पोखरा १७ गोने । नेपाल तामाङ घेदुङ जोङ समन्वय दाछोक कास्कीला तामाङ बहुउद्देश्यीय सांस्कृतिक दिमग्रेन ‘तामाङ दिम’ला गिक्छा तल्लाला ठोङ्सेन गेताङ ताजि । थे दिमग्रेन स्हेङ्बाला लागि नेपाल तामाङ घेदुङ संघीय स्यानचोहो दीपक वाईबा तामाङला विशेष पहल लाबा मुबा । ह्रोला पहलरि संघीय सांसद् माननीय मनबहादुर गुरुङसे नेपाल सरकार पर्यटन ओसेम सांस्कृतिक ब्लोन्खाङ ग्याम्से न्होरपा दिङ २०८१÷८२ ला विनियोजित बजेट ९० बुमरि पोखरा महानगरपालिकाला छ्यागेरि ताबा हिन्ना ।

गेताङ माननीय मनबहादुर गुरुङला डोनग्रेन्पोरि ताबा मुबा । गेताङरि डोनग्रोन्पो गुरुङसे तामाङला भौतिक संरचना तिबातेन दारे क्योङ तामाङ समुदायला समृद्धिला लागि न्होरपा, शैक्षिक, सामाजिक थेन सांस्कृतिक लिसे नोन ङ्हाच्छा वाङबारि जुरुरी मुबा ताम पाङ्जि ।

गेताङरि तामाङ बौद्ध दाछोकला चोहो विष्णु योन्जन, नेपाल तामाङ घेदुङ पोखरा महानगर दाछोकला गेचोहो अन्जना डुम्जन तामाङ, नेपाल तामाङ घेदुङ कास्कीला ङ्हाच्छाला चोहो कृष्ण तितुङसे ज्याबाम्हान्बा सेमताम थान्बा मुबा ।

चुह्राङ्नोन लासि घेदुङ गण्डकी प्रदेशला गाउराइ मनिष तामाङ, घेदुङ गण्डकी प्रदेशला स्यानचोहो जसपाल तामाङ, पोखरा १३ ला जनप्रतिनिधि सुचित तामाङ, घेदुङ संघीय स्यानचोहो दीपक वाईबा तामाङ थेन घेदुङ केन्द्रीय ङ्हाच्छाला गेचोहो कुमबहादुर तामाङसे ज्याबाम्हान्बा सेमताम थान्बा मुबा ।

गेताङ गेन्दुनला चोहो भक्तबहादुर तामाङला चोहोदानरि स्यानचोहो रितु थोकरसे डेन थेन गाउराइ मिनमाया डुम्जनसे संचालन लाबा मुबा ।

(छिगदोनः गोने– शनिबार, जोङ– जिल्ला, दाछोक– समिति, दिमग्रेन– भवन, स्यानचोहो– उपाध्यक्ष, बुम– लाख, डोनग्रेन्पो– प्रमुख अतिथि, ग्रोन्पो– प्रमुख, न्होरपा– आर्थिक, गेचोहो– कार्यवाहक अध्यक्ष, गेन्दुन– संस्था)