पोखरा १४ यान्दे । नेपाल तामाङ घेदुङ तामाङ बौद्द साप्तो दाछोकला ३८ छा दिङ्साङला साधारण  जोम्ना तिनि स्योल्बा मुला । गेताङ गण्डकी प्रदेश सभासद माननीय पार्वती तामाङला ग्रेनडोन्बोरि ताबा मुबा । गेताङरि ग्रेनडोन्बो तामाङसे तामाङ समुदायला उत्थान थेन समृद्धिला लागि राजनीतिक चेतना तोला बिसि पाङ्जि । थेसे तामाङ समुदायला भौतिक फेल्गेबाला लागि तोबा ह्रोलाबारि सातान ह्राङ तयार मुबा सेमताम थान्बा मुबा ।

गेताङरि गेन्दुनला न्होरचोहो हर्कसुब्बा नेगी थेन गाउराइ शान्ति लोप्चनसे थान्बा गेन्दुनला न्होरपा दिङ २०८१÷८२ ला न्होरपा प्रतिवेदन थेन दिङ्साङला गे प्रगति विवरण जोम्नासे क्योङ्डिक्सि अनुमोदन लाबा मुबा ।

गेताङरि बौद्ध साप्तो दाछोकला चोहो विष्णु योन्जनसे लिउला गे योजना नोन प्रस्तुत लाबा मुबा ।

गेताङरि खोटाङ जोङ स्थायी दिम तासि दाते पोखरा चिबा धनबहादुर योन्जन तामाङदा गेन्दुनरि छार ह्रोमि पिन्बा मुबा ।

थे दुइसाङरि याङ्ला तामाङ समाज मादी गाउँपालिकाला ङ्हाच्छाला चोहो सिंहमान लोप्चनसे ब्रिबा तामाङ समुदायला परम्परा, रिमठिम सम्बन्धी पुस्तक गेन्दुनला कुरिमुबा कोकोम्हेन्दो पुस्तकालयला थुछापा दिपक वाईबादा पिन्बा मुबा ।

गेताङरि तामाङ बौद्ध साप्तो आमा दाछोकला चोहो सीता साम्देन, ङग्युर छ्योर्खोलिङ गुम्बा दाछोकला थुछापा सुनमाया नेगी तामाङ, तामाङ बौद्ध साप्तो दाछोकला ङ्हाच्छाला चोहो बुद्दिबहादुर रुम्बा तामाङ, नेपाल तामाङ घेदुङ पोखरा महानगर दाछोकला कार्यवाहक चोहो अन्जना डुम्जन तामाङ, नेपाल तामाङ जोङ समन्वय दाछोकला ह्रोमि केशबहादुर थिङ तामाङ, नेपाल तामाङ घेदुङ कास्कीला ङ्हाच्छाला कार्यवाहक चोहो रामप्रसाद साम्देन, बुद्दजयन्ती मूल काप्तोन दाछोक कास्कीला चोहो टेकबहादुर स्याङ्बो, नेपाल तामाङ घेदुङ संघीय स्यानचोहो दिपक वाइबा तामाङ थेन नेपाल तामाङ घेदुङ केन्द्रीय ङ्हाच्छा कार्यवाहक चोहो कुमबहादुर तामाङसे ज्याबाम्हान्बा सेमताम थान्बा मुबा ।

गेन्दुनला चोहो विष्णु योन्जन तामाङला चोहोदानरि ताबा गेताङरि स्यानचोहो बोसबहादुर पाख्रिन तामाङसे डेन सेमताम थान्बा मुबा ।

गेन्दुनला गाउराइ शान्ति लोप्चनसे संचालन लाबा गेताङरि कलाकारजुगु लक्ष्मी थिङ, पुष्पा तामाङ, लक्ष्मी तामाङ थेन प्रेमकुमारी तामाङसे स्याबा उन्बा मुबा ।

(छिगदोनः साप्तो– सेवा, दाछोक– समिति, दिङ्साङ– बार्षिक, जोम्ना– सभा, स्योल्बा– सम्पन्न, फेल्गेबा– विकास, गेन्दुन– संस्था, न्होर– आर्थिक, क्योङडिक्सि– सर्वसम्मत, ह्रोमि– सदस्य, थुछापा– संयोजक, काप्तोन– समारोह, ज्याबाम्हान्बा– शुभकामना, स्यानचोहो– उपाध्यक्ष, गेन्दुन– संस्था)