सिन्धुलीला सम्पदाला काठुइरि स्योमि दीपक श्रेष्ठ थेन ख्युरछ्यामि सौरभ ढकाल
याम्बु १७ यान्दे । सिन्धुली जोङ्ला सम्पदाला नाछाल थेन ख्युरछ्यारि ताबा बाङफिरि याम्बुरि नारे काठुइ स्योल्बा मुला । मार्टिन चौतारीसे ङ्योइसाङ लाबा ‘सिन्धुलीला सम्पदा ख्युरछ्याला चुनाउति’ नुरला काठुइरि स्योमि दीपक श्रेष्ठ थेन सम्पदा ख्युरछ्यामि सौरभ ढकालसे सम्पदा ख्युरछ्याला थुमरि ताबालाबा अनुभव सार्वजनिक लाजि ।
थेन्से सिन्धुलीला ऐतिहासिक दान्सा, मुर्त सम्पदा ख्युरछ्यारि ह्युलमिला बोकिन्बा थेन स्थानीय सरकारला भुमिकाफिरि चर्चा लाबा मुबा ।
यान्पाङ्मि दीपक श्रेष्ठसे दोङरापला ल्होला दुइबोरि स्हेङ्बा सम्पदा नोन दोङरापला छोन्बो प्रमाण ताबासे थेला ख्युरछ्याला छ्याम ह्युलमिला बोकिन्बादा ल्हेना लासिकेन पर्यटन उत्पादनला स्ह्रुगरि फेल्गेबा लातोबारि बाङ पिन्जि ।
थेसे सम्पदा ख्युरछ्याला लागि स्थानीय सरकार, कर्मचारी थेन जनप्रतिनिधिदा स्पष्ट काठाक्बाला छ्याम कानुन स्होतोबारि बाङ पिन्जि ।
ख्युरछ्यामि सौरभ ढकालसे ग्याल्सासे सम्पदा ख्युरछ्याला लागि स्पष्ट नीति पिन्तोबा तासाइ सम्पदाला ख्युरछ्या थेन पर्यटन ल्हेछ्यारि निजि थुम थेन ह्युलमिला बोकिन्बारि बाङ पिन्तोबा पाङ्जि ।
थेसे सम्पदा ख्युरछ्या बिबातेन संरचना स्हेङ्बारि ल्हाना बाङ पिन्बा लाबा तासाइ थेन्हाङ्ला दोङराप, ज्योस्हिङ, रिमठिमला मिहेनत तोसोसे खेडोबा थेन ख्युरछ्यारि ध्यान आपिन्बा पाङ्जि ।
थेसे काठुइरि रेबा ङ्योइबाजुगुला निसाल पिन्बान ह्युलमिसे बोआकिन्ना सम्पदा ख्युरछ्या टुबा आताबा पाङ्जि ।
(छिगदोनः ख्युरछ्या– संरक्षण, नाछाल– अवस्था, ख्युरछ्या– संरक्षण, नारे– मंगलबार, स्योल्बा– सम्पन्न, काठुइ– छलफल, नुर– विषय, स्योमि– पत्रकार, ख्युरछ्यामि– संरक्षणकर्मी, दान्सा– पृष्ठभूमि, यान्पाङ्मि– संचारकर्मी, स्ह्रुग– रुप, फेल्गेबा– विकास, ग्याल्सा– राज्य, ल्हेछ्या– प्रबर्धन, ज्योस्हिङ– कला, तोसो– ढंग, खेडोब– अध्ययण, ङ्योइबा– प्रश्न, निसाल– उत्तर, टुबा– दिगो)
तपाईको प्रतिक्रिया दिनुहोस