बहराईन । नेपाल तामाङ घेदुङ, प्रवास गेदाछोक, बहराईनसे चु पाल्छेला सोनाम ल्होछार २३ जनवरी सन् २०२६ ला सुङरेकुनु दाङ्सेला आप्ता लाबा मुला । घेदुङ, बहराईनसे मन्जुश्री सम्बत् २८६२ ला ता ल्होला दुइसाङरि ‘सोनाम ल्होछार सांस्कृतिक ङ्यासे– २०२६’ आयोजना लासि दाङ्सेला मुला ।

डेलमुन होटलला दोख्राङरि ङ्यासेला ६ ङ्ह्यामाहेन्से लामा धर्म गुरुजुगुग्याम छ्योकु लासि ल्होछार गेताङ चुसेला मुला । गेताङरि बोकिन्सेलाजुगुसे ल्हाना ग्रादाङ किन्बारि ३६७२३७४४, ३४४६६४२१, ३६६४१४०८, ३२१८०८४२, ३८०७ ५९५६३ नम्बरजुगुरि सम्पर्क लाबारि खाम्सेला मुला ।

गेताङरि चर्चित कलाकारजुगु काइपा छेवाङ लामा थेन काइमो रेश्मा बम्जनसे रिमठिमकि गेताङरि व्हाइ कोसेला मुला बिसाम छ्यामरि स्थानीय कलाकारजुगुला नोन प्रस्तुती तासेला मुला ।

नेपाल तामाङ घेदुङ प्रवास गेदाछोक, बहराईन सन् २००९ रि स्हेङ्माहेन्से तिनिदोना निरन्तर तामाङजुगुला ग्योइ, रिमठिम, रिमठिमकि, धर्म थेन प्रिबाला ख्युरछ्या, ल्हेछ्या थुमरि गेलासि खाबा गेन्दुन हिन्ना ।

गेताङदा भव्य स्होसि सफल ताना लाबारि आयोजकसे बहराईनरि मुबा ल्होलो गेदुङ–गेन्दुनजुगुला थुछापा, गोछापा, पदाधिकारी, तामाङ ज्योज्योआले नानाआङादा म्होइजेन लाबा मुला ।

(छिगकि दोनः गेदाछोक– कार्यसमिति, आप्ता– निर्णय, दोख्राङ– प्राङ्गण, ग्रादाङ– जानकारी, रिमठिमकि– सांस्कृतिक, ख्युरछ्या– संरक्षण, ल्हेछ्या– संबर्धन, गेन्दुन– संस्था, गेदुङ– संघ, थुछापा– संयोजक, गोछापा– प्रतिनिधि)