याम्बु ३२ बेल्बो । ग्योइखेन्पो अमृत योन्जन तामाङदा ‘ग्योइ ओसेम ग्योइकाइ राष्ट्रिय प्रतिभा पुरस्कार– २०८१’ ग्याम पुरस्कृत थेन डेन ताबा मुला । नेपाल सरकार रिमठिम, पर्यटन ओसेम नागरिक उड्डयन मन्त्रालयसे नारे स्हेङ्बा पुरस्कार फुल्बा समारोहरि थेदा राष्ट्रिय प्रतिभा पुरस्कार पिन्बा थेन डेन लाबा हिन्ना ।

ग्योइ थेन ग्योइकाइ विधारि ह्रेङ्बा दुइहेन्से योगदान पिन्बा बिसि योन्जनदा चु डेन लाबा हिन्ना । ह्रेङ्बा दुइहेन्से तामाङ ग्योइ थेन ग्योइकाइ डोबा, अनुसन्धान ओसेम ब्रिबा थुमरि समर्पित योन्जनला बोगाल सोमसे च्युइ बिमा ल्हाना छ्योइकाले तेबा मुला ।  

चु पुरस्कार नेपाल सरकारग्याम ग्योइ थेन ग्योइकाइ थुमरि ल्हाना योगदान पिन्बा ब्रिखेनकादेदा क्योङ दिङ पिन्बा लामुला । चु दिङ बिसाम योन्जनदा ग्योइ, ग्योइकाइ थेन अनुसन्धान थुमला ह्रेङ्बा योगदान पिन्बा क्योइकाइ लासि डेन लाबा हिन्ना ।

थेसे तामाङ ग्योइ थेन ग्योइकाइला छ्याम नेपालला ल्हानान आमाग्योइ डोबा, अनुसन्धानरि सुताइ सक्रिय गेलासि खाबा मुला । 

योन्जनसे चु पुरस्कार याङ्बा बिबा तामाङ जातला सामुहिक ग्युइ, ङोसेबा थेन अस्तित्वदा राष्ट्रिय तेन्बा पिन्बा हिन्ना । थे पुरस्कृत ताबा तामाङ ग्योइला जेक्खे आताना नेपालला मुतेबा आदिवासी जनजातिकादेला ग्योइ ओसेम ग्योइकाइ तोरथिना लाबाला लागि पिन्बा योगदानला डेन नोन हिन्ना ।

नेपाल ह्राङ्बा ल्हानाग्योइ थेन ल्हाना जातला समाजरि चुह्राङ्बा डेन जेक्खे याखारगि म्हिला डेन आताना मुतेबा समुदायला बाङ्दा तेन्बा गोङ्मा हिन्ना । चुसे आदिवासी जनजातिला छार पुस्ता गुङरि नोन ग्योइ छोरुवा, अनुसन्धान थेन सिर्जनात्मक ब्रिबारिक्यार ङ्हाच्छा वाङ्बा प्रेरणा पिन्सेला मुला ।

थेला डेनदा तामाङजुगु थेन आमाग्योइ अभियन्ताकादेसे सामाजिक संजालग्याम ताङ्बा उन्बा मुला ।

(छिगला अर्थः रिमठिम– संस्कृति, नारे– बिहीबार, तेन्बा– मान्यता)