याम्बु २० यान्दे । नेपाल तामाङ घेदुङसे बागमती प्रदेश सरकाररि नियुक्त ब्लोन ङ्ही प्रभात तामाङ (न्होरपा मामिला ब्लोन) थेन कृष्णकुमार तामाङ (थुङक्युइ ओसेम सिंचाइ ब्लोन) दा थुजेछे थेन डेन लाबा मुला । राजधानी याम्बुरि आयोजित गेताङरि तामाङ समुदायला अग्रज, नेताजुगु थेन घेदुङला पदाधिकारीजुगुसे बोकिन्बा मुबा ।

गेताङरि डेन सेमताम पिन्बान नेपाल तामाङ घेदुङला वरिष्ठ स्यानचोहो रामकृष्ण ल्बोनसे तामाङ समुदायला नेताजुगुसे ङोसेबाला नुररि ग्रान किन्सि ङ्हाच्छा वाङ्तोबा पाङ्जि । थेसे बिजि, ‘ह्याङसे ङ्हाच्छा तामाङ जाति बिबा सोंच थान्तोला, थेलिच्छा जेक्खे पार्टीला ङोसेबा खाला । आदिवासी जनजातिला नेताजुगुसे सामूहिक ङोसेबाला मुद्दादा अग्रसरता पिन्तोला बिबारि बाङ पिन्बा मुला ।’

नेपाल तामाङ घेदुङला चोहो मोहन गोलसे पार्टीबिमा फिरि रेसि तामाङ समुदायला नेतृत्वदा एकताबद्ध लातोबारि बाङ पिन्जि । थेसे बिजि, ‘ह्याङ्ला नेताजुगु खात्दामान पार्टीरि मुसाइ नोन चुनावरि ब्रेबा छुट आरे । दारेम मुख्य ब्लोन जेक्खे आहिन, ह्याङ्से ह्युलला काइब्लोन नोन तामाङ समुदायग्याम स्होतोला बिबा दोन्डुप थान्तोला ।’

गेताङरि बागमती प्रदेशला थुङक्युइ ओसेम सिंचाइ ब्लोन कृष्णकुमार तामाङसे ह्राङ तामाङ जातिला प्रतिनिधि जेक्खे आताना समावेशी नेतृत्वला पक्षधर मुबा पाङ्जि । थेसे बिजि, ‘तामाङ जाति खाजिबाइ कोटारि सीमित तासेला आरे । ह्याङ चु ह्युल चलाप लाबारि सक्षम मुला । ह्राङ कमजोर म्हान्बा सोच ख्लासि मोक्कोनदा थुइसि समुदायला हितला लागि गे लाबा ग्रान किन्बा मुला ।’

न्होरपा मामिला ब्लोन प्रभात तामाङसे ह्राङ्ला सेमतामरि जातीय दाःनरि साप्तेन ह्रिबाला बो क्षमता ल्हेनालाबारि बाङ पिन्तोबा पाङ्जि । ‘ह्याङ जाति ताबालान कारण बेनान याङ्तोला बिबा सोचरि आरे’, थेसे पाङ्जि, ‘मुख्यब्लोन बहादुरसिंह लामा तामाङ समुदायग्याम तासाइ नोन थे आप्ता जेक्खे जातीय आप्तासे ताबा आहिन । ह्याङ्ला योग्यता, पार्टी आप्ता थेन कार्यक्षमताला तेन्बाला परिणाम लिस्ह्रुग ताबा हिन्ना ।’

थेसे ङ्हाउला सरकारला आलोचना लाबा सोच आथान्बा पाङ्बान ह्राङ्से इमानदारतापूर्वक ह्राङ्ला जिम्मेवारी निर्वाह लाबा ग्रान उन्पाङ्जि । तामाङ ग्योइ गेदोइला ग्योइला स्ह्रुगरि फेल्गेबा लाबारि मोक्कोनसे डोबा थेन गोतोबारि थेसे बाङ पिन्जि ।

गेताङरि ल्होलो वक्ताजुगुसे तामाङ समुदायला सशक्तिकरण, राजनीतिक बोकिन्बा थेन सांस्कृतिक ङोसेबा ख्यरछ्याला नुररि विचार थान्बा मुबा ।

(छिगदोनः ब्लोन– मन्त्री, यान्दे– भदौ, न्होरपा– आर्थिक, स्यानचोहो– उपाध्यक्ष, ङोसेबा– पहिचान, काइब्लोन– प्रधानमन्त्री, दोन्डुप– लक्ष्य, थुङक्युइ– खानेपानी, दाःन– आधार, साप्तेन– सुविधा, आप्ता– सुविधा, तेन्बा– मान्यता, लिस्ह्रुग– स्वरुप, ङ्हाउ– विगत, ग्रान– प्रतिबद्ध, गेदोइ– कामकाजी, स्ह्रुग– रुप, फेल्गेबा– विकास, ख्युरछ्या– संरक्षण)