‘च्युनि, एला मिन तिला ?’ भोजरि खाबा गोरङ्हि सोम म्हिकादेसे ङ्योइमा तुलबुले थे ब्रुक छ्योङजि– ‘कोपिला’ ।

‘आङा, तिला मिन एला ?’ ग्यामरि म्हेन्दो चुङ्बान लामा गोर्गि म्हिसे ङ्योइजि थेदा । थे जाकि पेजि । जाजाबा काइसे बिजि, ‘कोपिला’ ।

‘ङ्यान्स्युगो ह्या, ह्राङ्ला मिन तिला ?’ ङ्योइबाचा क्योलोलोला छारिब्योन मुबा । आउदि जेबा थेन नोबा ।

थे स्योल पेसि वाला ताजि । लि तोर लाआखाम्जि । थोक्कुसे लि गाप्जि । लिच्छा दार्बा काइरि थेसे बिजि, ‘कोपिला’ । ओतेबा दुइरि थे छारिब्योनला मि ह्वारारि कादे ज्याना सार्सि टिबा म्हेन्दो दोसि थेनताजि ।

‘आरु, तिला मिन हिन्ला ह्राङ्ला ?’ फाराम यारि थोसि टिबा ह्रेमकोलाजुगुसे ङ्योइमा थेदा जोक रेजि । ङ्योइबा तामरि आहिन, थेदा आरु बिसि होइबारि । थाआयाङ्ना थेसे ङामतेरिन च्योथान्बा ऐनारि मि दोना लाजि । फोक्सार्के लाबा थोपोला क्रा थेन रुप्पा ङ्होरि कासाल मुबा । थेसे ह्राङ्ला ङोसेबास्यो (परिचयपत्र) उन्जि । ह्रेमकोलासे मिन डोजि, ‘कोपिला’ ।

दिमरि ह्राङ्लान चाउरासिला भोज मुबा । लादा छ्योकु फुल्सि लिच्छा थे कोठारिचे तिला टिमुबा, जात्तुकुकादेला हुत्तागि थेरि दोकाजि । ‘माम ब्लाप्पा मुला, स्हु (दुःख) आपिनो ।’ माम खुयुला कोलासे सुङ्जि । ‘आता, ङानि मामतेन नोन टिबारि, मामतेन नोन टिबारि ।’ बेनासेन रेमगिरि पाङ्जि ।

‘ताला, ताला । काच्याउलि चा आलाउ दाबे । गोल्छेसे ताम पाङो ।’ जात्तुकुकादेदा ह्वाम्सि माम खुयुला कोलाचा फिग्र्याप थोन्जि । ‘माम, ह्राङ्ला मिन तिला ?’ सोमदिङ्ला छुयासे थेला रुप्पा या साम्बान ङ्योइजि । थेसे दोक्छेबिमा ङ्हाच्छाम थेनोन आथेनि । सोफाथोरि क्रेसि छुयासे न्हाबेङरि पाङ्माका था ताजि ।

खुयु दोसिन मुताला, थे म्लेबा ह्रिक्पाला ताबा । थेराङ्बान मुबा थेला ह्रिक्पा । कादे गाइना डान्बारि म्हाइजि, थेसे ह्राङ्लान मिन नोन डान्आखाम्नि ।

दोबा : इश्वर थोकर