नेपाल तामाङ लोप्पोन गेदुङसे २०८१ ला एसईईरि ४ जीपीए बाबा लोप्पोनदा डेन लाजि
याम्बु ४ गोने । नेपाल तामाङ लोप्पोन गेदुङ संघीय गेदाछोक थेन नेपाल ल क्याम्पस दाछोकला संयुक्त आयोजनारि २०८१ दिङला एसईई परीक्षारि ४ जीपीए बासि पास ताबा २३ म्हे तामाङ लोप्पोनजुगुदा डेन लाबा मुला । गेताङ मिस तामाङ समाज, नेपालला छ्यागेरि ताबा मुबा ।
गेताङ माननीय सांसद ओसेम ङ्हान्छाला ब्लोन हितबहादुर तामाङला ग्रेनडोन्बोरि नेपाल ल क्याम्पस, याम्बुरि ताबा मुबा ।
गेताङरि लोप्पोनजुगुदा डेन लाबाला छ्याम तामाङ ङोसेबा दिङ्साङला दुइसाङरि ज्याबाम्हाम्बा किन्बापिन्बा लाबा मुबा ।
‘सोना लाबारि तामाङ ङोसेबा, तिनिला आन्दोलन ग्युइसेररि प्रोत्साहन’ बिबा क्राछिगरि ताबा गेताङरि वक्ताजुगुसे तामाङला याङ्तामला लागि दारे क्लाङ्तोबा भुमिकाफिरि ह्राङ्ह्राङ्ला सेमताम थान्बा मुबा । गेताङरि तामाङला छारपुस्तासे ग्युइसेरफिरि लातोबा हस्तक्षेप थोरि नोन काठुइ ताबा मुबा ।
गेताङरि डोन्बोछेनजुगुरि ङ्हाच्छाला ग्याल्साङब्लोन दिलमान पाख्रिन, ङ्हाच्छाला सांसद नविना लामा थेन स्यानह्युल तामाङ सेङ्जाङला ग्रेनगाउराइ टासि लामा मुबा ।
चुह्राङ्नोन लासि गेताङरि स्यान डोन्बोजुगु नेपाल तामाङ घेदुङ संघीय दाछोकला ग्रोइपा अधिवक्त कुन्साङ योन्जन, घेदुङ, संघीय छ्याचोहो, वरिष्ठ स्यानचोहो, ग्रेनगाउराइ, स्यानगाउराइजुगु, गाउराइजुगु, विभागीय ग्रेन्पोजुगु, भातृगेन्दुनला चोहोजुगु, जोङ इन्चार्ज थेन जोङ चोहोजुगु मुबा ।
गेताङ नेपाल ल क्याम्पस लोप्पोन गेदुङला चोहो सफलता थिङ तामाङला चोहोदानरि ताबा मुबा ।
(छिगदोनः गेदाछोक– कार्यसमिति, दाछोक– समिति, डेन– सम्मान, म्हे– जना, ब्लोन– मन्त्री, डोन्बोछेन– विशिष्ट अतिथि, ग्याल्साङब्लोन– राज्यमन्त्री, ग्याल्साङब्लोन– राज्यमन्त्री, सेङ्जाङ– परिषद, ग्रोइपा– सल्लाहकार, छ्याचोहो– सह–अध्यक्ष, स्यानचोहो– उपाध्यक्ष, ग्रेन्पो– प्रमुख, गेन्दुन– संस्था, ङोसेबा– पहिचान, ग्युइसेर– शिक्षा, याङ्ताम– अधिकार, सेमताम– मन्तव्य, काठुइ– छलफल)
तपाईको प्रतिक्रिया दिनुहोस