याम्बु । श्री बुद्धोदय माविला गिक्छा, ङिच्छा थेन सोम्छा व्याचला एस.एल.सी.लोप्बोन गोछापा थेन थे दुइला गुरुकादेतेनला ह्रापह्रुप गेताङ थुम्बा मुला ।
बेने २ कुनु जार्सिङपौवारि मुबा चैत्य रिसोर्टरि सिन्धुपाल्चोक लिसंखु पाखर गाउँपालिका वडा नं. २ लिसंखुरि मुबा श्री बुद्धोदय माविला गिक्छा (२०४९), ङिच्छा थेन सोम्छा व्याचला एस.एल.सी.टोलीसे ह्रापह्रुप गेताङ स्हेङ्बा हिन्ना ।
गेताङरि गुरुजुगु बीरसिं साउद (बैतडी), राम प्रसाद चिमरिया (दोलखा), लोक बहादुर वाइवा (काभ्रे), शम्भु विक्रम लामा (काभ्रे), इन्द्र बहादुर श्रेष्ठ (लिसंखु), हेमगंगा मोक्तान (लिसंखु) थेन जीवन कुमार योन्जन (लिसंखु) से बो किन्बा मुबा ।
गुरु थेन चेलागुङरि पुर्नमिलन लाबा दोन्तासे स्हेङ्बा थे गेताङरि स्थानीय बिमा स्ह्यान गुरुजुगुतेन छ्योआछ्यो च्युइ सोमसे न्हि (३२) दिङलिच्छा ह्रुप तामा कादे मि लोप्खेन थेन लोप्बोनकादे गुङरि ङोसेबारिन काङाल ताबा मुबा बिसाम ल्हानान ह्राङ्बा भावुक ताबा मुबा ।
गिक्छा व्याचला लोप्बोन धर्मलाल लामाला चोहोदनरि ताबा गेताङरि बो किन्बा गुरुजुगुदा चेगाइला चिनो, गा थेन खादाग्याम डेन लाबा मुबा । थेनोन ताङरि गुरुजुगुसे बुद्धोदय मावि थेन थे नाम्सारि मुमा थेग्याम लोप्पा अनुभव थेन ह्राङ्से लोप्पा लोप्बोनकादे दान्दे ल्होलो ल्होलो तादा थेन तप्काकादेरि दोमा ल्हानान सेम ताङ्बा थेन चु तोसोला गेताङसे लोप्खेन थेन लोप्बोनकादे गुङरि पुर्नमिलनला गे ताबासे खाइमाइ म्लेबारि आखाम्बा पाङ्बा मुबा ।
चाबा थुङबा, स्याबागोबालाछ्याम बो किन्बा लोप्बोनजुगुसे नोन ह्राङ्ह्राङ्ला अनुभवकादे बो लाबा मुबा ।
तपाईको प्रतिक्रिया दिनुहोस