तामाङ ग्योइदा गुगल दोःबा डिछ्यारि बोर्बा दोन्ताछ्याम फेल्गेबा लाबा ग्योइसोमकि मेसिन दोःबा डिछ्याला बेटा संस्करण ठोङ्सेङ लाबा मुला। ग्रेन डोन्बो ओसेम याम्बु विश्वविद्यालय कम्प्युटर साइन्स एन्ड इन्जिनियरिङ सङ्कायला डिन प्राध्यापक मनिष पोख्रेलसे फिच्चा संस्करणला ठोङ्सेङ लाबा हिन्ना।

सुङरे याम्बुरि गोरगिक गेताङ गुङ ठोङ्सेङ लाबा दोःबा डिछ्यारि नेपाली-तामाङ-अङ्ग्रेजी च्योच्यो स्रुगरि दोःबारि खाम्बा डिछ्याला फेल्गेबा लाबा मुला।

दात्तेला लागिरि चु डिछ्यारि गोरब्लि मोडेलकादे समावेश लाबा थेन ला गिकदोःना समुदायलास्तर ओसेम प्रयोगकर्ताकादेग्याम प्रतिक्रिया किन्बालिच्छा सम्भावित थिग्युन ओसेम सुझावकादेला दानरि बेनानबिमा उत्कृष्ट मोडेलदा थुम्ता स्रुग पिन्सि प्रयोगरि बोर्सेदामुला।

बुम गिक नेपाली–तामाङ–अङ्ग्रेजी च्योच्योला वाक्यकादेला ग्योइ डेट समावेश लाबा योजना मुबा दोःबा डिछ्याला दात्ते ठोङ्सेङ लाबा संस्करण बिसाम तोङ्जा २३ च्योच्योला ग्योइ डेटारि आधारित मुला।

याम्बु विश्वविद्यालय कम्प्युटर साइन्स एन्ड इन्जिनियरिङ न्हाङ्ला इन्फर्मेसन एन्ड ल्याङ्ग्वेज प्रोसेसिङ रिसर्च ल्याब (ILPRL)से फेल्गेबा लाबा गुगल ग्योइसोमकि दोःबा डिछ्याला बेटा संस्करण ठोङ्सेङ लाबान ग्रेन डोन्बो प्रोफेसर डा. मनिष पोखरेलसे आमाग्योइकादेला डिजिटल वाङ्बा ओसेम प्रयोगसे ग्युइ उत्पादन, ग्युइसेर थेन प्रविधिरि छार सम्भावनाला म्राप ठोङ्बा धारणा व्यक्त लाजि।

गेताङरि डेन सेमताम थान्बान प्राविधिक टोलीला थुछापा प्रोफेसर डा. बलकृष्ण बलसे नेपाली–तामाङ–अङ्ग्रेजी मेशिन अनुवाद डिछ्याला दातेदोःनाला प्रगति, प्राविधिक तिलो थेन खाबा गेयोजनाफिरि विस्तृत ग्रानाङ पिन्बा मुबा।

गेताङरि याम्बु विश्वविद्यालय कम्प्युटर साइन्स एन्ड इन्जिनियरिङ विभागला ग्रेन्पो डा. पंकज राज दवाडीसे विश्वविद्यालयला तर्फबाट आमाग्योइ प्रविधि फेल्गेबारि निरन्तर ह्रोछ्या ताबा पाङ्बान दोःबा डिछ्यासे बहुभाषिक समाजला दिगो फेल्गेबा थेन विश्वासयोग्य दान तयार तासेला पाङ्जि।

थेराङलासि, स्कुल अफ इन्जिनियरिङला एसोसिएट डिन डा. श्यामसुन्दर खड्कासे डिजिटल ग्योइकि समावेशिता विश्वविद्यालयला प्राथमिकतारि मुबा पाङ्बा मुबा ।

तामाङ ग्योइखेन्पो ओसेम अभियन्ता अमृत योञ्जन तामाङसे तामाङ ग्योइ गुगल दोःबा डिछ्यारि वाङ्बाला लागिरि ग्योइसोमकि दोःबा डिछ्याला फेल्गेबा ल्हानान महत्वपूर्ण उपलब्धि ताबा पाङ्बा मुबा।

गेताङरि त्रिभुवन विश्वविद्यालय ग्योइ विभागला ग्रेन्पो प्राध्यापक बलराम प्रशाईंसे थुजेछे पिन्बान नेपालला ग्योइकादेला ख्युर्छ्या, ल्हेछ्या ओसेम डिजिटल फेल्गेबाला लागि समुदाय ह्राङनोन सक्रिय तातोबा उन्बा मुबा।

थेसे विश्वविद्यालयला व्हानाग्याम तोबा प्राविधिक ओसेम ग्युइसेरकि ह्रोछ्या पिन्बारि सात्तान तत्पर मुबा नोन स्पष्ट लाजि।

गेताङला डा. प्रकाश पौड्यालसे स्याङ्बाला मुबा।

ग्योइसोमकि दोःबाला बेटा संस्करण चु https://tmt.il.pr.ku.edu.np वेबसाइटरि उपलब्ध मुला।