याम्बु २१ बेल्बो । नेपाल तामाङ संघ, याम्बुला चोहोरि सशीकर तामाङ निर्विरोध निर्वाचित ताबा मुला । बेल्बो २१ गते ताबा जोम्नासे तामाङदा क्योङ्डिक्स दाम्बा हिन्ना । तामाङ संघ नेपाली कांग्रेस पार्टीला भातृ संगठन हिन्ना ।

कार्यसमितिला स्यानचोहोजुगुरि झलक तामाङ थेन सावित्री लो तामाङ मुला बिसाम गाउराइरि सोहिल तामाङ, छ्यागाउराइरि प्रमोद तामाङ मुला ।

कार्यसमितिला ह्रोम्हिरि फुलमाया तामाङ दाम्बा मुला बिसाम स्यान्दो ह्रोम्हिकादे जोङ्ला ल्होलो थुमग्याम समावेश लासेला मुला ।

जोम्नासे प्रतिनिधिसभा थुम नम्बर ३ ला चोहो बुद्धमान लामा, थुम नम्बर ५ ला चोहो सुमन तामाङ, थुम नम्बर ६ ला चोहो राजकुमार तामाङ, थुम नम्बर ७ ला चोहो नविनकुमार तामाङ, थुम नम्बर ९ ला चोहो सोमबहादुर तामाङ दाम्बा मुला ।

रणबहादुर तामाङला चोहोदानरि ताबा छेजोमला ग्रेनडोन्बो नेपाली कांग्रेसला केन्द्रीय ह्रोम्हि ओसेम ङ्हाच्छाला लोन्पो दिलमान पाख्रिन मुबा ।

विशिष्ट डोन्बोकादेरि तामाङ संघला केन्द्रीय चोहो रामकृष्ण ब्लोन तामाङ, संघला केन्द्रीय ह्रोम्हि बिलाम मुक्तानतेन स्यान्दो पदाधिकारीकादे मुबा ।

गेताङरि ग्रेनडोन्बो दिलमान पाख्रिनसे तामाङ संघसे जातीय, सांस्कृतिक थेन सामाजिक ल्हेछ्या लासि तामाङ समुदायला भावनादा पार्टीला केन्द्रदोना दोना लाबारि गेलातोबा सेमताम थान्जि ।

विशिष्ट डोन्बो रामकृष्ण ब्लोनसे संगठन उन्बा स्हे आस्होना सेमन्हाङ हेन्से समर्पित तासि ल्हागतितोबा ताम थान्जि । थेसे संगठनरि मुबाकादेसे नेतृत्व फेल्गेबा लाखाम्तोबा ओम संगठनदा परिणाममुखी स्होखाम्तो तामरि बाङ पिन्जि । 

तामाङ समुदायला वरिष्ठ नेता बिलाम मुक्तानसे तामाङ संघ २०६३ दिङला दुगुरि थेदुइला काइब्लोन गिरिजाप्रसाद कोइरालासे तामाङजुगुदा छोरुवा बाबारि ठ्वाङ्बा ताम थान्जि । तासाइ तामाङ संघ ह्रेङ्बा दुइदोना निष्क्रिय तामाहेन्से थे तदर्थ समितिदा विघटन लासि दातेला चोहो रामकृष्ण ब्लोनला चोहोदानरि छार कार्यसमिति स्होबा मुबा । चु तामदा डान्बाकेन मुक्तानसे बिजि, ‘तामाङजुगुदा याङ्ताम पिन्बारि दारे चु संघ सक्रिय तानोन तोला । निष्क्रिय चिला आदे ।’

थेसे दाते तामाङ संघ ह्युलनाङ ल्हेसिनिबा ताम थान्जि । ‘दाते तामाङ संघसे ४० जोङरि छेजोम लाजिन्बा मुला बिसाम प्रदेश १ ला छेजोम ताजिन्बा मुला ।’ मुक्तानसे पाङ्जि, ‘चु तामाङ समुदाय थेन नेपाली कांग्रेसला लागि गौरवला नुर हिन्ना ।’

(छिगला अर्थः बेल्बो– असार, क्योङ्डिक्सि– सर्वसम्मत, जोम्ना– भेला, स्यानचोहो– उपाध्यक्ष, छ्यागाउराइ– सहसचिव, छेजोम– अधिवेशन, ल्हेछ्या– संबर्धन, फेल्गेबा– विकास, काइब्लोन– प्रधानमन्त्री, छोरुवा– जागरण, दुगु– वैशाख, ल्हेबा– विस्तार, जोङ– जिल्ला, नुर– विषय)