कोपेनहेगनरि बन्दरगाहला ङामरि याखारगि ब्लाक्बा गल्ली मुला– वेष्टरो वल्र्ड । चु गल्ली म्हान्बा बिमा छार मुला तासाइ नोन च्याङ्ना आबाद मुला । चुला कुनिरि तिगाइ ग्याँस नाङ्सालजुगु मुला । ओम उदासी, सुनसान ! तिन्हाङ्गार बिले सेर्खाला दुइरि नोन चुरि गोर ङ्ही सोम बटुवा जेक्खे म्राङ्ला ।

निबा ङ्यासे ङादा चुनोन गल्लीरि अनौठो स्थितितेन साक्षात्कार तातोजि । ङा गल्लीरि क्यार्से जासे कोर्बान मुबा । ह्राङ्ला लिसो छोग्याम याखारगि म्रिङ्कोला खाजिबा म्राङ्जि । चु गल्लीरि भर पिन्बा खालाइ नोन आरेमुबा । ग्याँस नाङ्सालजुगु लुङ्जिन्बा मुबा । तासाइ नोन ज्याबान दोप मुबा गल्ली । चोते दोप कि ङाइ थे म्रिङ्कोलाला लि नोन प्रष्ट म्राङ्बारि आखाम्नि । म्हान्जि, ‘ग्राहक म्हाइबारि ब्राबा मुसिम !’

गल्लीला मेरि दोसि ङा फ्लिकदोसि खाबारि चुजि । म्रिङ्कोला नोन फ्लिकदोसि खाजि ओम फ्लिकदोजि । ङा ङ्हीछारेम थेला ङामग्याम ब्राजि । ‘शायद खालाइदा ब्रान्चिबा मुसिम ।’ चुह्राङ्बा विचार खाजि ङाला सेमरि ।

ब्लिछा रेम थे थेन ङाला ह्रुप ताजि, ङाइ आदर लासि ह्राङ्ला कुलाकि ओर्सिमाम ङ्योइजि, ‘ज्याबा ङ्यासे ! शायद ह्राङ्से खालाइदा ब्रान्स्ह्युचिबा मुसिम ?’

थे तिक्खुरि चोन निजि, ‘आहिन !’

तासाइ ङादा थाहा ताजि– पाक्कान खालाइला ब्रान्बाकेन मुला । ङाइ ङ्योइजि, ‘खाल्दा ब्रान्चिबा मुला, थे आदोगादे दोना ङातेन चिबारि आपत्तिमि आरे !’

‘आरे !’ थेसे जाजाकि नोन आज्याबा आम्हान्नि । लिसोचा ङादा थुजेछे पिन्जि । छ्यामरि थेसे चु नोन स्पष्ट लाजि कि चु दुइ थेसे खालाइदा ब्रान्चिबा आरे, जेक्खे ओस्सो कोर्बारि थोन्बा हिन्ना ।’

कोर्ना कोर्नान ङाइ थेदा ह्राङ्ला कुरि ख्वाइबा प्रस्ताव लाजि ।

‘आतो, थुजेछे !’ थेसे थोबो ह्योङ्जि ।

चुह्राङ्लासि कोर्बाला तिगाइ तुक आरेमुबा । तिल्दाबिसाम दोपला ङ्यान्दि ङाइ थेदा ज्याना लासि च्याम्याङ्बा आरेमुबा । काते ङ्ह्याजि बिसिमाम च्याबा ल्हेनसे ङाइ सालाइ म्राजि ओम काँटी तोर थिसिमाम थेला लिरि तिरेम प्लिक च्याजि ।

‘साँढे कु ङ्ह्याबाकेन चिम ।’ ङाइ पाङ्जि ।

थे छोनछोन दार्जि बिले हाङ्बासे गोङ्बा मुला । ङाइ चु मौकाला छ्योना फाइदा किन्सिमाम बिजि, ‘ह्राङ्दा हाङ्चिबा चिम । ह्याङ्से खानाङए रेष्टुँरारि चिसिमाम तिगाइ थुङ्बारि जरूरी मुला । क्याफे टाइवली खाराङ ताला ? आतासाम क्याफे नेशनल नोन ब्राइ ।’

‘ह्राङ्से म्राङ्आस्ह्युनि ङा चु नाछालरि खानाङ नोन निबारि आखाम ।’ थेसे निसाल पिन्जि ।

दारे ङाइ गिक्छारेम थेजारिक्यार ध्यान पिन्जि । थेला लिरि नकाब क्वान्बा मुबा । ङाइ क्षमा ह्रिबान दोपदान ह्राङ्ला ख्योल्बाला जिम्मेवार ठह¥याप लाजि । खाराङ्लासि थेसे तिक्खुरि ङाला क्षमा स्वीकार लाजि, चुग्याम ङा चु निष्कर्षरि दोजि कि थे ग्राहक म्हाइबारि ब्राबा तोसोला म्रिङ्कोला हिन्नोन आहिन ।

‘ह्राङ्से ङाला कुख्वाइबादा नोन स्वीकार लास्ह्युनि ।’ ङाइ ङ्याम्बा काइरि पाङ्जि, ‘चुग्याम शायद ह्राङ्दा डोइ खासेला !’

थे ङाला कुरि खाजि ।

ङान्छे कादेरेम गल्लीला क्याच्चा गु चुच्चा गु लाजि । थेसे ङादा दोसि तिरेम दुइ च्यागो बिसि पाङ्जि ।

‘च्युइ ङ्ह्याजिन्जि । ह्राङ खानाङ स्ह्युमुला ?’

‘गेमल कोनगेवीला गल्लीरि !’

ङाइ थेदा ङ्योइजि, ‘ह्राङ्से ङादा ह्राङ्ला म्रापदोना सापिन्बारि अनुमति पिनस्ह्युला ?’

‘अहँ ! ङाइ ह्राङ्दा... थेला... ह्राङ बेकग्रेडरिमि स्ह्युबा आहिन ?’

‘ह्राङ्से खाराङ्लासि थाहा याङ्स्ह्युजि ?’ ङाइ विस्मित तासि ङ्योइजि ।

‘ङादा थाहा मुला, ह्राङ खाला मुस्ह्युला ?’

तिगाइ दुइ स्हिवाङ प्लिङ्जि । ङानि गिसेम गिसे कुख्वाइसिमाम, मधूरो ह्यालरि ब्राचिजि । थे योना योना ब्राचिबा मुबा ओम थेला ह्रेङ्बा नकाब लाबारि थेला लिच्छा लिच्छा ह्योङ्चिबा मुबा ।

‘ह्याङ्से योनान लातोला ।’ थेसे बिजि ।

गेमल कोनगेवीरि ह्राङ्ला म्रापरि दोसिमाम ङातिलो फ्लिकदोसि बिले थेदोना सानिबाला बोरि थुजेछे पिन्बारि म्हाइचिबा मुबा । 

ङाइ थेला म्रापला किलिङ ठ्वाङ्पिन्जि ओम थेसे गोल्छेसे न्हाङरि वाङ्जि । ङाइ नोन गोल्छेसे थोबो म्राप ङामरि बोर्जि ओम थेला लिच्छा लिच्छा वाङ्जि । न्हाङरि थेसे तिक्खुरि ङाला या चुङ्जि । ङानि ङ्ही गिक्खे छिग सुताइ आपाङनि ।

ङानि गोल्छेसे चाम क्रेजि ओम सोमछा तलारि दोसि थेनताजि । थेसे ह्राङ्सेन कोठाला ताला ठ्वाङ्जि । थेलिच्छा याखारगि स्यान्दो म्राप ठ्वाङ्जि ओम ङाला या चुङ्सिमाम न्हाङरि बोर्जि ।सम्भवतः चु चिसाङ कोठा मुबा, तिल्दाबिसाम डेङरि घडीला टिकटिक काइ प्रष्ट थेमुबा । कोठारि दोसिमाम थे ह्रेक्छाम थेनताजि । थेलिच्छा तिक्खुरि थेसे ह्राङ्ला ङ्हीनोन पाखुरा ङाला खारेरि थान्सि दार्सिकेन आउदिन आवेशरि खासि ङादा च्योजि ।

‘ह्राङ आस्ह्यु ? ङाइ नाङ्साल म्राला ।’ थेसे पाङ्जि । ङा हाथोम  चिमुबा । छ्यामरि उत्सुक नोन । ङा आउदिन ज्याना लासि स्याम्बा ग्रेन चिसाङ कोठारि मुबा ।

‘चु कोठा काते जेबा मुला छ !’ चकित तासि ङाइ बिजि, ‘ह्राङ चुरि स्ह्युमुला ?’

‘लास्सो... चुनोन हिन्ना ङाला जाजाबा ब्राङ ।’ थेसे निसाल पिन्जि ।

‘ह्राङ चु दिमरि सम्भवतः ह्राङ्ला आपाआमातेन स्ह्युमुसिम !’

‘अहँ... आहिन, आहिन, ङामि अधबैंसे म्रिङ्कोला हिन्ना । ह्राङ्से दाते म्राङ्स्ह्युला ।’ थेसे ह्राङ्ला नकाब स्युजि ।

थे बाइस तेइस दिङ्ला छामे मुबा । ओते जेबा आरेमुबा । तासाइ बैँस बिसाम सार्बा म्राङ्मुबा । थेसे बायाँ यारि ज्याप क्वान्बा मुबा । स्पष्ट मुबा थे ब्रेल्साङ लाजिन्बा म्रिङ्कोला मुबा ।

ङाइ थेतेन कादेरेम ङ्योइबारि म्हाइबा मुबा– थे खाला हिन्ना ?.... चोदे थेला ह्रेम्बो मुला बिसाम खानाङ मुला ? चु दिम खाल्ला हिन्ना ?’ तासाइ मोक्कोन रेम खाइमा ङाइ सुङ ओर्बारि म्हाइमुबा, थे ङातेन आउदिन लेपफोइमुबा ओम तिगाइ पाङ्आपुङ्मुबा ।

‘ङाला मिन ऐलन हिन्ना ।’ लिच्छारि थेसे स्पष्टीकरण पिन्सिकेन पाङ्जि, ‘ह्राङ तिगाइ थुङ्स्ह्युमु व्हा ? ङाला विचाररि थेदुइ दोना ह्राङ स्हिम्बा कोठारि स्ह्युगो ।’

ङा म्हेर्बा कोठारि निजि । चिसाङ कोठाला ह्यालसे थेला तिगाइ बो ह्याल स्होपिन्बा मुबा । तिगाइ दुइलिच्छा ऐलन म्हेर्बा कोठारि खाजि तासाइ तिगाइ दुइ थे म्रापरिन राप्चिजि । ङा फाल छेप्सिकेन थेला ङामरि दोजि । थेसे गोल्छेसे क्रिङ्जि ओम ङाला ङामरि खाजि ।

चु मोक्कोन घटना निबा ङ्यासेला हिन्ना ।

थेलिच्छा तिगा ताजि ओम ? ब्रान्स्ह्युगो, झन ल्हानान स्हे पाङ्बारि लेङ्बा मुला ।

ङा स्ह्योरि छोर्मा, दिनि फेबारि चुजिन्बा मुबा । दिम गोल्छे गोल्छेसे पर्दाग्याम वाङ्सिमाम कोठारि च्याचिबा मुबा । ऐलन नोन रेजिन्बा मुबा । ङादा च्यासिमाम ङेचिबा मुबा ।

घण्टा ङ्ही लिच्छा ङा रेजि । ऐलन नोन स्होन्बो क्वान्सि क्वान डिक्ना लाबारि चुजि । ओम थेलिच्छा...ङाइ केवाला चु अनुभव याङ्जि थेसे ङादा तिनि नोन लोङ्खेप्पा म्हाङ्से ह्राङ डोना लाला । ङा बेसिनला ङामरि राप्चिबा मुबा । ऐलन ङामरिन तिगाइ लाबाकेन मुबा । खाइमा थेसे थे कोठाला म्राप ठ्वाङ्जि, ङाइ थोबो फ्लिकदोसि च्याजि । कोठाला होन्दोलोङ झ्यालग्याम खाबा स्ह्योला सिर्सिरे लाबासे ङादा दार्ना लापिन्जि । कोठाला गुङरि टेवुल मुबा थेरि याखारगि कुम्बिरिङ ताचिबा म्हिला छेन्दे प्रष्ट स्ह्रुगरि म्राङ्बा मुबा । थे छेन्दे तार कात्रोसे रिल्बा मुबा । थे याखारगि ह्रेमकोलाला छेन्दे मुबा । थेला क्रा सार्जिन्बा मुबा ।

खाइमा ऐलन फ्लिकदोसि खाजि । थे दुइरि क्वान क्वान्सि थोन्बारि ठीक ताजिन्बा मुबा । ङाइ दारेम थेला कुख्वाइबाला खाजिबाइ गरिमामय निसाल पिन्बारि खाम्चिबा आरेमुबा । थे ङादा माङ गल्लीदोना साबारि खाबा सेम लामुबा । तासाइ ङाइ थेदा थेह्राङ लाबारि आपिन्नि ।

‘ल्हाउ लोम बिदा !’ थेसे गोल्छेसे पाङ्जि ।

‘न्हाङ्गार दोनादा आहिन ओम ?’ ङाइ थेला अभिप्राय थाहा ताबारि ङ्योइजि ।

‘अहँ न्हाङ्गार आहिन !’

‘तिल्दा ?... तिल्दा न्हाङ्गार आहिन ?’

‘चोते ल्हाना थाङ्योइगो । स्ह्योरि ङा मलामी निला । ङाला याखारगि ङेङ्गोर डोङ्बा मुला । थे थेरि... ह्राङ्दा थाहा नोन मुला ।’

‘न्हाङ्गार आहिन्साम रेनिङकुनु आता ओम ?’

‘ठीक मुला ! रेनिङकुन चुनोन कोठारि ङादा ह्रुप ताबारि खामस्ह्युला । दारे तिनिदा बिदा ल्हा !’

ओम ङा थेग्याम थोन्जि ।

थे खाला मुबा ? थे छेन्दे खाल्ला मुबा ? ङा चिन्तित मुबा ।

ङा सोझोन क्याफे वरनीरि निजि । थेरि डाइरेक्टरीरि ङाइ गोमल केनगोवीला मिन म्हाइबारि चुजि ओम ग्ला गिरि स्याप्सिन ख्लाजि । ङाइ तिगाइ दुइ थेरिन ब्रान्जि । थेदुइ तेमा ङ्यासेला स्योस्यो नोन बजाररि खाजि । ओम, ङाइ योना योना डोङ्बाला ग्रा छिपा पाना च्याबारि चुजि । म्हान्स्ह्युगो, थेरि ङाइ थेला मिन स्याप्सिन ख्लाजि । ताङरि थेला मिन क्राथोरि मुबा ओम ल्हानान ग्रेन हिक्पारि छिपा मुबा । ङाला ह्रेम्बो ५३ दिङरि, ह्रेङ्बा नाबा लिच्छा तिनि डोङ्जि ।’

थे घटनाला तिरे लिच्छाला ताम हिन्ना– ङा ल्हानान दुइदोना मोजुइसि सोच तिसि चिजि– ‘याखारगि म्हि ब्रेल्साङ लाला । थेला म्रिङ थेबिमा च्युइ सोम दिला दिङ्ला ताला । थे म्हि ह्रेङ्बा दुइदोना नाला । ओम, याखारगि ह्याल रेरि सिला ओम छामेरिन विधवा सुखला सा बुन्ना ।’

नर्वे ।

(छिगकि दोनः केवा– जिन्दगी, छो– दिशा, ङ्यान्दि– कारण, बहाना– ल्हेन, नाछाल– अवस्था, ख्योल्बा– गल्ती, स्हिवाङ– शान्ति, च्योजि– चुम्यो, स्याम्बा– सजाएको, मोजुइबा– झोक्रिएको)

दोःबा : यकिना अगाध