याम्बु, २३ बेल्बो । काठाक्पा अभि लामाला काठाक्बारि नेपाल ह्रोल्ज्याङ देन नाट्य–प्रतिष्ठानसे गोरनि म्युजिक भिडियो सार्वजनिक लाबा मुला ।

नेपाल ह्रोल्ज्याङ देन नाट्य–प्रतिष्ठानसे मिरे प्रतिष्ठानला गेदिमरि स्हेङ्बा गेताङरि लामाला काठाक्बारि ‘तीते तीते’ थेन ‘लहबिरे भाका’ ह्वाइला म्युजिक भिडियो सार्वजनिक लाबा हिन्ना । ‘तीते तीते’ ह्वाइरि काइमो शान्तिश्री परियारला काइ मुला बिसाम छिग प्रकाश सापकोटाला हिन्ना । ह्वाइरि महेश खड्काला ह्रोल्ज्याङ मुला । भिडियोरि कलाकारकादे बिना राउत, अलि तामाङ थेन राजु वाइबा मुला ।

ओराङ्लासि ‘लहबिरे भाका’ ह्वाइरि लाहाङ सुब्बाला ह्रोल्ज्याङ मुला । चु व्हाइ काइपाकादे परेश राई, तेजकुमार राई, काइमो इन्द्रकला राई, मनमाबी राई थेन रश्मी राईले कोबा मुला । लहबिरे स्यार ल्हाला ओखलढुङ्गा जोङ्ला बायुङ, थुलुङ थेन वाम्बुले समुदायसे कोसि खाबा तासाइ म्हासिगेन निबा भाका हिन्ना ।

प्रतिष्ठानसे ‘गणतन्त्र दिवस २०८१’ला दुइसाङरि साह्वाइ ब्रिबा प्रतियोगिता गेताङरि ह्युलला क्योङ्दान बोकिन्बारि ङ्योइबा मुबा । मिरे स्हेङ्बा गेताङरि प्रतिष्ठानसे निस म्हे प्रदेशग्याम दाम्सि डाबा ह्वाइकादेला अडियो नोन सार्वजनिक लाबा मुला ।

कोशी प्रदेशग्याम दाम्बा तेजकुमार राईला छिगरि महेश खड्काला ह्रोल्ज्याङ मुला । चु व्हाइ काइपा सन्दीप पनेरु थेन काइमो प्रिया पोखरेलसे कोबा मुला ।

मधेश प्रदेशग्याम लिलाराज दाहालला छिगदा बसन्त सापकोटासे ह्रोल्ज्याङ युबा मुला । चु व्हाइ काइपा प्रल्हाद तिमिल्सिना थेन काइमो मनिषा सुनारसे कोबा मुला ।

बागमती प्रदेशग्याम सृजना अर्यालला छिगदा शान्तिराम राईसे ह्रोल्ज्याङ युबा मुला । चु व्हाइ काइपा रोशन राईसे कोबा मुला । 

ओराङ्लासि लुम्बिनी प्रदेशला बसन्तकुमार आचार्यला छिगदा काइपा आशिष अविरलसे कोबा मुला बिसाम ह्रोल्ज्याङए आशिष अविरलला मुला ।

सुदूरपश्चिमला धिरन नाथला छिगदा शान्तिरामसे ह्रोल्ज्याङ युबा मुला बिसाम काइपा रोशन राईसे कोबा मुला ।

गण्डकी प्रदेशला बाबुराम श्रेठला छिगदा श्रीकृष्ण बम मल्लसे ह्रोल्ज्याङ युबा मुला । चु व्हाइ काइमोकादे लक्ष्मी मल्ल, सारिका घिमिरे, उषा गजुरेल थेन काइपा योगेश काजी शाहसे कोबा मुला ।

गेताङला चोहो ओम प्रतिष्ठानला कुलपति निशा शर्मासे क्योङ्दान डेन लाबा मुला । कुलपति शर्मासे ह्युल्सा सोना थेन ल्हेना लादोला बिबा सेम छोरुवा बाबारि म्युजिक भिडियो थेन  ह्वाइकादे  रेकर्ड लाबा पाङ्जि ।

प्रतिष्ठानला उपकुलपति शम्भु राईसे फिरग्यापह््युलला रिमठिमसे नाङ्बाकेन मुबा ह्याङ्ला नेपाली रिमठिम ल्हेछ्या थेन ख्युरछ्या लासि चुदा सोना लाबारि क्योङ्दान छोरुवा बाबारि क्योङ्नोन गिक्खे तादोबा पाङ्जि । राईसे सार्वजनिक ताबा म्युजिक भिडियो थेन अडियो ह्वाइकादे प्रज्ञा–प्रतिष्ठानला अफिसियल युट्युव च्यानलरि च्याबारि क्योङ्दान म्होइजेन लाजि ।

प्रतिष्ठानला ह्रोम्हिगाउराइ कुुश्मा महरा ‘प्रगति’से न्होर डिक्छ्या लासि अडियो रेकर्ड लाबा निस म्हे ह्वाइकादेला नोन भिज्युल बाबारि ग्रान पिन्जि ।

गेताङरि प्रतिष्ठानका म्हेन्दो ब्लि कर्मचारीकादे अधिकृत स्तरला प्रदीप गुरागाईं, प्रविन सापकोटा, ध्रुव वाग्ले थेन नायब सुब्बा जगदीश सापाकोटादा डेन लाजि ।  

(छिगला अर्थः काठाक्बा– निर्देशन, काठाक्पा– निर्देशक, ह्रोल्ज्याङ– संगीत/बाजागाजा, देन– तथा, मिरे– मंगलबार, गेदिम– कार्यालय, थेन– र, स्यर– पूर्व, ल्हा– पहाड, जोङ– जिल्ला, साव्हाइ– लोकगीत, म्हे– जना, ल्हेछ्या– संबर्धन, खुरछ्या– संरक्षण, म्होइजेन– अनुरोध, ह्रोम्हिगाउराइ– सदस्यसचिव, ग्रान– प्रतिबद्धता)