ए थेन ङा
चु केवाला ल्हाम्पा जेक्खे आहिन,
सायद खाजिबाइ अधुरो मोलमला– प्रार्थना
दोसि केबा हिक्पा हिन्ना ।
ह्याङ्से या चुङ्सि
सहर कोर्बा थोप्साङ आयाङ्नि
गिक्खे छाना दिरि
ङ्यासे न्हाबा याङ्ताम आयाङ्नि
तासाइ नोन
ह्याङ्से गिसेम गिला आत्मारि
दिम स्होजि ।
चु चेगाइ
ल्हुइसे स्याप्बारि आखाम्बा
तासाइ आत्मासे ङोसेबा ब्रेल्बा हिन्ना
थेरि दूरीसे ब्रेला
ओम डान्बासे नाङ्साल म्राचिला ।
ए ङाला केवाला
आयाङ्बा तासि नोन
मोक्कोन बिमा नुप्बा डुप्बा हिन्ना
ङा एला मिरि
ङाला अधुरो देवाचेन म्राङ्ला ।
ह्याङ्दा
डोङ्बालिच्छाला रानीमहल आतो
थेरि म्हारला झ्याल थेन
मखमली चामजुगु मुगाइ
ह्याङ्दाम जेक्खे
याखारगि आत्मिक महल तोला
थेरि दुइ आसि
थेरि फेबाला नियम आता
थेरि ए थेन ङा
मोलम ह्राङ्नोन चाङ्बा तासि
सातान गिसेम गिन्हाङरि चिचिगाइ ।
चोदे स्यान्दो केबा देन्बा ताला बिसाम
ङा दोसि नोन
एलान अधुरो चेगाइ दोबा सेम मुला
तिल्दाबिसाम क्योङ्कि बिमा जेबा
खाइमागि
चुह्राङ्बान आत्मासे जेक्खे गोबा चेगाइ ताला ।
ओम चोदे केबाजुगु थुम्जि बिसाइ नोन
ङाला लिच्छाला सासे
चोत्ते जेक्खे ह्रिसेला मुला
‘हे दुइ
ङान्दा साजाम्बुलिङरि आतासाइ नोन
खाजिबाइ अनन्त आत्मिक महलरि
सातान छ्याम थानपिन्गो ।’
२६ दुगु २०८३
(छिगकि दोनः ल्हाम्पा– यात्री, मोलमला– प्रार्थना, थोप्साङ– भाग्य, ब्रेल्बा– सम्बन्ध, डुप्बा– प्राप्ति, देवाचेन– स्वर्ग, चाङ्बा– शुद्ध, क्योङ्कि– पूर्णता)
दोःबा : यकिना अगाध
तपाईको प्रतिक्रिया दिनुहोस