुरस्कार याङ्माहेन्से बिसाम थेला मिन मोक्कोनसे थेबा मुबा ओम थेला ब्रिताम ल्हानासे डोबारि चुबा मुबा । तासाइ नोन थेला ह्राङ्ला शिक्षण पेसादा ख्लाबा आरेमुबा । नाम्सारि चिसि जेक्खे ज्याबा ब्रिबारि खाम्ला बिबा थेदा म्हान्बा मुबा ।

सुष्मा सुमनला चेगाइग्याम प्लिङ्बा मुबा । छोर्मुबा, सुमन बिमा स्यान्दो ह्रेमकोलादा चेगाइ लाबारि आखा । थेफिरि थे सुमनतेन ब्रेल्साङ लाबा थेन केवा थाल्ना लाबा म्हाङ म्राङ्बारि चुबा मुबा । सहररि खामा ह्रुप ताबा थेन निबा ताङ नोन ल्हानान ङ्हाच्छा वाङ्जिन्बा मुबा । थेतासि गिसेम गिदा आउदिन चेगाइ लामुबा । तासाइ, सुमनसे तिगा म्हाइबा मुबा ? तिल्दा चेगाइ लामुबा बिबा तामरि बिसाम सुष्मादा तिगाइ थाहा आरेमुबा ।

थेसे ङ्हाच्छा हेन्सेन चु दिङला भ्यालेन्टाइन डे बिले मोक्कोन जोडिसे चेगाइ देप्बा रेला स्ह्रुगरि तेन्चिबा रेरि ह्राङ्दा नोन चेगाइसे तिङरि ल्होसि ङ्हेगे लाबा चेगाइ ह्राङ्ला याफ्लारि प्लिङ्ना लासि थुङ्सेला मुला ओम तिङरि थान्सेला मुला बिबा क्योङ विश्वास मुबा सुष्मादा । थेतासि दुइ दुइरि डान्ना लाचिमुबा तासाइ सुमन बिसाम वास्ता आलाबा ह्राङ लामुबा ।

झन निबा तिगाइ रेहेन्सेम म्यासेन्जररि सन्देश ख्लाबारि सुताइ कालकोल लाचिबा मुबा । सातान ह्राङ महत्वला छ्याम ताम पाङ्बा सुमन मौन तासिकेन निबा मुबा ।

डेङरि च्योबा चिरि स्ह्यो हेन्सेन १३ फेब्रवरी उन्चिबा मुबा । लाबाला झोक्का छ्याम आक्ताङ ओक्तोङ क्लाङ्चिबा चितेन स्ह्यो हेन्सेन सुष्माला सेम नोन ह्योङ्चिबा मुबा । थेला मिजुगु खाइमा म्यासेन्जरला पानाजुगुरि छ्योङ्मुबा ओम खाइमा सुमनला डान्बाला बाछिटाजुगुरि । स्ह्यो हेन्सेन तोसो गिसे टिकटिक ङ्ह्याचिबा घडी खुम फिरि चिसि बाह्र ङ्ह्याबा सन्केत पिन्जि । बिले, चुतिजि भ्यालेन्टाइन डे । तासाइ नोन सुमन ग्याम तिगाइ ताम आखानि । झन, स्यान्दो ताममि थेसे स्ह्योरि पुइबा सन्देशदोना च्याबा आउन्नि म्यासेन्जररि । लिच्छारि, ह्राङ्सेन ह्रेङ्बा वाक्य ब्रिजि ओम म्यासेन्जरला हुलाकी पेटिकारि युजि । लाबासे बिमा नोन योना दोना लाजि थे वाक्यादा सुमनला पेटिकारि । ओम, लोङ्बा नोन लोङ्बा थेन शंका नोन शंकारि थेसे ह्राङ्ला तिजि तिसारि ।

डेङरि डेङचिसे १४ फेब्रेवरीला रे उन्चिबा मुबा बिसाम घाडी ह्राङ्लान रफ्ताररि छ्योङ्चिबा मुबा । सुष्माला स्मार्ट फोन बिसाम सुष्माला छ्याम म्हेर्चिबा मुबा तिल्दाबिसाम सुष्मासे सन्देश ख्लाबाला छ्याम बु डुङ्पिन्बा मुबा ।

(छिगकि दोनः देःबा– सजिलो, डा– कक्षाा, काः– वचन, नुर– विषय, फेल्सिकेन– झाँकिदैं, लोप्खेन– शिक्षक, चेगाइ– माया/प्रेम, स्ह्रुग– रुप, ल्होसि– छचल्किएर, चि– पात्रो, डेङचि– भित्तेपात्रो, बु– प्राण)

दोःबा : यकिना अगाध