याखारगि नाम्सारि गिक्खे किसमा चिबा लामुबा, थेसे ङ्हेग्याम दही थेन म्हार स्होसि चुङ्बा गे लामुबा ।

तिरेकुनुथेला म्रिङ्से चुङ्बाला लागि म्हार स्होसि पिन्जि । किसमा ह्राङ्ला नाम्सा ग्याम शहररिक्यार निजि । किसानला म्रिङ्से गेङह्राङ्बा क्वारक्वार लासि म्हार स्होबा मुबा ओम मुतेबा म्हारला प्लेन किलो गिला क्योइबाला मुबा ।

शहररि दोसि किसानसे थे म्हार सातानह्राङ याखारगि छोङ्म्हिदा चुङ्बा मुबा, ओम छोङ्म्हिग्याम चियापति, चिनि, छ्युकु थेन साबुन ल्होलो ग्लुसि ह्राङ्ला नाम्सारि दोसि निजि ।

किसान दोसि निमाहेन्से–

छोङ्म्हिसे म्हार फ्रिजरि थान्बारि चुजि .... थेदा सेमतेन खाजि– ‘तिर्याम चु प्लेन गि क्योइसि च्यातोजि !’ क्योइमा थे प्लेनमि जेक्खे ९०० ग्रामला जेक्खे चिम । अचम्म थेन निराश तासि थेसे मुतेबा म्हारला प्लेनकादे क्योइजि । मुतेबा ९०० ग्रामलान मुबा ।

स्यान्दो हप्ता दोसि किसान म्हार बासि साताह्राङ छोङ्म्हिला छोङ्खाङरि दोगाजि । छोङ्म्हिसे क्रिङ्सिकेन पाङ्जि, ‘ह्यार्गो चुग्याम । बेइमानी लाबा म्हितेन ङा कारोबार आला ।’

थेलिच्छा झान बाङ्से क्रिङ्जि, ‘९०० ग्राम म्हारदा किलो गि बिसि चुङ्बा एह्राङ्बा धोकेबाजला ङादा लिनोन च्याबारि सेम आरे ।’

किसानसे विनम्र तासि निसाल दोजि–

‘ह्रेम्बोरछे ! फ्यास्हिङ मुला । बोमो आहास्ह्युगो । ङानिम प्राङ्बो, ग्युइसेर आरेबा, म्हि । ङान्तेन क्योइबाला लागि उमाल ग्लुबा हैसियत आरे । ङाइमि ह्राङ्ला छोङ्खाङ ग्याम किलो काकारला चिनि ग्लुसि बोर्मुला ओम थेनोन चिनिदा तिलो गिक थान्सि स्यान्दो पट्टि ओतेन च्योच्योला म्हार क्योइबा लामुला ।’

(छिगला अर्थः छोङ्म्हि– व्यापारि, सेमतेन– विचार, छोङ्खाङ– पसल, निसाल– उत्तर, ग्युइसेर आरेबा– अशिक्षित, उमाल– तराजु)

(हिन्दी साराप)