नुवाकोट ८ तापाग्रेन । बागमती प्रदेश सरकारसे ककनीरि स्हेङ्बा भ्यू टावर थेन बहुउद्देश्यीय गेताङ हल ककनी गाउँपालिकादा पिन्बा मुला । बागमती प्रदेशला रिमठिम ओसेम पर्यटन ब्लोनखाङग्याम विनियोजित ५ करोड ८८ बुम रुपैयाँला लागतरि स्हेङ्बा चु संरचना दिनिरे गेताङ स्हेङ्सि पालिकादा पिन्बा हिन्ना ।

बागमती प्रदेशला रिमठिम ओसेम पर्यटन ब्लोन सुरेश श्रेष्ठसे छार स्हेङ्बा भ्यू टावर थेन हल ककनी गाउँपालिका स्यानचोहो मिट्ठुमाया लामादा औपचारिक स्ह्रुगरि पिन्बा हिन्ना ।

गेताङरि ब्लोन श्रेष्ठसे पर्यटनदा ह्युलला न्होरकि उन्नतिला स्थायी दानःला स्ह्रुगरि फेल्ना लाबा दोन्ता आन्सार ककनीदा बागमती प्रदेशलान महत्वपूर्ण पर्यटकीय दोखाङ स्होबा योजना मुबा पाङ्जि । थेसे प्रदेशरि ल्हाना होटल–रेस्टुरेन्ट साप्तो सञ्चालनरि मुबासे थ्री–स्टारदोनाला होटल प्रदेशरि दर्ता तासि थेलिच्छा संघीय सरकाररि पिन्बा डिछ्या मुबा उल्लेख लाबान दर्ता प्रक्रियारि आखाबा होटलजुगुसे योनान दर्ता लातोबा उन्जि ।

गेताङरि बागमती प्रदेशजोम्बा ह्रोमि रमेशकुमार महतसे स्थानीय मौलिकता सोना लाबारि पर्यटन फेल्गेबाला दानः ताबा पाङ्बान ककनीला रिमठिम, परम्परा थेन मौलिक चाबास्हेदा ख्युरछ्या ओसेम ल्हेछ्या लाखाम्साम पर्यटन थेन स्थानीय न्होरतन्त्र ङ्हि नोन कोङ्सेला धारणा थान्जि । थेसे स्हेङ्जिन्बा संरचना ओसेम भवनजुगुला ख्युरछ्या अनिवार्य मुबा उल्लेख लाबान नुवाकोटला मुतेबा फेल्गेबाला लागि तोबा ह्रो लाबारि सातान तयार मुबा प्रतिबद्धता उन्पाङ्जि ।

(छिगकि दोनः स्हेङ्बा– निर्माण, तापाग्रेन– मंसिर, ब्लोन– मन्त्री, ब्लोनखाङ– मन्त्रालय, बुम– लाख, स्ह्रग– रुप, न्होरकि– आर्थिक, दानः– आधार, फेल्ना लाबा– विकसित, दोन्ता– उद्देश्य, दोखाङ– गन्तव्य, डिछ्या– व्यवस्था, जोम्बा– सभा, ह्रोमि– सदस्य, ख्युरछ्या– संरक्षण, ल्हेछ्या– संबर्धन, फेल्गेबा– विकास)