याम्बु १८ गोने । नेपाल आदिवासी जनजाति गेन्दुनछेन (नेफिन)से अगष्ट ९ दा बाङ्पिन्सिकेन सप्ताहनाङ ३१ छा जाम्बुलिङ आदिवासी दिङ्साङ दाङ्सेला ताबामुला । नेफिनसे चु दिङ ‘प्राकृतिक स्रोत, क्युइ, सा थेन ह्रिफिरि आदिवासी जनजातिला याङ्ताम सुनिश्चित लाउ, संयुक्त ह्युल्सा गेदुङला एजेन्सी गेन्दुन युएनड्रिप थेन आईएलओ १६९ सम्बन्धी सर्वोच्च अदालतला काठाक्बा कायो कार्यान्वयन लाउ’ बिबा मुल नाराला छ्याम ३१ छा जाम्बुलिङ आदिवासी दिङ्साङ दाङ्गे लाबा हिन्ना । थे दुइसाङरि नेफिनसे जातीय गोइलो थेन झाँकीला छ्याम तोङ्जा ङ्हाला ग्रेन र्‍याली तेसेला ताबा मुला । दिनिरे नेफिनसे स्योमि जोम्नाछेनला ङ्योइसाङ लासि अगष्ट ९ बिले गोने २४ गतेहेन्से गोने २८ गतेदोना सप्ताहनाङ गेताङ ङ्योइसाङ लासेला ग्रानाङ पिन्बा हिन्ना । जाम्बुलिङला आदिवासीकादेसे ङ्हाउ ३१ दिङहेन्से दाङ्सिकेन खाचिबा स्यानह्युल जाम्बुलिङ आदिवासी दिङ्साङ नेपालला आदिवासी जनजातिकादेसे नोन विशष काप्तोनला लिरि दाङ्सिकेन खाबा मुला ।

आदिवासी जनजातिकादेला जातीय, ग्योइ, सांस्कृतिक थेन धार्मिक ङोसेबादा स्थापित लाबा, आदिवासीकादेला माउलिक ग्युइ सीप थेन थेन्ना बाप्साला ख्युरछ्या ओसेम ल्हेछ्या लाबा, आदिवासीला सा थेन प्राकृतिक स्रोतफिला याङ्ताम सुनिश्चित लाबा थेन ह्युल्साला मुतेबा निकायरि समानुपातिक समावेशी सिद्धान्तला दानःरि अर्थपूर्ण थेन डेन मुबा बोकिन्बा मुद्दाजुगुदा ग्याल्साङ वा स्यानह्युल लिरि बहस पैरवी लाबा महत्वपुर्ण दुइसाङला लिरि चुदा दाङ्गे लाबा नेफिनला चोहो गेल्जे लामा शेर्पासे पाङ्जि ।

३१ छा आदिवासी दिङ्साङ नेपालरि आदिवासी जनजातिजुगुला काप्तोनला लिरि ङ्योइसाङ तासेला ताबासे नेपालला आदिवासी जनजातिजुगुला ङोसेबा म्राङ्बा सांस्कृतिक झाँकीकादे, स्याबाकादे, चाबाला परिकारकादेला उन्बा सुताइ तासेला नेफिनला ग्रेनगाउराइ दिवस राईसे पाङ्जि ।

नेफोन काप्तोनला लिरि मुख्य गेताङ गोने २४ गते ‘ग्याल्साङ जोम्बा दिम’रि स्हेङ्सेला मुला । मुल समारोहदा नेपाल सरकारला प्रवक्ता ओसेम यान्पाङ थेन ग्रा प्रविधि ब्लोन पृथ्वीसुब्बा गुरुङसे ठोङ्सेन लासेला मुला ।

काप्तोन आदिवासी जनजातिजुगुला आमाग्योइ थेन साभाकारि स्होबा व्हाइकादे, सांस्कृतिक झाँकीकादे, स्थानीय थेन रैथाने तोसोला आदिवासी जनजातीय ज्योस्हेङकृतिला छ्याम उन्बा, ल्होलो जातीय गोइलोला छ्याम राजधानीला गुङग्ला भृकुटीमण्डप हेन्से र्‍याली तिसि ल्होलो ग्लाकादे कोर्सि दोसि प्रदर्शनीमार्गला ग्लाल्साङ जोम्बा दिमदोना आदिवासी जनजातिकादेला खुला थेन भव्य प्रस्तुतीदा सडकनाङ होङ्ना लासेला मुला ।

नेफोनसे सांस्कृतिक झाँकीला छ्याम र्याली ११ ङ्ह्यामा भृकुटीमण्डपरि पोप्सि भद्रकाली, सुनधारा, वीर अस्पताल, रत्नपार्क, पुरानो बसपार्क तासि प्रदर्शनीमार्ग ग्याल्साङ जोम्बा दिमला सभाहलरि वाङ्सि मुल समारोहरि पोसेला तयारी लाबा मुला ।

मुल समारोहरि संवैधानिक निकायला ग्रेन्पोकादे, माननीय संसद्कादे, पार्टी प्रतिनिधिकादे, गेन्दुनछेनला ङ्हाच्छाला ग्रेन्पोकादे, ल्होलो आदिवासी जनजाति विशिष्ट म्हिखेन, जातीय गेन्दुन थेन सम्बन्धन संगठनला चोहोकादेतेन ल्होलो थुमला आदिवासी जनजाति गेदुङ गेन्दुनजुगुग्याम तोङ्जाछासे बोकिन्सेला नेफिनसे पाङ्बा मुला ।

बागमतीरि तामाङ थेन बाइ ग्योइ थेन गण्डकी प्रदेशला सरकारी गेदोइला ग्योइरि मगर थेन गुरुङ ग्योइदा तेन्बा पिन्बा मुला । 

जनजातिकादेला ज्योस्हेङ, रिमठिम, ङोसेबा, गोइलो, चाबाला परिकारला काप्तोन ताबासे तोङ्जा ङ्हा बिमा ल्हानासे बोकिन्सेला दाबी लासिकेन ङ्योइसाङ्पासे ग्लाल्साङ जोम्बा दिम माङ्ग्यार सुताइ गेताङ ङोन्छाङ प्रसारण लासेला तयारी लाबा मुला ।

नेफोनसे गोने १७ गते आदिवासी जनजाति खाःजा गेन्दुनछेनला जोम्नाछेन, २० गते जामेकोला गेन्दुनछेनला काठुइ गेताङ, २२ गते आदिवासी जनजाति उत्थान ग्याल्साङ प्रतिष्ठान, एफएओ थेन युनेस्कोला आदिवासीकादेला आमाग्योइ थेन चाबा सुरक्षा सम्बन्धी अभिमुखीकरण गेताङ थेन काप्तोन, २२ गतेन आदिवासी जनजाति आयोगसे आदिवासी जनजाति थेन एआइफिर कार्यशाला, २३ गते गुरुङ ग्याल्साङ परिषद्ला चियापान ओसेम ज्याबाम्हान्बा किन्बापिन्बा, २४ गते नेफिनला मुल समारोह, २५ गते नेपाल मगर गेदुङला अन्तरक्रिया, २५ गतेन छारिब्योन गेन्दुनछेनला फ्लाल्हाम्पा थेन अन्तरसम्वाद, २५ गतेन लोप्पोन गेन्दुनछेनला आदिवासीला लिउ थेन एआइ नुरला अन्तरक्रिया, २६गते आदिवासी जनजातिकादेला सवालरि संवाद गेताङ, २७ गते स्योमि गेन्दुनछेन (फोनिज)ला २६छा स्हेङ्खेन दिङ्साङ ओसेम फोनिज अवार्ड थेन २८ गते सुनुवार सेवा समाजला ज्योस्हेङ ग्योइकाइ पुरस्कार बोलाबा गेताङला ताङ तयार लाबा मुला ।  

(छिगदोनः जाम्बुलिङ– विश्व, दिङसाङ– दिवस, यान्पाङब्लोन– संचारमन्त्री, तोङ्जा– हजार, गेन्दुनछेन– महासंघ, दाङ्बा– मनाउनु, याङ्ताम– अधिकार, ह्युल्सा– राष्ट्र, गेदुन– संघ, गेन्दुन– संस्था, काठाक्बा– निर्देशन, कायो– आदेश, दुइसाङ– अवसर, दिनिरे– आईतबार, स्योमि– पत्रकार, जोम्नाछेन– सम्मेलन, ग्रानाङ– जानकारी, ङ्हाउ– विगत, ग्याल्साङ– राष्ट्रिय, स्यानह्युल– अन्तर्राष्ट्रिय, काप्तोन– उत्सव, ख्युरछ्या– संरक्षण, ल्हेछ्या– संबर्धन, दानः– आधार, ग्याल्साङ– राष्ट्रिय, यान्पाङ– संचार, ग्रा– सूचना, ब्लोन– मन्त्री, साभाका– लोकभाका, ज्योस्हेङकृति– कलाकृति, होङ्ना– गुन्जयमान, ग्रेन्पो– प्रमुख, म्हिखेन– व्यक्तित्व, गेदोइ– कामकाजी, तेन्बा– मान्यता, ज्योस्हेङ– कला, खाःजा– अपांग, छारिब्योन– युवा, फ्लाल्हाम्पा– पैदलयात्री, लिउ– भविष्य, नुर– विषय, ग्योइकाइ– साहित्य, ताङ– सूची)