याम्बु । तामाङ ग्युइसेरकि अक्षयकोष नेपालसे नेपालला ल्होला जोङरि खेडोब लाचिबा गोरङ्हा लोप्खेनदा छात्रवृत्ति पिन्बा मुला ।

कामरे नेपाल तामाङ घेदुङदा जोम्नाहलरि ङ्योइसाङ लाबा छात्रवृत्ति ओसमे ह्रापह्रुप गेताङरि थे लोप्खेनजुगुदा छात्रवृत्ति पिन्बा हिन्ना ।

छात्रवृत्ति डुप्बा लोप्खेनजुगुरि काभ्रेला विधान रुम्बा, दोलखाला प्रमिला जिम्बा, धादिङला मिनिसा तामाङ, नुवाकोटला लोसाङ तामाङ थेन इलामला समित ग्लान तामाङ मुला । छात्रवृत्ति गेताङला ग्रेनडोन्बो ओसेम घेदुङला चोहो मोहन गोले तामाङसे थेन्दा छात्रवृत्ति पिन्बा मुबा ।

गेताङदा सम्बोधन लाबान चोहो गोलेसे तामाङ घेदुङ इजरायलग्याम तिबा चु अभियान सराहनीय मुबा उल्लेख लाजि । थेसे पाङ्जि, ‘अक्षयकोषसे नेपालला जेहेन्दार थेन न्होरकि स्ह्रुगरि प्राङ्ग्याल लोप्खेनदा सहज स्ह्रुगरि खेडोब लाबारि ह्रो ताना लाबा मुला ।’

चु दुइसाङरि घेदुङला छ्याचोहो कुमार घिसिङ, वरिष्ठ स्यानचोहो रामकृष्ण ब्लोन, स्यानचोहो सन्चु ब्लोन, ग्रेनगाउराइ जगत दोङ थेन इजरायल घेदुङला ग्रोइपा सुन्दर तामाङतेन स्यान्दोसे सम्बोधन लाबा मुबा ।

गेताङरि पेमा पाख्रिन तामाङसे चु गेताङ २०१८ हेन्से चुबा ग्रादाङ पिन्जि । दाते ५० बुमला अक्षयकोष स्होजिन्बा मुला । थेसे चुदा ल्हेना लासि करोड गि दोना लाबा दोन्ता थान्बा ग्रादाङ पिन्जि ।

चुह्राङ्नोन लासि घेदुङसे छार ह्रोमिजुगुदा नोन मनोनयन लाबा मुला । चिसाङसे बिलाम मोक्तान थेन शान्ति तामाङदा ह्रोमिला स्ह्रुगरि मनोनीत लाबा हिन्ना ।

घेदुङ प्रवास शाखासे सक्रिय ह्रोमिजुगुदा नोन औपचारिक स्ह्रुगरि ह्रोमि पिन्बा उन्पाङ्बा मुला ।

गेताङ उर्मिला तामङसे संचालन लाबा मुबा ।

(छिगकि दोनः ग्युइसेरकि– शैक्षिक, लोप्खेन– विद्यार्थी, खेडोब– अध्ययण, डुप्बा– प्राप्त, न्होरकि– आर्थिक, स्ह्रुग– रुप, प्राङ्ग्याल– विपन्न, छ्याचोहो– सहअध्यक्ष, स्यानचोहो– उपाध्यक्ष, ग्रोइपा– सल्लाहकार, ग्रादाङ– जानकारी, बुम– लाख, उन्पाङ्बा– जनाएको)