याम्बु १९ बेल्बो । हेराङला कोन्ज्योसोम गाउँपालिकारि ‘तामाङ पदमार्ग’ स्होबा अवधारणा लागि कोन्ज्योसोम धार्मिक पर्यटन विकास समिति, हेराङसे काठुइ लाबा मुला । गेताङ नेपाल पर्यटन बोर्ड, भुकुटी मण्डपरि ताबा मुबा ।

कोन्ज्योसोम गाउँपालिकाला भारदेउ नाङ्गेगाङ तासि नारायणथानदोना दोबा छार पर्यटकीय पदमार्गला ल्हेछ्याला लागि समितिला सक्रियतारि छार योजना स्होबा हिन्ना ।

तामाङकादे ल्हाना चिबा गाउँपालिका ताबासे बहुपक्षीय पर्यटन ल्हेछ्या लाबा उद्देश्यसे तामाङ ट्रेल ओसेम ‘तामाङ पदमार्ग’ मिन थान्सि पर्यटकीय पदमार्ग स्हेङ्बा योजना सार्वजनिक लाबा हिन्ना । छार पदमार्ग स्हेङ्मा चुसे विशेष लासि ग्रामीण थुमला पर्यटक दोखाङकादे ल्हेछ्या तासेला पाङ्बा मुला ।

पदमार्गसे स्थानीयला न्होरछाबा, रिमठिम ख्युरछ्या, प्राकृतिक सौन्दर्य च्याबा थेन ल्हुइथाङ पर्यटनरि ह्रोतासेला अपेक्षा लाबा मुला । चु योजनाग्याम स्थानीय ग्योइ, धर्म, रिमठिम, चिबाचाबा स्थानीय स्तररि मुबा धार्मिक तिर्थग्ला प्राकृतिक सौंदर्यदा पर्यटनतेन थुइसि स्थानीय समुदायला कृषि, पशुन्हाबा, स्थानीय स्रोत परिचालन, कृषि उत्पादन, रोजगार स्हेङ्बा, छारिब्योन सशक्तिकरणः नेतृत्व विकास, सीपमुलक तालिम थेन छोङनाम्पा ग्युइ, मानदोबा जाडिबुटीग्याम न्होर समृद्धि बाबा दोखाङ थान्बा मुला ।

चु योजनासे गिक्छारेम १३ वटा नाम्सारि ट्रेल ल्हेना लासेला मुला । थेरि ३०६ दिमधुरी ङोन्छाङ लिरि लाभान्वित तासेला मुला । चुरि २० हेन्से ३० वटा सामुहिक होम स्टे संचालन लासि स्थानीयस्तररि ३ करोड बिमा ल्हाना कारोबार लाबारि खाम्सेला सम्भावना मुला ।

(छिगला अर्थः हेराङ– ललितपुर, बेल्बो– असार, ल्हेछ्या– प्रबर्धन, दोखाङ– गन्तव्य/लक्ष्य, न्होरछाबा– आयआर्जन, ख्युरछ्या– संरक्षण, ल्हुइथाङ– स्वास्थ्य, छोङ्नाम्पा– व्यवसायिक, फेल्गेबा– विकास, ङोन्छाङ– प्रत्यक्ष)