याम्बु १४ गोने । आदिबासी जनजाति आयोग थेन नेपाल आदिबासी जनजाति स्योमि गेन्दुनछेन (फोनिज) गुङरि समन्वय थेन छ्यागे लासि आदिबासी मुद्दारि छ्यागे लासि ङ्हाच्छा वाङ्बा नुररि पदाधिकारीजुगु गुङरि सहमति ताबा मुला ।

पुल्चोकरि मुबा आयोगला गेदिमरि तिनि ङ्योइसाङ लाबा काठुइ गेताङरि ङ्ही नोन गेन्दुनला पदाधिकारीगुङ चु सहमति ताबा हिन्ना । आयोगला चोहो रामबहादुर थापा मगरसे आदिबासी आयोगसे लाबा गेदा मिडियाला तिलोग्याम ह्युल्बा गुङरि वाङ्तोबासे लामा फोनिजतेन छ्यागे लाबारि म्हाइबा पाङ्जि ।

फोनिजला उद्देश्य थेन दोखाङ नोन आदिबासी नुरस्हेला पैरवी लाबा थेन यान्पाङ स्हेग्यामसे ह्युल्बागुङरि दोना लाबा मुबासे आयोगसे फोनिजतेन छ्यागे लाबारि म्हाइबा चोहो थापा मगरसे पाङ्जि । आयोगसे लाबा गतिविधि मिडियारि निबारि आखाम्माहेन्से आयोगला गे प्रगति हाप्बा पाङ्जि ।

आयोगला ह्रोमिकादे शरण राई, मिन श्रीसमगर, रिना रानासे नोन फोनिजतेन डिक्सि गेलामा आदिबासीला मुद्दा थेन आयोगसे लाबा गे प्रगति ह्युल्बा थेन सरकारला गुङरि दोसेला विश्वास थान्जि ।

थे दुइसाङरि फोनिजला चोहो लक्की चौधरीसे आयोगतेन डिक्सि गे लाबारि फोनिज तयार मुबा पाङ्जि । फोनिजसे मिडियाला तिलोग्याम आयोगदा ह्रोलाबारि तयार मुबा बिसि थेसे पाङ्जि, ‘आदिबासी जनजातिला सफलताला राप, ह्युलठिमरि सुनिश्चित लाबा याङ्ताम सम्बोधनला लागि पेठिम ठिम स्हेङ्बारि दबाब पिन्बाला छ्याम गेरि ह्याङ्ला छ्यागे थेन ह्रो तासेला मुला ।’

काठुइ गेताङरि आयोगला गाउराइ बुद्ध गुरुङ, फोनिजला पदाधिकारीकादेरि स्यानचोहो अन्जना शिल्पकार, ग्रेनगाउराइ समिर बलामी, गेन्दुनगत गाउराइ सुनिल महर्जन, न्होरचोहो अर्जुनबहादुर तामाङतेन ल्होलोसे बोकिन्बा मुबा ।

थे दुइसाङरि आयोगला चोहो थापा मगरसे छार निर्वाचित फोनिजला पदाधिकारीकादेदा थुजेछे थेन डेन लाजि ।

(छिगला दोनः गोने– साउन, दोन– अर्थ, स्योमि– पत्रकार, गेन्दुनछेन (महासंघ) , छ्यागे– सहकार्य, काठुइ– छलफल, गेन्दुन– संस्था, तिलो– पक्ष, नुरस्हे– विषयबस्तु, यान्पाङ– संचार, स्हेग्याम– माध्यम, हाप्बा– ओझेल भएको, ह्रोमि– सदस्य, ह्युलठिम– संविधान, याङ्ताम– अधिकार, पेठिम– ऐन, ठिम– कानुन, गाउराइ– सचिव, स्यानचोहो– उपाध्यक्ष)