ख्रेला १० कामरे, पोखरा । मन्जुश्री सम्वत् २८६२ छा सोनाम ल्होछार (ता ल्हो)ला दुइसाङरि नेपाल तामाङ घेदुङ तामाङ बौद्ध साप्तो दाछोक इकाई, पोखरा–१३ से ज्याबाम्हान्बा किन्बापिन्बा ओसेम ल्होलो रिमठिमकि गेताङ स्हेङ्सि दाङ्जि । गेताङ नेपाल तामाङ घेदुङ संघीय गेदाछोकला स्यानचोहो दिपक वाईबा तामाङला ग्रेनडोन्बोरि ताबा मुबा ।

ग्रेनडोन्बो वाईबासे तामाङ परम्परा आन्सार छ्योमे म्रासि गेताङला ठ्वाङ्सेन लाबा मुबा । गेताङरि थेसे तामाङ समुदायदा रिमठिमकि एकताला बाङग्याम ग्यालठिपा याङ्ताम किन्बाला संगठित थेन गिक्खे ताबारि समुदायदा दाल्ना लाजि । ‘ह्याङ रिमठिमकि स्ह्रुगसे कात्ते संगठित थेन सचेत मुला ओते ग्यालठिपा स्ह्रुगरि आरे ।’ थेसे बिजि, ‘संघीय लोकतान्त्रिक गणतन्त्रग्याम याङ्बा याङ्तामला ल्हानाबिमा ल्हाना प्रयोग लाबारि ङाइ तामाङ समुदायदा म्होइजेन लाला ।’

गेताङरि समाज थेन गुम्बाला ग्रेन्पो धर्मगुरुला स्ह्रुगरि निबा ह्रेङ्बा दुइहेन्से योगदान पिन्स्ह्युबा धर्मगुरु छिरिङ देवानेतोंग लामादा स्हाङ्मोस्यो फुल्बा मुबा । गेन्दुनला गोछासि नेपाल तामाङ घेदुङ पोखरा महानगर दाछोकला सोमछा छेजोमग्याम पदरि निर्वाचित अन्जना डुम्जनदा चेगाइला चिनोग्याम डेन लाबा मुबा । निबा दिङ्ला गेताङजुगुरि समाजदा योगदान पिन्सि ह्रोलाबाजुगुदा नोन डेन लाबा मुबा ।

ल्होलो रिमठिमकि ओसेम क्लाङ्छ्योङला छ््याम सन्चालन ताबा गेताङरि नेपाल तामाङ घेदुङ केन्द्रीय दाछोकला ङ्हाच्छाला ग्यात्चोहो कुमबहादुर तामाङ, जोङ चोहो भक्त तामाङ, जोङ्ला ङ्हाच्छाला ग्यात्चोहो रामप्रसाद सम्देन, घेदुङ पोखरा महानगर दाछोकला चोहो अन्जना डुम्जन थेन गेन्दुनला स्हेङ्खेन ग्रेन्पो ग्रोइपो बुद्धि बहादुर रुम्बातेन स्यान्दोकादेसे ह्राङ्ला सेमताम थान्बा मुबा ।

गेन्दुनला चोहो विष्णु योन्जन तामाङला चोहोदानरि स्योल्बा गेताङ गाउराइ शान्ति लोप्चन तामाङसे संचालन लाबा मुबा । गेताङरि स्यानचोहो बोस बहादुर पाख्रिन तामाङसे डेन सेमताम थान्बा मुबा ।

(छिगकि दोनः साप्तो– सेवा, दाछोक– समिति, ख्रेला– माघ, कामरे– शनिबार, रिमठिमकि– सांस्कृतिक, स्यानचोहो– उपाध्यक्ष, ग्यालठिपा– राजनीतिक, याङ्ताम– अधिकार, दाल्ना– आव्हान, स्ह्रुग– रुप, ग्रेन्पो– प्रमुख, स्हाङ्मोस्यो– ताम्रापत्र, गेन्दुन– गोछासि– प्रतिनिधित्व गर्दै, छेजोम– अधिवेशन, चेगाइ– माया, क्लाङ्छ्योङ– खेलकुद, ग्यात्चोहो– कार्यकारी अध्यक्ष, ग्रोइपा– सल्लाहकार, स्योल्बा– सम्पन्न)