याम्बु ३ यान्दे । तामाङ सोसाइटी अफ न्यु साउथ वेल्स सिड्नीसे गिक्छा तामाङ ग्युइ ङोसेबा रे दाङ्बा मुला । अगस्ट १७ कुनु पारामाटा सिटिरि च्युइकुसे सोम्छा ङोसेबा रेला दुइसाङरि नेपाल ग्याम ल्होलो थुमला डोन्बोकादे ङ्योइसि भर्चुअल स्हेग्याम ग्याम तामाङ ग्युइ थेन ङोसेबाथोरि काठुइ लाबा हिन्ना । सामाजिक थेन राजनीतिक विश्लेषक विश्वभक्त दुलाल ‘आहुती’, मानवशास्त्री डा. मुक्तसिं लामा, ग्योइखेन्पो अमृत योन्जन तामाङ थेन ललितकला प्रज्ञा प्रतिष्ठानला उपकुलपति लालकाजी तामाङसे ह्राङह्राङला थुमला ल्हेङ्बो थान्बा मुबा ।

आहुतिसे तामाङ ह्युल्बाला ङोसेबा, दोङरापला ल्होलो दुइरि नातोबा दुल्बा थेन ङ्हाप्बा छ्यामरि तामाङ ह्युल्बाला कुङ्बा तिलोकादेदा ह्राङ्ला ल्हेङ्बोरि थान्बा मुबा । ओराङनोन लासि नेपालग्याम भर्चुअल स्ह्रुगरि बो किन्बान मानवशास्त्री डा. मुक्तसिं तामाङसे तामाङ ह्युल्बाला धार्मिक, सांस्कृतिक थेन ङोसेबाथोरि गेस्यो थान्बा मुबा । अस्टे«लियान दोबा ललितकला प्रज्ञा प्रतिष्ठानला उपकुलपति लालकाजी तामाङसे ललितकलाला महत्व थेन तामाङ ह्युल्बाथुमरि ल्हेङबो थान्बा मुबा ।

नेपालग्यामसेन भर्चुअल स्ह्रुगरि ग्योइखेन्पो अमृत योन्जन तामाङसे निबा बोगाल ङि दिङरि तामाङ ग्योइला थुमरि ताबा गे थेन याङ्बा उपलब्धि थुमरि गेस्यो थान्बा मुबा ।  

गेताङरि ङ्हाच्छाला एनआरएनएला चोहो सुरेन्द्र सिग्देल, नेपाल लोकतान्त्रिक फोरमला ङ्हाच्छाला चोहो छिरिङ तेन्जी लामा, निम्फाला चोहो लक्ष्मण गुरुङछ्यामसे ल्हेङ्बो थान्बा मुबा ।

तामाङ सोसाइटी अफ न्यु साउथ वेल्स सिड्नीला ङ्हाच्छाला चोहो थेन ग्रोइपा अरुण तामाङसे गेताङ ल्हानान ज्याबा ताबा पाङ्सिमाम बेनानदा थुजेछे फुल्बा मुबा । गेताङ चोहो राज पाख्रिनला चोहोदानरि ताबा मुबा बिसाम स्यानचोहो सिर्जना गोलेसे संचालन लाबा मुबा ।