याम्बु ४ गोने । दारेम तामाङ ग्योइ नोन गुगलरि खासेला ताबा मुला । तामाङ ग्योइ गुगलरि खामाहेन्से तामाङ ग्योइला दोङरापरि चु ऐतिहासिक गे तासेला मुला ।

तामाङ ग्योइदा गुगलरि बाबा गेरि ग्रेनयोगदान लाबा मुला प्रा.डा. बालकृष्ण बल थेन ग्योइखेन्पो अमृत योन्जन तामाङसे । ह्रोनिला निस्वार्थ सेवासे तिनि चु असम्भव गे सम्भव ताखाम्बा हिन्ना ।

दिनिरे याम्बुरि तामाङ राष्ट्रिय पुस्तकालय (तारापु) थेन काठमाडौं विश्वविद्यालय (केयु) गुङरि गुगल सर्चला अंग्रेजी–नेपाली–तामाङ मिसिन दोबाः गेला लागि सम्झौतास्योरि हस्ताक्षर ताबा मुला ।

तारापुग्याम चोहो ओसेम ग्योइखेन्पो अमृत योन्जन तामाङ थेन केयु ग्याम्से आइटी विभागला ग्रेन्पो प्रा.डा. बालकृष्ण बलसे हस्ताक्षर लाबा हिन्ना ।

खाबा डिसेम्बर दोनारि गोर ङ्हा विधाला बुम गि तामाङ छिगसे गुगलरि वाङम्याङ्सेला मुला ओम दोबाः गे तिसेला मुला । 

दोबाः गेला लागि तिनिन तारापु थेन गोरङ्हा दोपा गुङरि नोन सम्झौता ताबा मुला ।

गुगलला तामाङ ग्योइ तामाङ डाजाङला मानकीकरणरि

गुगलरि खासेला तामाङ ग्योइ तामाङ डाजाङला मानकीकरण आन्सार तासेला मुला । चुला लागि दोबाः पक्रिया थेन मानकीकरण ज्योफिरि नोन समझदारीस्योरि हस्ताक्षर ताबा मुला ।

सम्झौतास्योरि तारापुग्याम चोहो ओसेम ग्योइखेन्पो अमृत योन्जन तामाङ, केयुग्याम प्रा.डा. बालकृष्ण बल थेन तामाङ डाजाङ गेन्दुनग्याम फूलकुमार बम्जनसे हस्ताक्षर लाबा मुला ।

चु गे जिन्माहेन्से गुगलग्याम तामाङ ग्योइ स्यानह्युल ग्योइ दोसेला मुला ओम तामाङ ग्योइ पाङ्बाजुगुसे ह्राङ्लान ग्योइग्याम नेपाली थेन अंग्रेजी ग्योइरि पहुँच दोना लाखाम्सेला मुला ।

चुह्राङ्बा ज्याबा गे लाबा बिसि गुगलरि तामाङ ग्योइला पहुँच दोना लाबारि गेरि मुबा टिमला मुतेबाम्हेदा ग्योइखेन्पो अमृत योन्जन तामाङसे थुजेछे फुल्बा मुला ।

(छिगला अर्थः दिनिरे– आईतबार, दोबाः– अनुवाद, स्यो– पत्र, ग्रेन्पो– प्रमुख, बुम– लाख, छिग– वाक्य, दोपा– अनुवादक,  ज्यो– शैली, स्यानह्युल– अन्तर्राष्ट्रिय, म्हे– जना)