ब्रेल्साङ लासि खुयुदा दिमरि बाजिन्बा लिच्छा १५ ला लिच्छा केनस्याङ्बोचा नितोबा गे परतिजि । म्रिङ्ला कुरि लाइनु मुबासे गिक्खेन नितोबा ताजि । थेतासि, खुयु बोक्च्योर चिबा मुबा । तासाइ नोन बिबाकेन मुबा, ‘आमातेन तोङ्जा ङ्ही न्होर ह्रिसि बागाउ होइ, रा मामा ग्लुसि न्हातोला ।’

‘न्होर ह्रिबारि ङादाम पेबा आखा कि तिला ओम ? चिठी ब्रिउ ङाइ आमाला छ्यारि युपिन्ना ।’ ह्रेम्बोचासे पाङ्जि ।

देन्बान चिठी ब्रिजिम । थोन्गे लामा पिन्जि । आउदिन इमान्दारिताला छ्याम केनस्ह्याङ्बोजा दोबातेन सालीला यारि पिन्जि, ‘आमादा पिन्गो रो, भुन्टीसे पाङ्बा’ बिसिमाम ।

सालीसे आमाला यारि पिन्जिनाम, थे म्राङ्स्ह्युजिम केनसे ओम पाङ्जि, ‘तिगा ब्रिजिम थेसे लु ले च्यान्टी डोसि थेना लाउ ।’ ङा सालीतेन नोन मुबा । ओम, स्युइमि, जेठी स्युइमि थेन स्ह्याङ्बो केटो नोन ङामरिन मुबा । ङाला सालीसे चिठी डोबारि चुजि । ङाजा पेसिमाम टिभिला काइ ग्रेन ग्रेन स्होबान आथेबा ह्राङ टिभीला तालरि लोकदोहोरी कोसिकेन चिजि ।

रेनिङ्दाङ्से दिमरि फ्लिकदोसि निबा दुइरि स्युइमि आमासे थेनोन चिठीला खोलरि तोङ्जा ङ्हीसे ५० रुपैयाँ युसिमाम ङादा दोन्जि । दिमरि दोबातेन म्रिङ्दा थे खाम पिन्जि । म्रिङ आउदिन मख्ख परतिसि, ‘अहा ! ५० रुपियाँ ल्हानान पुइगास्ह्युजिम ।’ बिबाकेन मुबा । ‘दारे ङा छुगला रा मामा ग्लुसिमाम न्हाला ओम बोका न्हामाहेन्से खसी स्होसि चुङ्ला’ बिसिमाम मख्ख मुबा ।

ओन्छ्यान ! कुरि लाइनु थोसिमाम खानाङ रा ग्लुबारि निसे । ङादान थे न्होर पिन्जि ओम बिजि, ‘रा ग्लुसिमाम बागाउ होइ खेप्पा !’

फिह्युल निबारि भिसा आखाबासे क्राङक्युरचिबा ङादा स्यान्दो तिगा गे तोजि ले ! रा ग्लुबा मिनरि ब्राजि नाम्सारिक्यार लोरोङ लोरोङ । खान्दामान दोसाइ नोन ‘आहिन, खाइमा निला फिह्युल ?’ बिबाला च्याङ्बा आरेमुबा ।  ‘भिसा खामाहेन्से’ बिसिमाम टाराप लापिन्जि ।

चुनोन ताङरि तिरे धने म्हेमेजा नाम्साला केटाजुगु तास क्लाङ्बाकेन चिम । क्लाङ आसेसाइ नोन च्याबारि आउदिन छेम निबा । च्यासिमाम चिचिजि ।

‘ओहो ! शेरे एमि फिह्युल निलाबा म्हि, छारेम छ्योते छाला । सिसिमाम तिगा बोर्ला ले ? खाउ चिउ खालरि ।’ बिसिमाम बिर्खेसे छेङ्माहेन्से ‘आहिन होइ, ङादा आहा’ बिना बिनान तिलकसे ङाइ लोपपिन्ना म्हाले बिसिमाम थिपिन्जि । ङाइए खुयुला रा मामा ग्लुबा छार छार कट कटे तोङ्जाला नोट तेसिमाम चिजि । चिबा घन्टा ङ्हीरि ग्यार्जा कु ब्रेजिम । बेनान रेसिमाम निजि, ङा च्युम्बिरिङ्बा लि थोसि दिमरिक्यार निजि ।

‘रा आयाङ्नि खुयु, न्होर नोन ब्रेजि तिनि जुवारि’ बिसिमाम ङाइ जाजाबा लि स्होजि । ओन्छ्यान ङाला खुयु ‘ल्हाउ ! क्लाङ्माहेन्सेम ब्रेला म्हाले, तिल्दा क्लाङ्स्ह्युबा ओम ?’ बिसिमाम क्रा रिबारि चुजि । ‘ग्यार्जा कु ब्रेसिमाम तिगा ताजि ले ! दाते नोन ११ ग्यार्जा ५० रुपैयाँ मुला । दारे राला कोला ग्लुउ’, बिसिमाम पाङ्जि ।

न्हाङ्गारदाङ्से नोन नाम्सारिक्यार वाङ्जि । दोसि नोन केटाजुगुसे ‘ओइ शेरे, तिल्मा ब्रेबाम डासिन ख्लालाले यार तिनि’ बिसिमाम कर लामाहेन्से क्लाङ्बारि चिजि । थेकुनु नोन ग्यार्जा ङ्हा ब्रेजिम । ङाइ ङ्हाचला रेरि ह्राङ खुयुदा रामकहानी पाङ्जि । दाते नोन खुयुसे चेगाइसे स्योम्सिमाम पाङ्जि, ‘चिन्ता थालास्ह्युगो । दाते नोन ६५० मि मुला । दारेम नाका माम ग्लुतोला । ओम ल्हानान कोलाकादे ठोसि ग्रेन तामाहेन्से ग्रेनग्रेन व्हाबा स्होसिमाम चुङ्तोला ।’

दोसि न्हाङ्गारदाङ्से थेह्राङ्नोन लासि नाका मामा ग्लुबारि नाम्सारि वाङ्जि । थेह्राङ्नोन लासि ह्रोजुगुला तामरि ल्हागतिसि मोक्कोन न्होर ब्रेजि । दिमरि दोसि बेनान राप खुयुदा पाङ्जि । दाते नोन थेनोन तोसोसे खुयुसे ङादा सान्त्वना पिन्बान मुबा, मिनाङ मिख्लि पुइसिमाम । दाते डान्ना, चोदे थे ग्लारि ङा मुबा हिन्साम... ?’

हिन्ना, खाइमा ङा दुखरि परतिला ओम मिख्लि ब्योङ्बारि चुला, थेदुइरि डान्मुला– ङाला खुयुला मिछामरि ताइबा मिख्लिला फ्रुमजुगु । ओम, ग्रान किन्ना ङाला ङ्यान्दि खालाइला मिरि थेह्राङ्लासि मिख्लि ताइपुङ्सेला आरे ।

(छिगकि दोनः बोक्च्योर्बा– ठुस्किएको, छुग– गज्जब, ओन्छ्यान– कठै, न्होर– पैसा, फिह्युल– विदेश, छेम– मज्जा, छाला– कमाउँछ, मिछाम– परेला, फ्रुम– थोप्पा, ग्रान– प्रण/कसम)

दोःबा : यकिना अगाध