संस्कृति घेदुङसे गोपाल योन्जनला केवा दिङसाङ दाङ्जि
याम्बु २३ गोने । ह्रोल्ज्याङ सम्राट गोपाल योन्जनला बोगाल ब्लिसे न्हिछा केवा दिङसाङ रेला दुइसाङरि नेपाल तामाङ संस्कृति घेदुङसे याम्बुरि गेताङ स्हेङ्जि ।
गोनेला छेपा २३ कुनु नेपाल तामाङ घेदुङला गेदिम चुच्चेपाटिरि बिशेष सांगितिक गेताङ स्हेङ्बा हिन्ना ।
गेताङरि गोपाल योन्जनसे ब्रिबा, ह्रोल्ज्याङ युबा थेन कोबा व्हाइकादेदा ल्होलो ल्होलो काइपा काइमोकादेसे ङोन्छाङ स्ह्रुगरि कोबा मुबा ।
नेपाल तामाङ संस्कृति घेदुङला संघीय चोहो छेवाङ तेन्जिङ लामाला चोहोदानरि ताबा गेताङदा ग्रेनडोन्बो वरिष्ठ जनवादी काइपा ओसेम प्राज्ञ मानबहादुर दोङसे छ्योइमे म्रासि ठोङ्स्हेङ लामुबा ।
गेताङरि व्हाइ कोबालाछ्याम डोन्बोकादेसे व्हाइ ह्रोल्ज्याङ थुमरि गोपाल योन्जनसे पिन्बा योगदान थेन थेला व्यक्तित्वला थुमरि सेमताम थान्बा मुबा । व्हाइ ह्रोल्ज्याङरि २०४६ दिङहेन्छे योगदान पिन्बा वरिष्ठ काइपा अम्बरबहादुर नेपालीदा सांगीतिक डेन–२०८२ ग्याम डेन लाबा मुबा ।
तामाङ चलचित्र काठाक्पा गेदुङला चोेहो के.बि. घिसिङ, तामाङ कलाकार गेदुङला ग्रोइपा काइपा विश्व दोङ, क्रियसन नेपालला चोहो रबि लामा, तामाङ चलचित्र गेदुङला केन्द्रिय चोहो बिनायक दोङ, बागमती प्रदेश चोहो दावाफिन्जो तामाङ, तामाङ स्योमि गेदुङला वरिष्ठ स्यानचोहो तिर्थमान बल, गोले तामाङ बंश उत्थान समाजला चोहो मीन गोेले, नेपाल तामाङ घेदुङला स्यानचोहो सीता गोले, मानबहादुर तामाङ, स्यानगाउराइ सरोज मोहोन लामातेन स्यान्दो डोन्बोकादेसे गेताङरि बो किन्बा मुबा ।
गेताङरि नेपाल तामाङ संस्कतिृ घेदुङला ङ्हाच्छाला चोहो दोर्जे गोलेला नोन सोम्छा डान्बा दिङसाङ ताबासे थेसे लाबा योगदानला चर्चा लाबा मुबा ।
(छिगदोनः ह्रोल्ज्याङ– संगीत, स्ह्युग– रुप, गेदुङ– संघ, स्योमि– पत्रकार, स्यानचोहो– उपाध्यक्ष)
तपाईको प्रतिक्रिया दिनुहोस