हेराङ । बौद्ध छारिब्योन कमिटी, हेराङसे स्हेङ्बा ल्हुइथाङ शिविररि भिक्षुु, यान्पाङम्हि, प्रहरी, सांस्कृतिककर्मीतेन २ सय ५० म्हेसे ल्हुइथाङ परीक्षण लाबा मुला ।

थेन्से हेराङला सुरशचन्द्र महाविहार न्हायकंबही महापालरि स्हेङ्बा ल्हुइथाङ शिविररि ल्होलो नोइ सम्बन्धी परीक्षण लाबा मुबा ।

कमिटीसे हेराङ महानगरपालिका १६ ला ह्रोगेरि, अरनिको समाज थेन सम्झना ल्याबोटरी ओसेम क्लिनिकला प्राविधिक ह्रोरि थे शिविर स्हेङ्बा मुबा । शिविररि भिक्षु, यान्पाङम्हि, प्रहरी थेन ल्होलो सामाजिक गेदुङ–गेन्दुङरि गेलाबा म्हिकादेसे बोकिन्बा मुबा । थेह्राङ्नोन लासि ज्याङ थेन नाख्रु नोइला आख्लाना मान चाचिबा नाबा, ज्याङ काक्ता मुबाकादेला परीक्षण लाबा संख्या ल्हानाह्राङ्बा मुबा । थेकादेरि म्रिङ्कोला ४० थेन ह्रेमकोलाला संख्या २ सय १० मुबा ।

शिविररि भिक्षु कौडण्य महास्थविर, अखिल नेपाल भिक्षु गेन्दुनछेनला गाउराइ भिक्षु निग्रोध, पदाधिकारी भिक्षु पञ्जासार, प्रहरी वरिष्ठ उपरीक्षक श्यमकृष्ण अधिकारी, महानगरीय प्रहरी प्रभाग मंगलबजारला प्रहरी निरीक्षक लिलाभक्त वाडे थेन प्रहरी जवान, सामाजिक, सांस्कृतिक थुमरि क्रियाशील म्हिकादे थेन क्योङ सर्वसाधारणला ल्हुइथाङ परीक्षण लाबा कमिटीसे ग्रा पिन्बा मुला ।

कमिटीला गेताङ संयोजक दिनेश शाक्यला आन्सार शिविररि ज्याङ सम्बन्धी नोइला डा. सर्वोत्तम श्रेष्ठ, फो थेन न्हेला डा. सुशील प्रजापति, नाख्रुला डा. शैलेन्द्र महर्जन, ग्लोबा, दम थेन एलर्जीला डा. सुवासचन्द्र यादव थेन जनरल सम्बन्धी नोइला डा. कृष्णगोपाल महर्जनसे परीक्षण लाबा मुबा । शिविररि १ सय ६० म्हेला परीक्षण लाबा मुबा । शिविररि डाक्टरला ग्रोइ आन्सार मान निशुल्क बोलाबा मुबा । थे शिविररि यल नेवाः समाज, हेराङ उद्योग वाणिज्य गेदुङ, नेवाः स्योमि राष्ट्रिय दबू, नेपाल आदिवासी जनजाति स्योमि गेन्दुनछेन (फोनिज), कार्तिक स्याबा ख्युरछ्या समिति बोधिचर्या नेपाल, मंगलमार्ग स्यानह्युल बौद्ध ध्यान केन्द्र थेन हेराङ याग्युइल गेदुङसे ह्रोलाबा मुबा ।

शिविर जिन्बा दुइसाङरि भिक्षु कौण्डन्य महास्थविर, महानगरीय प्रहरी परिसर हेराङला प्रमुख श्यमकृष्ण अधिकारी, वडाचोहो निर्मलरत्न शाक्य थेन कमिटीला चोहो सतिश शाक्यसे शिविररि ल्हुइथाङ सम्बन्धी चेत, सर्वसाधारणदा ल्हुइथाङ क्योन्बाला लागि ह्रोलाबासे ङ्योइसाङ समितिदा थुजेछे पिन्बा मुबा ।

(छिगला अर्थः यान्पाङम्हि– संचारकर्मी, ल्हुइथाङ– स्वास्थ्य, म्हे– जना, हेराङ– लतिपुर, छारिब्योन– युवा, नोइ– रोग, ह्रोगे– सहकार्य, गेदुङ–गेन्दुन– संघसंस्था, ज्याङ– नशा, नाबा– बिरामी, काक्ता– समस्या, गेन्दुनछेन– महासंघ, ग्रोइ– सल्लाह, स्योमि– पत्रकार, गेन्दुनछेन– महासंघ, ख्युरछ्या– संरक्षण, स्यानह्युल– अन्तर्राष्ट्रिय, याग्युइल– हस्तकला, क्योन्बा– उपचार)