चेगाइ जेक्खे गुलाब आहिन,
तिरेला उपहार नोन आहिन
चेगाइमि थे मौनता हिन्ना
थेरि ङ्ही आत्मासे
गिसेम गिदा ङ्यान्चिबा ताला ।
चेगाइ बिबा
याङ्ताम आहिन, स्वीकार हिन्ना,
बन्धन आहिन, विश्वास हिन्ना,
आकर्षण जेक्खे आहिन,
आदरला निरन्तर ग्यारेम हिन्ना ।
थेरि ङा आहिन, ह्याङ् पाङ्ला,
थेरि डाबा आहिन, समझदारी डाला,
थेरि ल्हुइबिमा ङ्हाच्छा
सेमसे या चुङ्ला
थेरि चेगाइ केला ।
चेगाइ दिवससे डान्गाइ तिनि
चेगाइ उन्बा आहिन, सोबा ताम हिन्ना,
चेगाइ म्हाइबा आहिन,
ह्राङ्नोन दोबा ल्हाम हिन्ना ।
चोदे चेगाइसे
ह्याङ्दा
झान दयालु, झान सचेत,
झान जिम्मेवार स्होला बिसाम
थेनोन चेगाइ हिन्ना
देन्बा काप्तोन हिन्ना ।
मिरिक, दार्जीलिङ
१४ फरवरी २०२६
(छिगकि दोनः चेगाइ– प्रेम/माया, ग्यारेम– अभ्यास, ल्हाम– यात्रा, देन्बा– सत्य, काप्तोन– उत्सव)
दोःबा : यकिना अगाध
तपाईको प्रतिक्रिया दिनुहोस