जंगेला निकृष्ट हुकुमे शासन
बिक्रम संवत् १९१० ला ह्युलकि ऐनला
बाछिटासे
फ्योरबाम्बा ङाला मेरो पुर्खाला
आडोबा, आब्रिबा
डान्मा सातान स्हुखासि चिबा
हिगिखिबा आरेबा आज्याबा दोङराप ।
ङाला आपा–म्हेमेसे
बामला स्योपनिना
तिङरि का छ्याना लासि
ख्वाँक्क ब्युङ्मा छिङ्गाइ का रुइसि
भिमफेंदीला हान्डोरि
चुईँ–चुईँ फोर्ड कम्पनीला मोटर गाडी पुइबाकेन लाबा ।
बर्बरता क्योङ्ला
अचाक्ली दुल्बा दोङराप ।
हिगिला ‘अ’दोना ङोसेबारि आयाङ्बा
ग्याप्पाला ज्वालासे क्रोबा
म्लाङ गोसोल मेफ्रा दोबा
आडिक्बा दोङराप ।
हिगि सेबारि आखाम्ना आहिन
हिगि सेबारि आयाङ्ना
लिच्छा–लिच्छा ल्हानान ताना लाबा ।
बाठ्ठोजुगु बठ्याईला
श्यामकर्ण ता क्रेसि
काँशी–बनारस छ्योङ्जि
गुरु तेन्सि ब्रिजि, डोजि
ग्रेन ओम असल ज्ञानी दोसि
ह्युल दोसिमाम खाजि
जेबा दोङरापदा दाःन थान्जि
ख्यारख्युर मोक्कोन ङाला
हालीमुहालीला सिद्धान्त सुत्रपात लाजि,
सोझो नाम्साला सोझो म्हिजुगु
मकवानपुरला
चित्लाङ, कुस्ले पाङ्ग्याल थेन मार्खु पौवाला
अफ्ठ्यारो ग्यामजुगुरि
ह्राङ पाप्सि मोटर गाडी आताइना लासि
पांग्रा तेसिमाम
जर्मनी फोर्ड गाडीला भरिया दोजि ।
गाडी शहर वाङ्जि
शहरला च्युल्बा सडकरि
वापवाप्पा, च्युलच्युल्बा म्हि पुइसिमाम कुल्जि
गाडी पुइबा म्हिजुगु
ब्रासिमाम फ्लिकदोजि
सातान लिच्छा परतिजि ।
हिगि ङोसेबारि आपिन्बाजुगुदा डान्मा
बोमो खासिमाम
बोमोला म्युगु
लामासे टाँप्च्यो लासिमाम
टा दोनान टाङ्ना लाबा जोग्याम
फुँस...फुँस... म्युगु थोन्ना ।
दुइ पोजि,
युगसे लि पोजि
पापला दार्बुङ प्लिङ्सि मुसिम !
गिक्खेन आपाला दर्जनछा तान्बाला कलहसे
राणाजुगु नुब्जि ।
थेसे ह्राङ्नोन हिगि ङोसेबारि याङ्बा
याङ्तामला सुनिश्चित ताजि
ङाला आपा जुम्बिसे सारि ब्रिसिमाम क ख लोप्जि
ङाइ सिसाकलमसे कागजरिन ब्रिसिमाम
हिगि ङोसेबा मौका याङ्जि ।
ङादा हिगि ङोसेना लाबा चेमो गुरु वर्गरि
कोटि–कोटि फ्याफुल्ला ।
तिन्हाङ्गार सेम हिगि दोसिमाम
पाना नाङ ङ्हेला
पानाजुगु केवा दोसिमाम सोचिला ।
मौनता सन्नटाला ङामरि कोल्बाकेन,
तिङ्ला नेपथ्यग्याम
बिरहला फ्युफ्यु ह्राप्बान,
सर्कोनाङ लापरबाहीला लापड
ङाला न्हाब्याङव्हनाला क्रास्या च्योक लासि निला ।
स्हेर ह्योङ्सि ङ्हेबा ङ्हाच्छान
भावना हिगि दोसि
सेमला कोरा पन्नारि
डिक्सिमाम अनुच्छेद दोसि
लाव–लस्कर नोन लस्कर
ग्यालाम कुनिरि सुबा दोङ ह्राङ लासि
चिला डिक्सिमाम ।
डोबा कुलला म्हेदाङ आहिन ङा
ढाकररि दोइ पुइबान
आपातेन हलोला अनौरि
च्योसिमाम स्होबा हिन्ना ङाला केवा
डिग्रीजुगुला प्रमाणस्यो आरे ङातेन
दिक्षान्त काप्तोनला अनुभव तिगाइ थाहा आरे,
तासाइ नोन
आउदिन नुप्बा चेगाइ मुला हिगितेन ।
पाँचखाल ,काभ्रेपलान्चोक । दोतः लिमासोल, साईप्रस)
(छिगकि दोनः हिगि– अक्षर, काप्तोन– समारोह, तान्बा– सन्तान)
दोःबा : यकिना अगाध
तपाईको प्रतिक्रिया दिनुहोस