सिन्धुपाल्चोक । इन्द्रेश्वरी माध्यमिक लोप्खाङ मेलम्चीसे ५२ छा दिङ्साङ ओसेम २६ छा अभिभावक जोम्बा दाङ्बा मुला । गेताङ ठ्वाङ्सेनरि मेलम्ची नगरपालिकाला ग्रेन्पो आइतमान तामाङ, स्यानग्रेन्पो उमा प्रधान थेन ङ्हाच्छाला ब्लोन इन्द्रमाया गुरुङतेन स्यान्दोजुगुसे बोकिन्बा मुबा ।  

गेताङदा सम्बोधन लाबान बक्ताजुगुसे गुणस्तरीय ग्युइसेरला लागि मोक्कोनला प्रयत्न जरुरी मुबा पाङ्जि । याखारगि तिलोसे जेक्खे ग्युइसेर थिग्युन आताबा ताबासे अभिभावक, लोप्बोन, लोप्खेन थेन सरोकारवालाला छ्यागेसे जेक्खे गुणस्तर कायम लाबारि खाम्सेला पाङ्जि ।

गेताङला दुइसाङरि ग्युइसेर, सामाजिक साप्तो थेन लोप्खाङ्ला मुतेबा फेल्गेबारि उल्लेखनीय योगदान पिन्बा लोप्बोन ओसेम ह्रोलाबा म्हिजुगुदा डेन लाबा मुबा ।

गेताङला ग्रेनडोन्बो, लोप्खाङ डिछ्याबा दाछोक थेन अभिभावकजुगुला बोकिन्बारि स्योल्बा काप्तोनरि उत्कृष्ट ग्युइसेरकि डुप्ना लाबा लोप्बोनजुगुदा विशेष डेन लाबा लोप्खाङसे ग्रादाङ पिन्बा मुला ।

गेताङरि ग्याल्साङ परीक्षा बोर्डग्याम सञ्चालित वि.स. २०८१ दिङ्ला माध्यमिक ग्युइसेर परीक्षा (डा १०) रि उत्कृष्ट नतिजा पिन्बारि सफल लोप्बोनजुगुदा डेन लाबा मुबा ।

लोप्बोन ठाकुरप्रसाद पौडेलदा प्राविधिक धारव्हना नेपाली नुररि औसत जीपी ३.५० ला छ्याम उत्कृष्ट नतिजा पिन्बा बोरि डेन लाबा मुबा । लोप्बोन लेखनाथ भट्टराईदा साधारण धारव्हना सामाजिक खेडोब नुररि औसत जीपी ३.१० ला छ्याम उत्कृष्ट नतिजा पिन्बा बोरि डेन लाबा मुबा ।

गेताङरि मेलम्ची नगरपालिकाग्याम सञ्चालित डा ८ ला दानस्हि तह उत्तीर्ण परीक्षारि रमेशबहादुर घलेसे सामाजिक खेडोब ओसेम मानवमूल्य ग्युइसेर नुररि औसत जीपी ३.२१ ला छ्याम उत्कृष्टता प्रर्दशन लापुङ्बा बोरि डेन लाबा मुबा ।

गेताङरि लोप्खाङ्ला लोप्खेनजुगुदा ह्रोलाबा श्रीदेवी ट्रेड एण्ड सप्लायर्स, मेलम्चीला प्रोपाइटर जनकलाल श्रेष्ठदा डेन लाबा मुबा । थेसे लोप्खाङ्ला दानस्हि तहला लोप्खेनजुगुला लागि ट्रयाकसुट ह्रो लाबा मुबा ।

बिनोद नेपाल फाउन्डेसनला चोहो डा. गङ्गादत्त नेपालदा लोप्खाङ्ला प्राविधिक धाररि खेडोब लाचिबा लोप्खेनजुगुदा छात्रवृत्ति पिन्सि न्होरकि स्ह्रुगरि ह्रोलाबा बोरि डेन लाबा मुबा ।

गेताङरि दीर्घकालीन शिक्षण साप्तोग्याम योगदान पिन्सि अनिवार्य अवकाश किन्बा कमला कुमारी नेपाल (चालिसे)दा डेनस्यो पिन्सि डेन लाबा मुबा ।

गेताङरि लोप्खाङला नर्स मनिषा भण्डारीदा नोन डेन लासि बिदाइ लाबा मुबा ।

गेताङरि स्योमि दिपक खत्री थेन विजय नेपालदा हुतराज–अर्धचन्द्र पाण्डे स्योनाम डान्बा पुरस्कार– २०८१ ग्याम डेन ताबा मुबा । थेन्दा तोङ्जा ङ्हा न्होर नोन पिन्बा मुबा ।

ग्योइकाइ थुमरि योगदान पिन्बा राजेन्द्र प्रसाद भट्टराईदा ‘रापी बसिष्ठ’दा डेन लाबा मुबा । शिक्षण नामग्याम योगदान पिन्बा इन्द्रेश्वरी माविला लोप्बोन कृष्ण श्रेष्ठदा नोन डेन लाबा मुबा ।

गेताङरि लोप्खाङ्ला प्रधानाध्यापक देवी श्रेष्ठसे प्रतिवेदन प्रस्तुत लाबा मुबा । लोप्खाङ डिछ्याबा दाछोकला चोहो सानीमैया पण्डितला चोहोदानरि गेताङ ताबा मुबा ।

(छिगकि दोनः दिङ्साङ– वार्षिक, काप्तोन– उत्सव/समारोह, दाङ्जि– मनायो, जोम्बा– सभा, ग्रेन्पो– प्रमुख, स्यानग्रेन्पो– उपप्रमुख, ब्लोन– मन्त्री, ग्युइसेर– शिक्षा, ग्युइसेरकि– शैक्षिक, तिलो– पक्ष, थिग्युन– सुधार, छ्यागे– सहकार्य, साप्तो– सेवा, फेल्गेबा– विकास, डिछ्याबा– व्यवस्थापन, दाछोक– समिति, स्योल्बा– समापन, डुप्बा– प्राप्ति, ग्रादाङ– जानकारी, ग्याल्साङ– राष्ट्रिय, लोप्बोन– शिक्षक, लोप्खेन– विद्यार्थी, व्हना– तर्फ, नुर– विषय, खेडोब– अध्ययण, डा– कक्षा, दानस्हि– आधारभूत, न्होरकि– आर्थिक, स्ह्रुग– रुप)