‘ओइ पासाङ ! ओइ पासाङ ! तिला लाबा ए ?’ पासाङसे ङा दिमला धन्दा लाचिबा मुला बिसि पाङ्जि ।
वाङ्जुसे पासाङदा पाङ्जि, ‘दिमला धन्दा लाबा लिच्छा ह्रेच्छाक ङाला दिमरि खाउ ह्या ।’
‘तिल्दा होइ ?’ पासाङ्से बिजि ।
‘खाउले होइ । ह्याङ ह्रुप तासि ताम आलाबा नोन ल्हाना ताजि । थे तासी म्हाले ।’ वाङजुसे बिजि ।
पासाङसे ह्या ताजि । पासाङ तिनिम वाङ्जुचा नितोला तिल्दा ङ्योइमुग्याम विसि दिमला गे योना योना लावारि चुजि । वाङजुसे नोन पासाङ खाला बिसि जाजाकार मुबा गे जिन्न लाजि । पासाङ दिमला गे जिन्ना लासि वाङ्जुला दिमरि निजि ।
‘वाङ्जु ! वाङजु ।’ पासाङसे थेला दिमरि दोसि ङ्योइजि ।
‘ङा न्हाङरिन मुला होइ ।’ वाङजुसे दिम न्हाङ ग्याम्सेन ओइ तासि माङ्ग्यार थोन्जि ।
वाङजुसे न्हाङरिन ङ्योइजि । पासाङसे माङ्ग्यार नोन ठिक मुला बिसि पाङ्जि । वाङजुसे चकटी बाजि ओम ङ्हि नोन माङ्ग्यार चिजि ।
‘ह्राङ्ला आपा, आमा खाइओम ?’ दिमला ख्यारख्युर च्यासि पासाङसे ङ्योइजि ।
‘ठाकुरी नाम्सारि छ्युगु म्हारबारि ब्राबा मुला । योनोन थोन्बा । दोजि ताला दात्ते ह्राङ्बाम ।’ वाङवजुसे पाङ्जि ।
‘थेरिक्यार ब्राला विसिमाम ङादा थाहा आतानि । थाहा ताबा हिन्साम ङाइ आङा नोन पुइसेला ।’ पासाङसे पाङ्जि ।
‘ह्राङ्से नोन आङ्योइनि ।’ वाङजुसे पाङ्जि ।
‘तागाइ दोसि ह्रो याङ्बा दुइरि पुइला दारेम ।’ पासाङसे बिजि ।
‘एदा ताङ्बा स्हे फापरला आलुम मुला चाइ ह्या ।’ वाङजुसे पाङ्जि ।
‘खाल्से बाबा ओम ?’ पासाङसे ङ्योइजि ।
‘आपागेनसे पिन्बा रो । तिला ङ्यासे स्होबा मुबा । एदा आउदिन सेम निमुला विसिमाम थान्पिन्बन ।’ वाङ्जुसे पाङ्जि ।
‘ओहो लु ज्याबा ताजि ।’ पासाङसे चोत्ते बिमाहेन्से ङ्हीनोन डिक्सिमा आलुम छ्याम चाबारि चुजि ।
आलुम चाना चानान वाङजुसे ताम तेजि, ‘तिला मुला एला तामसोर ? ङामरि मुसाइ छ्याम टिसि ताम लाआम्याङ्बा । ब्रेल्साङ तामाहेन्सेम लि सुताइ आम्राङ ताला !’
‘तिला लासे होइ ! कात्ते दिङ तोरतोर खाजि ओत्तेन ल्हाना क्यारमार ब्राआम्याङ्बा टिम । ह्याङ ब्रेल्साङ तासाइ ह्राप ह्रुप तासि ताङ्बा लादोला म्हाले होइ । तासाइ, म्हिसे ए थेन ङा डिक्बा म्राङ्सि मि क्याबा मुला । ह्याङ थारेङ ताला आदे । ह्याङ ङ्हीरि विश्वास तादोला । लुबा ताम लाला आदे ।’ पासाङसे बिजि । पासाङला तामरि वाङजुसे नोन ह्या ताजि ।
‘जाजारि ह्याङ कादे छ्याम छ्याम छ्योङ्सि ब्रामुबा ह्वा । दुइ थेन छ्याम ब्रानोन तोबा टिम ।’ वाङ्जुसे ताम काप्जि ओम बिजि, ‘ओइ पासाङ ! तिल्मा एदा लाखुरी गाङ्ला डोल्मोसे ङ्योइबाकेन मुबा ।’
‘खालाङ ह्रुप ताबा होइ ?’ पासाङसे ङ्योइजि ।
‘ङा डेरीरि ङ्हे साबारि निबा दुइरि ह्रुप ताबा । थेचा छे थाबारि निबाकेन टिम । एला ताम ल्हानान लाजि ।’ वाङजुसे पाङ्जि, ‘थेला तामकादे गोमा ङादाम एदा सेम लाबा ह्राङ छोर्जि । दातेम ङ्हाच्छाला बिमा झन जेजिम ।’
‘एसे ताम ल्हाना स्होसि थापाङ्गो होइ ।’ पासाङसे बिजि ।
‘ल्हु होइ एदा ङाइ दातेदोना ताम लुबा मुलोम ! जाजा हेन्सेला च्यो ब्राबा ह्रो ह्याङ । तिनि दोना ए थेन ङा आज्याबा छिक गि ताबा आरे । देन्बान हिन्ना ।’ वाङ्जुसे पाङ्जि ।
‘तिला ताम पाङ्जि ओम होइ ग्यामरि ?’ पासाङसे ङ्योइजि ।
‘तिगा ताम तासे ? एला ज्याबा बयान लाबा म्हाले थेसे ।’ वाङ्जुसे निसाल पिन्बान पाङ्जि, ‘बरु ब्राइ तिनि लाखुरी गाङ्ला गोन्बोरि क्यार ।’
‘ह्याङ्ला चु दुइ बिबाम करियर स्होबा दुइ हिन्ना । लिच्छाला ज्याबा ग्याम च्याबा दुइरि चेगाइला जालरि परतिजि बिसाम दोखाङरि दोबारि आखाम बिमुला ।’ पासाङसे पाङ्जि ।
‘सेम ताङ्बा म्हि याङ्साम चेगाइ लातोला । चेगाइसे ह्राङ्ला लिउला दोखाङदा आपाङ्बाके होइ ।’ वाङजुसे ताम थिजि ।
‘ल्हु हिन्साम, निगेलोम । डोल्मो ह्रुप ताजि बिसाम ताम गोसि च्यादोला । ङा तयार तासि खाला ।’ पासाङसे बिजि ।
वाङजु नोन तयार ताजि । पासाङ तयार तासि दोखाजि । ङ्ही नोन थेरथेर तासि लाखुरी गाङ्ला गोन्बोरिक्यार निजि ।
‘डोल्मो थेन एला सेम गि, ग्याम गि तासाम कादे ज्याबा तासेला होइ ।’ ग्यामरि वाङजेसे पाङ्जि ।
‘खाइ सेम गि ल्होसि तासाम जेक्खे हिन्ना आहिन विसाम गाह्रो मुला । म्हि कादेला म्राङ्सि लोङ्बा खाबा ङादामि ।’ पासाङसे बिजि ।
‘म्हिला म्राङ्सि लोङ्जि बिसाम दिमनाम नोन आता ।’ वाङजुसे बिजि ।
‘हिन्बाम हिन्ना ।’ पासाङसे पाङ्जि, ‘थेतेन ङाला सेम, विचार गि तासाम च्यागे तिला ताबा टिम । चु गेरिचा एला ग्रेन ह्रो तोला होइ ।’
पासाङला ताम थेसि वाङ्जुसे पाङ्जि, ‘ङा ग्याम्से खाम्दे ह्रो ताला सुर्ता आलाउ होइ ।’
‘ग्रान नोन फलोम ?’ पासाङसे ङ्योजि ।
‘ग्रान नोन फातोला ओम ? ङाइ एदा ह्रो आला ओम ? ए सुर्ता आलाउ । थेराङ हिन्साम खाउ ए थेन ङाला या बासि ग्रान फागे ।’ वाङजुसे बिजि ।
चुलिच्छा थेनि ङ्हीसेन गिसेम गिला या बाजि ओम ङ्हाच्छा वाङ्बारि गोङ्मा ल्हेबारि म्हाइजि ।
कज्र्युङ थेन म्हेन्दो ग्यालाम ङामला ब्राङ्ला ल्हाङरि गाया तोसि टिबा मुबा । गाया तोसि टिबा ग्ला ग्याम्से पासाङ थेन वाङ्जु याफिरि या बासि चिबा म्राङ्जि ।
कज्र्युङसे पासाङ थेन वाङ्जुदा ओइ ब्योन दोर्जे ङ्ही खालाङ निइलाबा बिसिमाम ङोजि ।
‘ङानिम लाखुरी गाङरिक्यार कोर्बारि निइलाबाको होइ ।’ पासाङसे पाङ्जि ।
‘ह्राङ्निला गे जिन्जि ओम ।’ वाङ्जुसे ङोबो दोरि छामेजुगुदा ङ्योइजि ।
‘जिन्बा आरे होइ ।’ म्हेन्दोसे निसाल पिन्जि ।
पासाङ थेन वाङ्जु निवारि छेमा कज्र्युङसे ङ्योइजि, ‘एनि गिक्खे थेरि टिउ गिक्खे चुरि खाउ ओम ।’
छामेकादेसे ङोसिमाम ङ्योइमाहेन्से पासाङसे वाङजुु निउ बिसि पाङ्जि । वाङजुसे नोन पासाङदा निउ बिसिमा पाङ्जि । ङ्हीलान ताम आडिक्मा हेन्से वाङ्जुसे ल्हुल्हु ङानोन निला बिसिमाम ल्हाङरिक्यार निजि ।
‘ङादा तिल्दा ङ्योइबा होइ ।’ वाङजुसे छामेकादेतेन ङ्योइजि ।
‘गाया तोमा तिला थोन्ला ?’ कज्र्युङसे ङोसिकेन ङ्योइजि ।
‘गाया तोमा तिला थोन्ना ओम म्ल्हा थोन्ना म्हाले । ओते सुताइ ङ्योइतोला ओम ।’ वाङ्जुसे बोमो खाबाह्राङ लासि पाङ्जि ।
‘ल्हु निउ थेह्राङ हिन्सामा ।’ कज्र्युङसे पाङ्जि ।
वाङ्जु पासाङ मुवा ग्लारि दोजि । पासाङसे तिला विजि होइ बिसिमाम ङ्योइजि ।
‘गाया तोमा तिला थोन्ना रो । म्ल्हा थोन्ना म्हाले बिसिमाम ङाम फ्लिकदोसि खाजि ।’ वाङजुसे पाङ्जि ।
‘चोत्ते जेक्खे बिजि थेन्छे ?’ पासाङसे शंका लासि ङ्योइजि ।
‘ओम... चोत्ते जेक्खे बिबा ले ।’ वाङ्जुसे निरीह लि स्होसिमाम पाङ्जि ।
‘होट ! एसे ङादा ताम लुजि । तिला दोना एसे ङादा ताम आलुमुबा, तिनिहेन्से एसे ङादा ताम लुबारि चुजि । ए ङाला ह्रो अहिन्बा टिम । ग्यालम गि मुबा । तिनिहेन्से ह्याङ्ला ग्यालाम फेजि ।’ पासाङसे बिजि, ‘दारेम एला ग्याम वाङ्गो, ङाला ग्याम ङा वाङ्ला ।’
दोलो दोना डिक्सिमाम छ्याम छ्याम खाजिबा ह्रो ङ्ही ग्यालाम फेसिमाम ह्राङ्ह्राङ टोटो ब्राजि । म्हेन्दोसे कज्र्युङदा बाङ्जि, ‘कादे ज्याना डिक्सि ब्राबा मुबा थेनि ङ्ही ह्रो, एसे म्होस्सिन फेना लाजि ।’
तपाईको प्रतिक्रिया दिनुहोस