चेमो ! सोबाला गाङ्ला न्हान
तिला मुला साङ्ग्युर ?
एदा ह्रुप आताबाइ
ल्हानान दिङ तासि जिन्जिम
एतेन ङाला चेगाइ ङ्हाच्छा
कादे नुब्बा मुबा
रे दाङ्सेन चेगाइ जुमुबा
एला सिल्बारि
दिनिसे क्रोसि खाबा÷निबा दुइरि
एला कुरि लाइनु दोबान
चेगाइ देप्पान दुख सुख न्हाबा मुवा
हिन्ना, चु दुइरि सिसाइनोन
देवाचेन दोला बिमुबा ङाइ
नेबान चुरि सिदासि
देवाचेन दोला ?
बितासि ङोबान
नेना लाबा
लालमाया, कान्छी, म्हेन्दो, कुमारी
गजब, बिष्णु, युवराज, पञ्चमाया
कुन्साङ, अस्टमाया, बोइमो
ल्हुइला ह्याल म्हाइबारि
लोप्खाङ तिलो निमुबा
खाइमा–खाइमा
एदा ख्लाबारि आखाम्ना
लोप्खाङरिन अनिना
एतेन चेगाइ देप्बान
एदा च्याबान
गुच्चा, धाप्पा, खोपी क्लाङ्बान
दुइ थाल्मा लिच्छा
ब्लेरि आम्बल म्हाइबान
दिमरिक्यार दोमुबा
दुइमि गिनोन मुला
स्ह्यो ताला ङ्यासे खाला
ङ्यासे निला स्ह्यो खाला
तासाइ एतेन सात्तान
चेगाइ देप्पा बटुवाकादे
छ्याम ताबारि आखाम्जि
ल्हुइ चलप ताबाला
गोङ्मा ल्हेना–ल्हेना
बेनान खालाङ–खालाङ दोजि
खालाइ छ्याम मुला
खालाइ डान्बारि जेक्खेन
एतेन चेगाइ देप्पा ल्हाम्पाकादे
तिल्दा छ्याम तावारि आखाम्जि ?
एमि सात्तान आकोना चिजि
सात्तान तोङ्जा ल्हाम्पाकादेदा
स्हु न्हाबा न्हान दोजि
दातेइ ए थे ल्हाम्पाकादेदा
सिल्बा पिन्बारि ब्रान्बान मुला
एसे दिनि, नाम, लाबा, लुङसुर
रे म्हुन आबिना
ए फोतोतो बोल्बा दुइरि सुताइ
स्यान्दोदा दुख न्हाबा न्हान
थेन,
सेम न्हाबा ग्ला दोजि
एदा तिला तासि चिबा मुला
तिला थाल्सि चिबामुला बिसि
थे ल्हाम्पाकादेसे खाइमाइ
आङ्योइजि थेन आम्हान्जिनोन
खालाइ सेसि आसेबा स्होजि
खालाइ आसेसाइ सेबा स्होजि
आसेबासे बिमा सेबासे
थारेङ्लासे बिमा ङामलासे
एला टारि चिसि ल्हापगेन्बान
एला टारि फ्याकुरसे
गाल–गाल ताना छ्वासि
एला लि आजेबा ताजिम
क्यरक्युरला म्राकादेसेनोन
एसे सिल्बा पिन्मुबालोम
थाहा याङ्जि बिसि ब्रेबान मुला
एमि कादे नाबारि खाम्बा
ह्राङ सिसि तासाइ
स्यान्दा सिल्बा पिन्खाम्बा
ओम,
ह्राङ्लान कुरि लेप तासि
सेम देप्पाकादेसे
गाल–गाल ताना लामा सुताइ
एमि दातेइ सालिन मुला
एला ग्यालाम ताबान निबा
तिला एतेन छ्यामनो क्लाङ्सि
छार्बा ह्रोकादे
दोखाङ म्हाइबारि निबा
खालाङ–खालाङ दोजि
थे दौतारीकादे
एदा ह्रुप ताबारि खाबा मुला ओम ?
पाक्कान आखाबा मुलाताला
ङामरि मुमा जेक्खेन हिन्ना
ह्राङ्ला उन्बा
जाकि क्याथाङ दोमा ह्यान्दे
सेम गुमाप लाला, सेम पोला
ताम आपाङ
खाबान ख्लाला
एसे सिल्बा पिन्खाम्दे
दोना जेक्खेन हिन्ना
छ्यामनोन ताङ्बा नेबा लाला बिबा
बर्खारि ताइबा नामरि सुताइ
बुबारि आखाम्बा ताबा ह्यान्देम
ल्हाम्पाकादे एतेन छ्याम
सेम देप्पारि ख्लासि जिन्जिम
थे ग्रेन ग्यालामनोन जाजाबा ताजिम
एला रंगानोन जाजाबा ताजिम
जेसुम आजेबा ताजिम
हिन्ना,
ङानोन ए ह्राङ्बान ताजिम
सोबाला गाङ्ला न्हान !
(छिगदोनः चेमो– प्रिय, चेगाइ– माया, नुब्बा– गाढा, सिल्बा– शितल, देवाचेन– स्वर्ग, तिलो– पट्टि/पक्ष, ल्हाम्पा– यात्री, जेसुम– सुन्दर)
तपाईको प्रतिक्रिया दिनुहोस