मकवानपुर ६ बेल्बो । माउलिक रिमठिम म्हासिकेन निबारि चुमाहेन्से थेला ख्युरछ्या थेन ल्हेछ्यारि राक्सिराङ गाउँपालिकासे ल्होलो गेताङ स्हेङ्सि छोरुवा बाबा गेलाबारि चुबा मुला । गाउँपालिकासे सुङरेहेन्से मनहरीरि १५ रेला टुङ्ना थेन डम्फु ह्राप्बा गेताङ तिबा मुला ।

तामाङ समुदायला माउलिक ह्रोल्ज्याङ टुङ्ना थेन डम्फु स्होबा ओसेम ह्राप्बा ठिम म्हासिकेन निमाहेन्से थेला ख्युरछ्याला लागि प्रशिक्षण ङ्योइसाङ लाबा गाउँपालिका चोहो राजकुमार मल्लसे पाङ्जि । थेसे छार पुस्तारि ग्युइ आरेबासे लामा माउलिक ग्युइल रिमठिम म्हाबा दुइरि दोबासे चुह्राङ्बा लोप्बा गे प्रभावकारी तासेला विश्वास थान्जि ।

गाउँपालिका ह्रोचोहो बनस्तम थिङसे तामाङजुगुतेन तामाङ ह्रुइ जेक्खे लेङ्बा दुइ खाबासे स्थानीय तह गम्भीर तासि माउलिक ख्युरछ्यारि ल्हागतिबा पाङ्जि । थेसे ल्हाना संख्या मुबा तामाङ चेपाङ चिबा ग्ला राक्सिराङरि चु समुदायला माउलिक व्हाइ ह्रोल्ज्याङ, ग्योइ, गोइलो म्हासिकेन निमाहेन्से थेला ख्युरछ्यारि गाउँपालिका ङ्हाच्छा वाङ्बा सेमताम थान्जि ।

गेताङरि बागमती प्रदेशला ङ्हाच्छाला सांसद ओम घलानसे गाउँपालिकासे रैथाने रिमठिम ख्युरछ्याला लागि प्रशंसानीय गेलाबा बिसि पाङ्जि ।

गेताङरि वडाचोहो उत्तम वाईबा, तामाङ स्योमि गेदुङ बागमती प्रदेशला चोहो ज्ञानेन्द्र तामाङ, स्योनाम शिवकुमार काशीतेन स्यान्दोकादेसे माउलिक रिमठिम ख्युरछ्यारि छार पुस्ता गम्भीर तासि ल्हागतितोबा ताम थान्जि । थेरि स्थानीय सरकारसे ह्रोलाबा ज्याबा ताम हिन्ना बिसि थेन्से पाङ्जि ।

गाउँपालिकासे मनहरीरि मुबा एकेडमिक अर्थ इन्स्टिच्युटतेनला ह्रोगेरि १५ रेला प्रशिक्षण ङ्योइसाङ लाबा हिन्ना । गेताङरि छेवाङ छिरिङ लामासे डम्फु थेन टुङ्ना ह्राप्बारि लोप्सेला मुला ।

गेताङरि राक्सिराङला मुतेबा वडाकादेग्याम छ्योआछ्यो ५० म्हे प्रशिक्षार्थीकादेसे बोकिन्सेला मुला ।

(छिगला अर्थः ख्युरछ्या– संरक्षण, ल्हेछ्या– प्रबर्धन, छोरुवा– जागरण, सुङरे– शुक्रबार, ह्रोल्ज्याङ– बाजा/संगीत, ग्युइल– कला, सेमताम– मन्तव्य, स्योमि– पत्रकार, गेदुङ– संघ, स्योनाम– संचारकर्मी, ह्रोगे– सहकार्य, म्हे– जना)