हिन्ना ङानि तामाङ भोटे हिन्ना,
तासाइ थे जेक्खे मिन आहिन, 
चुमि शताब्दीयौंला बु हिन्ना । 
खाल्दा ल्हागाङला युङ्बासे नोन डान्ना,  
डम्फुला तालरि होङ्बाला पुर्खाला आत्मा हिन्ना ।

ङान्ना अस्तित्व खाजिबाइ दान आहिन,
चु संघर्षसे कोरतिबा प्रमाण हिन्ना ।
का थेन टुला छोनरि,
ङोसेबाला दाज्र्यु फ्याङ्बा दुइ हिन्ना ।

हिन्ना ङानि आदिवासी हिन्ना,
तासाइ थे दोनरि आहिन खाराङ्लासि जाम्बुलिङसे मापन लाल,
ङानिम टा हिन्ना, 
खानाङए दोङरापसे म्लेबारि म्हाइमा नोन 
साप्रासे डान्ना लाला, 
थेग्याम सभ्यता फुइला,
थेला दोन लाबासे गोबा मुला ।

ङान्ना मौनता नोन याखारगि विद्रोह हिन्ना, 
स्हिवा ङेबान्हाङरि बुद्धला दृष्टि ब्योङ्मुला,
ङान्ना विनम्रता कमजोरी आहिन,
चु सन्तुलनला तोच्चमा लि हिन्ना ।

हिन्ना तामाङ भोटे हिन्ना,
थेला ज्याङन्हाङरि ल्होछारला छोन ब्योङ्मुला,
थेला मिरि ल्हागाङला देन्बा झल्काब तामुला,
थेसे ह्राङ्ला मिन उच्चारण लामा 
साजाम्बुलिङसे गर्व लाला, 
मुसे थेला 
चु जनजाति आहिन जेक्खे,
चु दोङरापला सोबा हिन्ना ।

हिन्ना तामाङ भोटे हिन्ना 
ह्राङ्ला ङोसेबारि सोबा,
ह्राङ्ला साप्रारि राप्बा, 
थेन जाम्बुलिङदा गोनालाबा
स्हिवाङला नोन याखारगि काइ ताला
थे स्हिवाङला काइ तामाङला हिन्ना ।

(छिगकि दोनः बु– श्वास, ल्हागाङ– पहाड, होङ्बा– गुन्जिएको, छोन– रंग, ङोसेबा– पहिचान, दाज्र्यु– झण्डा, दोन– अर्थ, स्हिवा– शान्त, तोच्चामा– उच्चतम, ज्याङ– नशा, देन्बा– सत्य, सोबा– जगेर्ना, जाम्बुलिङ– संसार, साजाम्बुलिङ– धर्ती, स्हिवाङ– शान्ति)

दोःबा : यकिना अगाध