हेटौंडा १ यान्दे । नेपाल तामाङ स्योमि गेदुङ, बागमति प्रदेशसे तामाङ डाजाङ स्योस्यो थेन अनलाईनला तेःबा अर्जुनबहादुर तामाङदा पुरस्कृत थेन डेन लाबा मुला । स्योमि गेदुङ, बागमतीसे ३१ छा तामाङ प्रशारण दिङसाङला दुइसाङरि ‘अन्तरक्रिया ओसेम पुरस्कार बोलाबा समारोह’ स्हेङ्सि चु पुरस्कार पिन्बा हिन्ना ।

गेताङ नेपाल तामाङ स्योमि गेदुङ, बागमती प्रदेश थेन मकवानपुर जोङ दाछोकला संयुक्त आयोजना ओसेम रिमठिम थेन पर्यटन ब्लोन्खाङ बागमती प्रदेशला न्होरपा ह्रोरि ताबा मुबा ।

बागमती प्रदेशला मुख्यब्लोन ईन्द्रबहादुर बानियाँला डोन्बोग्रेन्पोरि ताबा गेताङरि तामाङ स्योमि गेदुङ, बागमती प्रदेशसे स्हेङ्बा ‘आईतेसिं–बुद्धिमाया रुम्बा डान्बा तामाङ स्योनाम’ थेन मकवानपुर जोङ शाखासे स्हेङ्बा ‘तामाङ स्योनाम पुरस्कार’ बोलाबा मुबा ।

प्रदेश पुरस्कार तामाङ ग्योइरि २३ दिङहेन्से निरन्तर तेसिखाबा तामाङ डाजाङला तेःबा अर्जुनबहादुर तामाङदा नगद १० तोङ्जा १ ग्यार्जा रुपैयाँला छ्याम दोसल्ला थेन डेनस्यो पिन्बा मुबा । जोङ पुरस्का हेटौंडा सन्देश डटकमला स्योमि भुवन घलानदा ५ तोङ्जा रुपैयाँला छ्याम डेनस्यो पिन्बा मुबा । ‘आईतेसिं–बुद्धिमाया रुम्बा डान्बा तामाङ स्योनाम’ कोस स्योमि ओसेम ब्रिखेन राजेश रुम्बा लामासे ह्राङ्ला आपाआमाला डान्बारि स्हेङ्बा हिन्ना ।

छार कोसला लागि मुख्यब्लोनसे लाजि बुम ङ्ही न्होर ह्रो

मुख्यब्लोन ईन्द्रबहादुर बानियाँसे तामाङ स्योमि गेदुङ, बागमती प्रदेश दाछोकदा अक्षयकोस स्हेङ्बाला लागि व्यक्तिगत स्ह्रुगरि २ बुम रुपैयाँ ह्रोलाबा मुला । गेताङ्लान गुङरि मुख्यब्लोन बानियाँसे २ बुमला चेम स्योमि गेदुङला प्रदेशचोहो ज्ञानेन्द्र तामाङदा पिन्बा मुबा । मुख्यब्लोन बानियाँसे चु रकम ‘आपा छेमबहादुर बानियाँ थेन ज्योज्यो राजकुमार बानियाँ’ला डान्बारि अक्षयकोस स्हेङ्बाला लागि पिन्बा हिन्ना ।

गेताङरि लोकतान्त्रिक गणतन्त्ररि आमाग्योइ ख्युरछ्या लाबा प्रदेश सरकारला दायित्व हिन्ना बिबान मुख्यब्लोन बानियाँसे तामाङ ग्योइ, रिमठिम थेन परम्पराला ख्युरछ्यारि प्रदेश सरकार प्रतिबद्ध मुबा पाङ्जि ।

गेताङरि ‘सरकारी गेदोइ ग्योइला स्ह्रुगरि तामाङ ग्योइला प्रभावकारी कार्यान्वयनरि यान्पाङस्हेग्याम ओसेम सरोकारवालाला भुमिका’ नुररि अन्तरक्रिया सुताइ लाबा मुबा ।

गेताङरि रिमठिम ओसेम पर्यटन ब्लोनखाङला गाउराइ दिपेन्द्र सुवेदी, कैलाश गाउँपालिकाला चोहो लोकबहादुर मोक्तान, वरिष्ठ स्योमि प्रताप विष्ट, नेपाल स्योमि गेन्दुनछेन, बागमती प्रदेशचोहो कृष्ण सारु मगर थेन नेपाल तामाङ घेदुङला संघीय ह्रोमि मेम्बर लो तामाङ ग्रेन्पो वक्ताला स्ह्रुगरि मुबा ।

थेन्से ‘सरकारी गेदोइला ग्योइ सम्बन्धी पेठिम २०८०’ प्रभावकारी कार्यान्वयनला लागि स्थानीय तह जिम्मेवार तातोबा धारणा थान्जि ।

नेपाल तामाङ घेदुङला केन्द्रीय ह्रोमि मेम्बर लो तामाङसे आमाग्योइ जेक्खे औपचारिक प्रयोगरि सीमित आताना रेदाङसे लागु लातोबारि बाङ पिन्बान समुदायन्हाङरिन तामाङ ग्योइ पाङ्बाजुगु च्याङ्सिकेन निबा बिसि चिन्ता व्यक्त लाजि ।

कैलाश गाउँपालिकाला चोहो लोकबहादुर मोक्तानसे स्थानीय सरकारजुगु भौतिक फेल्गेबारि जेक्खे केन्द्रित तामा ग्योइ पेठिम कार्यान्वयनरि च्याङ्ना ताबा स्वीकार लासिकेन खाबा रेरि प्रदेश ओसेम स्थानीय तहगुङ समन्वयरि गेलाबारि तयार मुबा पाङ्जि ।

वरिष्ठ स्योमि प्रताप विष्टसे पेठिम कार्यान्वयनरि तामाङ घेदुङसे तोतेबा पहल आलाबा टिप्पणी लासि ग्योइ कोङ्साम जेक्खे ग्याल्सा कोङ्सेला धारणा थान्जि ।

ब्लोनखाङला गाउराइ दिपेन्द्र सुवेदीसे ब्लोनखाङग्याम्से ग्योइ पेठिम कार्यान्वयनरि गे तीब्र स्युगरि ताचिबा ग्रादाङ पिन्बान नियमावली तयार ताबा पाङ्जि । थेसे नेपाल तामाङ घेदुङ थेन नेवादयः दबूला छ्यागेरि सरकारी गेदिमला कर्मचारीला लागि ग्योइ प्रशिक्षण प्याकेज स्होबा सुताइ पाङ्जि ।

स्योमि गेदुङ, बागमती प्रदेशलाचोहो ज्ञानेन्द्र तामाङला चोहोदानरि ताबा चु गेताङरि ह्युलठिमजोम्ना ह्रोमि गोविन्दराम चेपाङ, जोङ समन्वय दाछोक, मकवानपुरला ग्रेन्पो ललितबहादुर घलान, तामाङ स्योमि गेदुङला संघीय गाउराइ आदर्श थोकर, नेपाल स्योमि गेन्दुनछेन, मकवानपुरला चोहो बालकृष्ण अधिकारी, नेपाल तामाङ घेदुङला जोङ चोहो कालु घलानतेन स्यान्दोकादेसे सेमताम थान्बा मुबा ।

(छिगदोनः डेन– सम्मान, यान्दे– भदौ, स्योमि– पत्रकार, गेदुङ– संस्था, रिमठिम– संस्कृति, ब्लोन्खाङ– मन्त्रालय, न्होरपा– आर्थिक, डोन्बोग्रेन्पो– प्रमुखआतिथ्य, स्योनाम– पत्रकार, तोङ्जा– हजार, बुम– लाख, दाछोक– समिति, स्ह्रुग– रुप, ख्युरछ्या– संरक्षण, गेदोइ– कामकाजी, यान्पाङस्हेग्याम– संचारमाध्यम, गेन्दुनछेन– महासंघ, ह्रोमि– सदस्य, ग्याल्सा– राष्ट्र, स्युग– गति, ग्रादाङ– जानकारी, छ्यागे– सहकार्य)