एन्ना मिःग्याम थारेङ मुला
तिल्दाबिसाम ङा एनिह्राङ्बा आम्राङ !

ङाइ ज्योमोलुङ्मा बिला
एन्छे सगरमाथा बिला 
ङाइ याम्बु, खोपोङ थेन हेराङ बिला
एन्छे स्यान्दो स्यान्दोन खाइ तिगा तिगा बिला ।

थे ङाला लागि राजधानी आहिन
ङाला लागि थे डान्बा दोङराप हिन्ना 
थेग्याम लस्करनोन ब्राबा मुबा ङाला पुर्खाकादे
हाप्बा मुबा ख्यारख्युरला गाङब्लेजुगु
स्होबा मुबा डम्फु थेन ताम्सालिङ ।

आरानरि फाइ तोचिबा बिसेदा
ङाइ खाइबा बिला ओम लासो लाला
एन्छे कामी बिला ओम छिःछिः लाला 
बगररि गिटी छेक्चिबा हर्क राईदा 
ङाइ सिर्जनशील बिला ओम लासो लाला
सहरला सिसाला झ्यालग्याम च्यासि
एन्छे पटमुर्ख म्योबा मेयर बिला
ओहेइ ! च्यागोम कादे फेबा मुला ह्याङ्ला मिःजुगुरि ?

एन्छे पटमुर्ख म्राङ्जि, ङाइ ल्हे थेन सिर्जनशील म्राङ्जि
एन्छे अछुत म्राङ्जि, ङाइ ल्हे थेन केवा म्राङ्जि
थेन्ना ताप्स्याङ, टोकटोके थेन ग्लिङह्राङ्बा लिरि 
ङाइ ह्युलला लिउ म्राङ्जि थिबा थे याफ्लाजुगुरि 
थेतासि ङा एन्ना मिःग्याम थारेङ मुला ।

ङा साप्रा नासि ग्योइ गोबा कोसिस लाला
छिग छिग आहिन, होङ होङरि थेला 
एन्छे स्यान्दोदा ब्रेसि चिला 
ङाइ पुर्खाला ज्योइनोन ज्योइ दाङ्ला 
दुर्साजुगुरि ङेबा बिरासत सोनालाला 
थेतासि ङा एन्ना मिःग्याम थारेङ मुला !

ङाइ कोल्ठेङ्दा सोझो आबि
ङाइ सोझोदा पेक्केङ आम्हान
ग्याल्छेन ह्रेम्बोर्छेला गोइलो कादे जेबा बिसिमाम
ङाइ खालाइदा लिखन्डि आस्हो
ङा ह्राङ्लान ज्योइल्हामरि मुला
थेतासि एन्ना मिःग्याम ल्हानान थारेङ मुला
तिल्दाबिसाम ङा आत्मडेनला ग्यालामरि मुला
ङा दातेनोन ह्राङ्ला ग्योइरि 
एन्दा ‘ज्याबाम्हान्बा’ बिबा सेम लाला ।

(छिगदोनः हाप्बा– ढाकिएको, ल्हे– श्रम, केवा– जीवन, ताप्स्याङ– ज्यावल/औजार, नासि– सुँघेर, होङ– ध्वनि, ज्योइ– पाइला, ब्रेबा– गिज्याउनु, दाङ्बा– पछ्याउनु, कोल्ठेङ/पेक्केङ– बाङ्गो, ग्याल्छेन– महाराज, ज्योइल्हाम– पदमार्ग, डिक्लाबा– सम्पादन/संशोधन, मिः– नजर)   
 ग्योइडिक्लाबा : यकिना अगाध