ङोसेबा ब्रिचिबा मुला–
एफ.आई.आर. ब्रिउ, म्हि !
धारा ३०२ः सेबा (हत्या)
पीडितमि– ङा ।
ङाला ह्रिदा
एसे बिलासी सोफा स्होजि,
ङाला कुन्हाङरि
एला बुलडोजर वाङ्जि
बिले, बलात्कारह्राङ ।
एला बिजाकादेला छ्योइरि
दारे ताङ्गि आरे,
हतियार मुला–
ओम रापजुगु ?
प्लाष्टिकरि रिल्बा ह्यालला छेन्देकादे जेक्खे मुला ।
एला विकाससे
ङाला झरनाला का सिप्बा मुला–
दारे थेन्छे थेस्वाला
ङ्हाम्बा, क्रोबा क्युइ
बिले खाजिबाइ आमा
ह्राङ्ला सिबा गर्भ ख्रुचिबा मुला ।
ङ्यान्गो !
एला सहरला फ्लाइओभरकादे
ङाला चराकादेला दुर्सा दोबा मुला–
थेरि मुतेबा ङ्यासे
याखारगि काइ
वाला नाङ्साल दिरि सिसि निला ।
ङाला ग्लिङस्योङ
एतेन नाइसि आहिन
ब्लाप्सिमाम म्ह्युचिबा मुला–
एला बेवास्तासे
बिले खाजिबाइ खेप्पाम्हिसे
ह्राङ्ला स्योजुगु आडोना ख्राङ्पिन्ना ।
ए खाइमा बिमानस्थलग्याम थोन्ना
एला परफ्युम
ङाला दोङ्ला लागि
ग्यास चेम्बर हिन्ना ।
एला पाटीला ब्याङ्बा प्लेट
ङाला छ्युरि
प्लाष्टिकला सुइ ह्राङ्बान मुला–
गोल्छेसे, तासाइ निश्चित ।
ओइ म्हि !
एला छिगजुगुरि व्हाइखा मुला
एला गेजुगुरि क्रुरता ।
एसे ङादा न्हाबा पालेरि
क्लेसि ब्याङ्जि ।
तासाइ डान्गो–
दारे ङाला मौनता
हतियार दोबाकेन मुला ।
ङा ङ्हार्सेला आरे
ङा थिसेला मुला–
एला काङफ्लादिरि ।
ओम खाइमा थे थिबाग्याम
एला महलकादे गुर्सेला मुला
थेदुइरि थाहा याङ्ला–
कि साप्रा जेक्खे ग्रह आहिन,
थे आमा दोबा ङ्हाच्छा
याखारगि जामेकोला मुबा
ओम ए
थेला क्योङ्बिमा क्रुर चेमो ।
(छिगला अर्थः बिजा– बच्चा, छेन्दे– लाश, ग्लिङस्योङ– हिमनदी, नाइबा– घृणा, म्ह्युबा– पग्लिनु, स्यो– पत्र, छ्यु– नशा, ङ्हार्बा– गर्जनु, चेमो– प्रेमी)
दोःबा : यकिना अगाध
तपाईको प्रतिक्रिया दिनुहोस