याम्बु २४ बेल्बो । गण्डकी प्रदेशरि मंगर थेन गुरुङ ग्योइदा सरकारी गेदोइ ग्योइला लिरि तेन्बा वियेक संसद्ग्याम पारित ताबा मुला । मिरेला प्रदेशसभा चिसाङसे गण्डकी प्रदेशरि मंगर थेन गुरुङ ग्योइदा सरकारी गेदोइला ग्योइला लिरि प्रयोग लाबा सम्बन्धरि डिछ्या लाबारि स्होबा विधेयक क्योङ्डिक्सि पारित लाबातेन चु ङ्ही ग्योइसे सरकारी गेरि तेन्बा याङ्बा हिन्ना ।

विधेयक प्रदेश प्रमुख ग्याम प्रमाणीकरण तासि ग्यालस्योरि तेबा लिच्छा लागु तासेला मुला । थेलिच्छा विधेयक तयार लामा, मन्त्रिपरिषद् चिसाङरि प्रस्ताव पेस लामा ङ्ही नोन ग्योइरि दोसिः पेस लातोबा ताला ।

सरकारी गेदिमरि चिबा सार्वजनिक दस्तावेज नोन दोसिः अभिलेखीकरण लाबारि खाम्बा, प्रदेश ग्यालस्यो नोन गोर ङ्ही ग्योइरि तेबारि खाम्बा, मंगर थेन गुरुङ ग्योइदा उच्च ग्युइसेरदोना डोबा–अध्यापन ला डिछ्या लाबारि खाम्बा नुर नोन विधेयकस ह्रुप्बा मुला ।

सरकारी गेदोइला ग्योइला बो स्यान्दो ग्योइला ल्हेछ्या थेन ख्युरछ्या लाबारि गेताङ संचालन लाबा नुर विधेयकरि उल्लेख मुला । थेला लागि सामाजिक फेल्गेबा थेन कृषि समितिरि विधेकफिरि दफादार काठुइला ताङलिच्छा गण्की प्रदेश मुल बाप्सा मुबा ३० वटा आमाग्योइदा अनुसूची स्होसि ह्रुप्सेला मुला ।

विधेक पारित ताबा रे मिरे मंगर थेन गुरुङ समुदायला प्रतिनिधित्व लाबा लोन्पो थेन सांसद् जातीय गोइलोरि संसद् चिसाङरि बोकिन्बा मुबा । २०७८ ला ह्युलज्याबा आन्सार गण्डकी प्रदेशला ह्युलसंख्या २४ बुम ६६ तोङ्जा ४ ग्यार्जा २७ मुला । थे गुङ्ला ४ बुम ६४ तोङ्जा ३ ग्यार्जा १० (१८.८ प्रतिशत) मंगर थेन २ बुम ७२ तोङ्जा २ ग्यार्जा ७० (११ प्रतिशत) गुरुङ समुदायला मुला ।

(छिगला अर्थः गेदोइ– कामकाग, तेन्बा– मान्यता, मिरे– मंगलबार, डिछ्या– व्यवस्था, क्योङ्डिक्सि– सर्वसम्मत, चिसाङ– बैठक, ग्यालस्यो– राजपत्र, दोसिः– अनुवाद गरेर, गेदिम– कार्यालय, ग्युइसेर– शिक्षा, नुर– विषय, ल्हेछ्या– संबर्धन, ख्युरछ्या– संरक्षण, फेल्गेबा– विकास, गोइलो– भेषभुषा, बुम– लाख, तोङ्जा– हजार, ग्यार्जा– सय)