सर्लाही २ यान्दे । तामाङ स्योमि गेदुङ सर्लाही शाखासे ३१ छा तामाङ प्रसारण दिङ्साङ ज्याबाम्हान्बा किन्बापिन्बा लासि दाङ्जि । गेताङ सर्लाहीला बागमती नगरपालिका १२ ला काल्साङ छ्योइ खोर्लिङ गुम्बाला ख्राङ्गारि ताबा मुबा ।

तामाङ ग्योइरि विद्युतीय स्हेग्याम तामसोर प्रसारण ताबा रेला डान्बारि तामाङ स्योमिजुगुसे ३१ छा तामाङ प्रसारण दिङ्साङ दाङ्बा हिन्ना ।

रेडियो नेपालग्याम २०५१ यान्दे १ गते रेला ४ ङ्ह्यामाहेन्से ५ मिनेट तामाङ ग्योइरि तामसोर प्रसारण ताबा रेदा क्योङ दिङ तामाङ स्योमिजुगुसे तिनिलान रेरि चु दिङ्साङ दाङ्बा लाबा मुला ।

तामाङ स्योमि गेन्दुन सर्लाहीला चोहो चन्द्रबहादुर जिम्बाला चोहोदानरि ओसेम बागमती नगरपालिकाला कार्यबाहक उपमेयर रुपा बोम्जनला ग्रेनडोन्बो प्रसारण दिङ्साङ दाङ्बा हिन्ना ।

ग्रेनडोन्बो बोम्जनसे तामाङ ग्योइ, रिमठिम म्हासिकेन निबासे चिन्ता व्यक्त लाजि । मुतेबा पालिकातेन समन्वय लासि ग्योइ थेन रिमठिम ख्युरछ्यारि बाङ पिन्बाला छ्याम तामाङ स्योमिजुगुला हितरि ह्रोलासेला ग्रानसुताइ पिन्जि ।

विशिष्ट डोन्बो बागमती न.पा. २ ला टेकबहादुर बलसे तामाङ जातिला धर्म ग्योइ, संस्कार, रिमठिम सोनाकि ख्युरछ्या लाबा दायित्व ह्याङ क्योङला दायित्व हिन्ना बिबान ह्राङ्ह्राङ्ला ग्लाग्याम ज्याबा भुमिका क्लाङ्बारि म्होइजेन लाजि ।

विशिष्ट डोन्बो तामाङ स्योमि गेदुङला संघीय ह्रोमि साङबहादुर लो ‘राजु’ से तामाङ स्योमिजुगुदा नाछाल, दुइसाङ थेन चुनौती नुररि धारणा थान्जि ।

गेताङरि स्यान्दो डोन्बोजुगु बागमती नगरपालिका वडा नं. १२ ला वडाह्रोमि सोम बहादुर गोले, ल्होसुम लामा सेरब, काल्साङ छ्योई खोर्लिङ गुम्बाला ग्रेन्पो लामा पाल्देन दोर्जे लामा, पुर्णबहादुर जिम्बासे बोकिन्बा मुबा ।  

चुह्राङ्नोन लासि लामाजुगु योन्तेन मोक्तान, दिल बहादुर घिसिङ, मदन घिसिङ, लालबहादुर जिम्बा, सन्तबहादुर ब्लोन, बागमती मणिपा आमा दाछोकला गंगा राई योञ्जन, सर्मिला लोतेन स्यान्दो डोन्बोजुगुसे बोकिन्बा मुबा ।

तामाङ स्योमि गेदुङ सर्लाहीला छ्यागाउराइ प्रदिप ब्लोनसे संचालन लाबा गेताङरि डेनसेमताम स्यानचोहो उपेन्द्र गोलेसे थान्बा मुबा ।  

(छिगदोनः यान्दे– भदौ, स्योमि– पत्रकार, गेदुङ– संघ, स्हेग्याम– माध्यम, ख्युरछ्या– संरक्षण, ग्रान– प्रतिबद्धता, ह्रोमि– सदस्य, नाछाल– अवस्था, ग्रेन्पो– प्रमुख, दाछोक– समिति, छ्यागाउराइ– सहसचिव, स्यानचोहो– उपाध्यक्ष)