याम्बु । तामाङ समुदायला मौलिक कोसिकेन स्याबा विधा म्हेन्दोमाया व्हाइ चर्चित काइपा राजु लामा थेन रमला पाख्रिनला सुमधुर काइरि बजाररि खाबा मुला । ‘छन्त पारेको’ क्राछिगला चु म्हेन्दोमाया व्हाइ ख्रेला १ गते ल्होछारला दुइसाङरि भिडियोला छ्याम सार्वजनिक लाबा हिन्ना ।

म्हेन्दोमाया तामाङ समुदायरि आउदिन लोकप्रिय साकाइ हिन्ना । विशेष लासि ल्हप्सङकर्पो थुमला नाम्सादिमग्याम तिबा चु भाका बागमती प्रदेश न्हाङ्ला नुवाकोट, धादिङ थेन रसुवा जोङ्ला ल्हानाह्राङ्बा नाम्साजुगुरि कोबा थेन स्याबा लाला । बाप्सा ख्लाबातेन चु भाका स्यान्दो तामाङ नाम्साजुगुरि नोन फेल्बाकेन मुला । राजधानीहेन्से न्हुप थुमदोनाला तामाङ समुदायला मौलिक थेन परम्परागत भाकाजुगु तामाङ ङोसेना लाबारि महत्वपूर्ण तेन्मुला, थेगुङ्ला म्हेन्दोमाया विशेष लोकप्रिय विधा हिन्ना ।

सार्वजनिक लाबा व्हाइला भिडियोरि बोन्पोजुगु ने निबा थेन ने मेलारि म्हेन्दोमाया स्याबा माहोलदा छोन्बो स्ह्रुगरि प्रस्तुत लाबा मुला । भिडियोरि कलाकारजुगु आरम्भ तामाङ, रञ्जिता तामाङ, रमेश तामाङतेन स्यान्दोकादेसे अभिनय लाबा मुला । व्हाइरि काइपा राजु लामासे नोन अभिनय लाबा मुला ।

व्हाइला भिडियो छायांकन ओसेम डिक्लाबा पावन सुस्लिङसे लाबा मुला । रोशन फ्युबाला काठाक्बारि स्होबा भिडियोला स्याबा काठाक्बा प्रतिक ङेस्युरसे लाबा मुला । व्हाइरि छिग थेन ह्रोल्ज्याङ रोशन फ्युबाला मुला बिसाम ह्रोल्ज्याङ थुछाबा दिपेश प्रधानसे लाबा मुला ।

(छिगकि दोनः डिक्लाबा– सम्पादन, काठाक्बा– निर्देशन, ह्रोल्ज्याङ– संगीत, थुछाबा– संयोजन)