कतार । नेपाल प्रवासी तामाङ समाज कतारसे २३ जनवरीला सुङरेकुनु सन् २०२६ ला ता ल्होला दुइसाङरि ल्होछार दाङ्सेला ग्रादाङ पिन्बा मुला । समाजसे ‘तामाङ रिमठिम थेन रिमठिमकि ख्युरछ्या थेन पुस्तान्तरण लागे, तामाङ जातिला ग्रेन ग्याल्साङ प्रिबा मन्जुश्री संवत् २८६२ सोनाम ल्होछार दिमदिमरि दाङ्गे’ बिबा नारादा ङ्हाच्छा ल्हेबा मुला ।

गेताङ २३ जनवरी, सुङरेकुनु अल दोसरी, जु–सहानियाँरि स्ह्योला ११ ङ्ह्यामाहेन्से तिसेला मुला । ग्रादाङ किन्बाला लागि कताररि मुबा तामाङ ज्योज्योआले नानाआङाजुगुसे ५०४५९७७९, ६६१७ ३८३१, ३०९६ १५३० नम्बरजुगुरि सम्पर्क लाबारि खाम्सेला मुला ।

ल्होछारला दुइसाङरि समाजसे ज्याबाम्हान्बा फुल्बाला छ्याम रिमठिमकि गेताङ नोन लासेला मुला । रिमठिमकि गेताङरि कलाकारजुगु सरोज तामाङ, सरला तामाङ, रुस्तम तामाङ, कुमार ओख्रेली थेन श्रृष्टि तामाङसे प्रस्तुती पिन्सेला मुला ।

‘तामाङ जातिला पोबा, ग्युइसेरकि ओसेम न्होरकि कोङ्बा’ बिबा उद्घोष लासि नेपाल प्रवासी तामाङ समाज कतार सन् २००५ रि स्हेङ्बा हिन्ना । गेन्दुन स्हेङ्मा हेन्से तिनिदोना निरन्तर तामाङला ग्योइ, ग्योइकाइ, रिमठिम थेन रिमठिमकि थुमदा तोर थिबारि गेलाचिबा मुला ।  

(छिगकि दोनः सुङरे– शुक्रबार, दुइसाङ– अवसर, ग्रादाङ– जानकारी, रिमठिमकि– सांस्कृतिक, ख्युरछ्या– संरक्षण, ग्याल्साङ– राष्ट्रिय, प्रिबा– पर्व, ग्युइसेर– शिक्षा)