होन प्रभावित थुमला ह्युल्बादा मुख्यलोन्पो बहादुरसिंह लामा तामाङला म्होइजेन
मकवानपुर २५ बेल्बो । बागमती प्रदेशला मुख्यालोन्पो बहादुरसिंह लामा तामाङसे होन प्रभावित रसुवाला छ्याम जोङ्ला म्हिकादेदा दातेनोन जोखिम मुबासे उच्च सतर्कता किन्बारि म्होइजेन लाबा मुला ।
चीनला तिब्बतग्याम खाबा भोटेकोशीला कारण त्रिशुली स्योङरि तिक्खुरि होन खामा रसुवा थेन नुवाकोटरि ग्रेन क्षति तामाहेन्से च्याबारि दोबा मुख्यलोन्पो लामासे चुह्राङ पाङ्बा हिन्ना ।
घटना ताबा ग्ला च्याबारि होन प्रभावित थुम दोबा गोर ङ्हीनोन जोङ्ला प्रहरी थेन प्रशासनतेन थेनआताना समन्वय लाचिबा थेसे ग्रा पिन्जि । थेसे घट्नारि घाइते ताबाला उद्दार, क्योन्बा, राहत थेन म्हाबादा म्हाइबा गे ताजिबा पाङ्जि ।
मुख्यलोन्पो लामासे पाङ्जि, ‘होनग्याम ह्युलधनला ग्रेन क्षति ताबा मुला । त्रिशुलीरि सिङ म्हाइबारि निबा नुवाकोट जोङ किस्पाङ, साल्मे दिम मुबा पाल्देन तामाङ थेन मङ्गली तामाङ खेप्पाखुयुला उद्दारला लागि संघीय सरकारला दिमलोन्पोदा स्याप्सि नेपाली सेनाला हेलिकोप्टर पुइबारि म्होइजेन लाबा लिच्छा ज्याना लासि उद्दार ताबा मुला ।’
चुह्राङ्नोन नुवाकोटला बिदुर नगरपालिका ९ ला त्रिशुली स्योङरि क्युबा स्थानीय पाल्देन तामाङ थेन थेला म्रिङ मङ्गली तामाङ क्योन्चिबा त्रिशुली अस्पतालरि दोसि ल्हुइथाङ नाछालफिरि मुख्यलोन्पो लामा, विदुर नगरपालिका प्रमुख राजन श्रेष्ठ, नुवाकोट प्रमुख जोङ अधिकारी शशीधर घिमिरेला छ्याम सुरक्षा निकायला प्रमुखसे ग्रा किन्बा मुख्यालोन्पो गाउराइदिमसे पाङ्बा मुला ।
चुनोन गुङरि रसुवाग्याम निर्वाचित बागमती प्रदेश सभा ह्रोम्हि प्रभात तामाङसे नेपाल–चीन सीमाङामला थुम रसुवागढीरि तिब्बतला लेन्दी स्योङग्याम खाबा ग्रेन होनसे ताना लाबा क्षतिफिरि स्हु व्यक्त लाबा मुला ।
(छिगला अर्थः बेल्बो– असार, होन– बाढी, जोङ– जिल्ला, म्होइजेन– अनुरोध, जोङ– जिल्ला, ग्रा– सूचना/जानकारी, क्योन्बा– उपचार, क्युबा– फसेको, क्योन्चिबा– उपचारत, नाछाल– अवस्था, गाउराइदिम– सचिवालय, ह्रोम्हि– सदस्य, स्हु– दुःख)
तपाईको प्रतिक्रिया दिनुहोस