मेलम्ची नगरपालिकासे हलम्हे न्हाबा ग्यार्जा ङ्हीसे ४० म्हे किसानदा प्रोत्साहन न्होर पिन्जि
सिन्धुपाल्चोक ३ गोने । सिन्धुपाल्चोकला मेलम्ची नगरपालिकासे निबा न्होरपा दिङरि हलम्हे न्हाबा किसानदा प्रोत्साहन न्होर पिन्बा मुला ।
हलम्हे न्हाबा ग्यार्जा ङ्हीसे ४० म्हे किसानदा तोङ्जा ङ्हाला दरसे प्रोत्साहन न्हो पिन्बा नगरग्रेन्पो आइतमान तामाङसे पाङ्जि ।
लिच्छाला दुइरि प्रविधियुक्त ट्यक्टर वाङ्माहेन्से हलम्हे न्हाबा रिम म्हासिकेन निबा बिसि प्रोत्साहन लाबा थेसे पाङ्जि ।
‘बु मोइबा छार प्रविधि खाचिबा मुला, थेसे लामा म्हे न्हाबा रिमनोन म्हाबा दुइ खाबारि खाम्ला । थेतासि नगरपालिकासे हलम्हे न्हाबा किसानदा प्रोत्साहनला नीति किन्बा हिन्ना’, नगरग्रेन्पो तामाङसे पाङ्जि ।
नगरपालिका कृषि फेल्गेबा शाखाला ग्रेन्पो अमरनाथ आचार्यसे अनुदान न्होरला लागि पशु बिमा लाबारि म्होइजेन लाबा पाङ्जि ।
चुह्राङ्लासि बिमा ताबा किसानकादेदा बैंक खाताग्याम थेन बिमा ताबा तासाइ बैंक खाता आरेबा किसानदा भरपाई लासि न्होर पिन्बा थेसे सेताम पिन्जि ।
चु गेताङसे किसानदा प्रोत्साहन जेक्खे आताना प्राङ्गारिक सार केना लासि साप्रा सुधार थेन जैविक ल्होलो ख्युरछ्यारि सुताइ सुधार बासेला अपेक्षा लाबा नगरपालिकासे पाङ्बा मुला ।
(छिगला अर्थः म्हे– गोरु/जना, न्होरपा– आर्थिक, न्होर– रकम, ग्रेन्पो– प्रमुख, फेल्गेबा– विकास, सेताम– जानकारी)
तपाईको प्रतिक्रिया दिनुहोस