छारिब्योन छोङ्नाम थेन समाजसेवी श्यामलाल योन्जनला प्रस्तुतीरि ‘विगतको कुरा’ काइला भिडियो बजाररि सार्वजनिक ताबा मुला । भिडियो सुङरे भक्तपुरला सुर्यविनायकला गिक्खे होटलरि स्योमि जोम्ना लासि सार्वजनिक लाबा हिन्ना ।

मोटिभेटर विकासदेव योन्जनला ग्रेनडोन्बोरि ओसमे माविन योन्जनला चोहोदानरि गेताङ ताबा मुबा ।

गेताङ स्योमि सुदिन दोङसे संचालन लाबा मुबा । गेताङरि कलाकार, स्योमि थेन ल्होलो थुमला म्हिकादेसे बोकिन्बा मुबा ।

‘विगतको कुरा’ चेगाइरि सोबा ङ्हाउला डान्बाजुगुला राप हिन्ना । चु व्हाइसे सम्बन्धरि खिबा तिङ ङ्ही गुङरि दुइसे ताना लाबा थारेङ, चेगाइला अवेशष थेन थेसे स्होबा नुप्बा प्रभावदा कलात्मक तोसोसे प्रस्तुत लाबा मुला । चेगाइरि जेक्खे छ्याम ताबा आहिन, डान्बाला नुप्बारि नोन महत्वपुर्ण ताला बिबा भाव व्हाइसे पिन्ना ।

श्यामलाल योन्जनला छिग, कविन योन्जनला ह्रोल्ज्याङ मुबा चु व्हाइ काइपा ओसेम संगीतकार जोगलाल लामा थेन काइमो जितु लोप्चनसे कोबा मुला ।

चु व्हाइला भिडियो नोन ज्याबा मुला । विकासदेव योन्जनसे निर्देशन लाबा चु भिडियोरि श्यामलाल योन्जन थेन सविता घिसिङला प्रमुख अभिनय लाबा मुला ।

चेगाइला केकेबा थेन स्हेरला संयोजन प्रस्तुत लाबा भिडियोला छायांकन, इडिट थेन कलर कविन योन्जनसे लाबा मुला । ड्रोन क्याप्टेन दावा लामा मोक्तान थेन कोरियोग्राफर उमेश खड्गीसे नोन भिडियोला सौंन्दर्य काप्सि जेना लाबा मुला ।

अडियो एरेन्ज जोगलाल लामासे ओम मिक्सिङ दिपेश प्रधानसे लाबा मुला ।

व्हाइला भिडियो श्यामलाल योन्जनला अफिसियल युट्युब च्यानाल ग्याम सार्वजनिक ताबा मुला ।

(छिगला अर्थः छारिब्योन– युवा, छोनाम– व्यवसायी, सुङरे– शुक्रबार, स्योमि– पत्रकार, जोम्ना– सम्मेलन, चेगाइ– माया, तोसो– ढंग, नुप्बा– गहिरो, ह्रोल्ज्याङ– संगीत, स्हेर– पीडा)