ह्युलसे छारिब्योनजुगुला काला न्याय ह्रिबाकेन मुला...

म्हुनला सिल्बा लाबासे ब्लाप्बा शहरदा ह्योगह्योग लाचिबा मुबा । सडक गुला खेःबा डेङ–पोस्टरजुगु डेबा मुबा, तासाइ छिग दातेनोन स्पष्ट मुबा–

‘म्हाङ चुङ्बा मुला, लिउ लुटतिबा मुला ।’

प्रताप, साधारण सानाम्पाला कोला, अदालतला म्रापदोना दोगाबा मुबा । थेसे कुरि खिसि थान्बा नोटबुकदा मुठिसे चुङ्बा मुबा । थे नोटबुकरि थेला ज्योज्यो दीपकला अपुरा व्हाइखा मुबा–

‘ह्युल ङाला आमा हिन्ना, थेला का ङान्ना विश्वास हिन्ना ।’

प्रतापला डान्बारि थे रे दातेनोन छोन्बो मुला– ङ्योलोकला भीडरि खाइमा दीपक गुर्जि सारि, सडक म्हुक्कि वाफ्युर ताजि ।

छारिब्योनजुगुला उत्साह, का थेन म्हाङ धुलोरि छ्योल्सिकेन निजि । तासाइ ह्युल दातेनोन मौन मुला ।

अदालतग्याम थोन्बाकेन लाबा आमाआपाजुगुला लिरि ब्लाप्बा थेन निराशा टल्कपताचिबा मुबा । याखारगि आमाला क्रासिकेन खाबा काइ दातेनोन वातावरणरि होङ्चिबा मुबा–

‘ङान्ना जाजामेला का सस्तो आरेमुबा, तासाइ शासकला न्हाब्याङ बहिरो मुला ।’

प्रतापसे ज्योज्योला व्हाइखाला छ्यामला नोटबुक म्रापरिन सावधानीपूर्वक थान्जि । याङ्बा काइरि गोल्छेसे पाङ्जि–

‘एन्ना आहुती दोङरापसे आम्ले, न्याय गाइबा तासाइ नोन देन्बा पाङ्सेला मुला ।’

थे दुइ, सडकरिक्यार राप्चिबा ग्यार्जाछा छारिब्योनजुगु काइ गिरिन ङ्हार्जि–

‘ह्युलसे छारिब्योनजुगुला काला न्याय ह्रिबाकेन मुला ।’

प्रतापला मिरि मिख्लि ह्योङ्जि तासाइ सुङफिरि याङ्बा मुस्कान फेल्जि । थेदा विश्वास ताजि– का थेन म्हाङ खाइमाइ ब्यर्थ आता, तिल्दाबिसाम काइ खाइमाइ आसि ।

मिरिक, दार्जीलिङ, भारत ।

(छिगकि दोनः छारिब्योन– युवा, खेःबा– पुरानो, लिउ– भविष्य, सानाम्पा– किसान÷कृषक, ङ्योलोक– आन्दोलन, होङ्चिबा– गुन्जिरहेको, ग्यार्जाछा– सयौं, ङ्हार्जि– गर्जिए, फेल्जि– फैलियो)

दोःबा : यकिना अगाध