हेराङ । कोन्ज्योसोम गाउँपालिकासे न्होर दिङ २०८२।८३ ला नीति ओसेम गेताङ थेन बजेट प्रस्तुत लाबा मुला । गाउँपालिकाला १६ छा छोजोमसे नीति ओसेम गेताङ थेन बजेट प्रस्तुत लाबा हिन्ना ।

गाउँपालिका चोहो कृष्णमान लामासे नीति ओसेम गेताङ थेन स्यानचोहो राजनप्रसाद घिमिरेसे बजेट प्रस्तुत लाबा हिन्ना । न्होर दिङ २०८२/८३ ला नीति ओसेम गेताङ प्रस्तुत लाबान गाउँपालिका चोहो लामासे स्थानीय ह्युल्बाला असीमिति अपेक्षा थेन सीमित स्रोत साधनला गुङग्याम खाम्देदोना प्रभावकारी थेन टुबा गेताङ कार्यान्वयन लासेला पाङ्जि ।

जोम्नारि स्यानचोहो राजनप्रसाद घिमिरेसे ४५ करोड ५९ बुम ७६ तोङ्जाला गेताङ ओसेम बजेट प्रस्तुत लाजि । जोम्नासे १० बेल्बो मिरेरिन नीति ओसेम गेताङ पारित लाजिन्बा मुला बिसाम काठुइला प्रक्रिया जिन्ना लासि १६गते बजेट पारित लासेला मुला ।

गाउँपालिकाला न्होर फेल्गेबाला थुमकादे कृषि, पर्यटन, उद्यमशीलता फेल्गेबाला छ्याम ल्होलो थुमरि प्राथमिकता पिन्बा मुला । निबा म्हेनिङरि निबा होनला कारण खाबा विपद् लिच्छाला पुननिर्माणदा प्राथमिकतारि थान्बा मुला ।

जोम्नारि गाउँपालिकासे ह्राङ्ला माउलिक लोगो सार्वजनिक लाबा मुला । मिरे गाउँपालिकाला चोहो कृष्णमान लामा थेन स्यानचोहो राजनप्रसाद घिमिरेसे संयुक्त लिरि लोगो सार्वजनिक लाबा हिन्ना ।

(छिगला अर्थः बुम– लाख, तोङ्जा– हजार, न्होर– आर्थिक, छा– औं, छोजोम– अधिवेशन, स्यानचोहो– उपाध्यक्ष, टुबा– दीगो, जोम्ना– सभा, बेल्बो– असार, फेल्गेबा– विकास, म्हेनिङ– असोज, होन– बाढी)