याम्बु २० गोने । नेपाल आदिवासी जनजाति स्योमि गेन्दुनछेन (फोनिज)से नेपाल स्योमि गेन्दुनछेनला स्हेङ्खेनमिला नुरदा जिन्ना लाबारि गेन्दुनछेनला पदाधिकारी थेन ह्रोमिजुगुतेन मिरे काठुइ लाबा मुला ।

गेन्दुनछेनला केन्द्रीय गेदिमरि ङ्योइसाङ लाबा तिलो ङ्हीला काठुइरि गेन्दुनछेनला २७ छा छेजोमछेनसे पिन्बा म्यान्डेट आन्सार त्रिभुवन लोप्खाङ्तेङला क्योङ्यान्पाङ थेन स्योनाम विभाग थेन दोङराप विभाग मुबा खेडोब कार्यदल स्होसि चु नुर टुङ्गो ल्हागाब लाबारि गाइना लाला आदेबा बिसि फोनिज पदाधिकारीसे स्योमि थेन गेन्दुनछेनला पदाधिकारीजुगुला ध्यानाकर्षण लाजि । 

गेन्दुनछेला कार्यबहाक चोहो दिपक आचार्यसे मुतेबाला परामर्श थेन गेन्दुनछेनला २७ छा छेजोमछेनला म्यान्डेट आन्सार ङ्हाच्छा वाङ्सेला ग्रान लाजि । स्हेङ्खेनमिला नुर गम्भीर नुर ताबासे चुरि तोबा काठुइ लासि ङ्हाच्छा वाङ्बारि गेन्दुनछेन तयार मुबा थेसे पाङ्जि ।

गेन्दुनछेनला चोहो निर्मला शर्मा दाते ह्युल माङ्ग्यार मुबासे थे खामाहेन्से फोनिजतेन काठुइ ताबा नुररि ग्रादाङ पिन्ना पाङ्जि । स्हेङ्खेनमि नुर फोनिजला जेक्खे आताना मुतेबा स्योमिला नुर ताबासे मोक्कोन गम्भीर तातोबा थेसे धारणा थान्जि । 

काठुइ गेताङरि फोनिजला ग्रोइपाजुगु गजुरधन राई, खिम घले, मनोज घर्ती, चोहो लक्की चौधरी, ग्रेनगाउराइ समिर बलामीसे ह्राङ्ह्राङ्ला धारणा थान्बा मुबा ।

गेताङरि गेन्दुनछेनला स्यानचोहो नितु पण्डित, उमिद बागचन्द, ग्रेनगाउराइ रामप्रसाद दाहाल, प्रेस चौतारी नेपालला सन्दीप राई, गाउराइ ओसेम जनजाति विभागला ग्रेन्पो सविन प्रियासनसे नोन ह्राङ्ह्राङ्ला धारणा थान्बा मुबा ।

फोनिजसे निबा दुगु २० गते खेन्पो दाछोक स्हेङ्बारि बिसि गेन्दुनछेनला चोहोतेन पदाधिकारीजुगुदा लासोमला अल्टिमेटम पिन्सि ज्ञापनस्यो पिन्बा मुबा । लासोम छ्यासाइ नोन गेन्दुनछेनसे तिगाइ गे आलाबा बिसिमाम फोनिजसे दोसि गेन्दुनछेन पदाधिकारीजुगुतेन काठुइ लाबा हिन्ना ।

(छिगदोनः स्योमि– पत्रकार, गेन्दुनछेन– महासंघ, स्हेङ्खेनमि– संस्थापक, मिरे– मंगलबार, काठुइ– छलफल, तिलो– पक्ष, छेजोमछेन– महाधिवेशन, लोप्खाङ्तेन– विश्वविद्यालय, क्योङ्यान्पाङ– आमसंचार, स्योनाम– पत्रकारिता, खेडोब– अध्ययण, नुर– विषय, ग्रान– प्रतिबद्धता, ग्रादाङ– जानकारी, स्यानचोहो– उपाध्यक्ष, ग्रेन्पो– प्रमुख, दुगु– वैशाख, दाछोक– समाज)