याम्बु । तामाङ चलचित्र काठाक्पा/स्हेङ्खेन सन्तलाल घिसिङ दारेम डान्बारि जेक्खेन ताबा मुला । दर्जन ङिदे चलचित्र काठाक्बा थेन स्हेङ्बा गेलाबा घिसिङ तापाग्रेन २७ गते कामरे कुनु ह्राङ्लान दिम चितवनरि डोङ्बा हिन्ना ।

बि.सं. २०३५ दिङ बेल्बो १७ कुनु आपा श्यामबहादुर घिसिङ थेन आमा डोलकुमारी तामाङला कुग्याम चितवनला भरतपुर महानगरपालिका –२४ केरुङ नाम्सारि केबा घिसिङ उर नोइला ङ्यान्दि ४७ दिङरि डोङ्बा हिन्ना । ह्राङ्ला दिमरि बु निबा दिमथेमेसे ग्रादाङ पिन्बा मुला ।

जयनन्द लामाला काठाक्बारि स्होबा गिक्छा तामाङ चलचित्र ‘सेमरि छोरङान’ लिच्छा थेसे तामाङ चलचित्रदा तोर थिबा गे लाबा मुबा । थेसे ‘आक्ताङ राउ’ काठाक्सि तामाङ चलचित्ररि ल्हाम तिबा मुबा । ‘आक्ताङ राउ’ लिच्छा ‘मायाला छो, दुङाल, च्याङ्बा, लानि, खसु’ छ्यामला दर्जन ङिदे ‘तामाङ चलचित्रकादे काठाक्बा मुबा । थेसे चलचित्रला राप थेन ह्वाइ नोन ब्रिबा मुला । थेसे ब्रिबा तामाङ चलचित्रला ह्वाइकादे ल्हानान तामाङ ह्युल्बाला सुङरि च्योबा मुला । ‘जल माया...जलमाया, ए ङाला सुनमाया’ छ्यामला काइला ह्वाइ आउदिन ब्रोइखाबा ह्वाइला स्ह्रुगरि किन्बा मुला ।

‘जलमायाला’ व्हाइरि काइयुबा काइस्हेङ्खेन कुवेरसिंह दोङसे सन्तालाला चलचित्रला राप थेन ह्वाइ ब्रिबा गेला तोच्चा प्रसंशा लाबा मुला । २०६० दिङ चोसोला ल्हामरि छ्याम डिक्सि ल्हानान गे लाबा दोङसे घिसिङ डोङ्मा तामाङ चलचित्र थेन ह्वाइ थुमदा ल्हानान क्षति ताबा पाङ्जि । ‘जलमाया, सुनमाया’ छ्यामला चलचित्ररि घिसिङसे ब्रिबा ह्वाइरि दोङसे ह्रोल्ज्याङ युबा मुला । चिलचित्ररि तामाङ जनजीवन, ग्योइकाइला स्हेग्याम घिसिङसे तामाङ रिमठिम थेन ग्योइ सोना लाबारि क्लाङ्बा ग्रेन भुमिकादा बेनानसे डान्तोबा दोङला सेमताम मुला । ह्राङ्से तिलाइ ङ्हाच्छा ह्रुपतामा चलचित्र, ह्वाइला थुमरि गे काप्बा योजना थेना लाबा घिसिङला गेकादे अधुरोन तामा आज्याना छोर्बा दोङसे पाङ्जि ।  

स्योनामग्याम चलचित्रला थुमरि वाङ्बा घिसिङ तामाङ चलचित्र गेदुङला स्हेङ्खेन चोहो नोन हिन्ना । थेसे २०६५ दिङ ड्वाफ्रे २७ गते गेदुङ दर्ता लाबा मुबा । तामाङ चलचित्रदा गुणत्मकता पिन्बिारि थेन तामाङ चलचित्रकर्मीकादे संगठित लासि बोर्बा दोन्तासे गेन्दुन ठोङ्बा घिसिङदा बेनानसे डान्सिन चितोबा तामाङ चलचित्र काठाक्पा गेदुङला ग्रेनगाउराइ विनय दोङला ताम मुला । तामाङ चलचित्र थुमदा तोर थिबा योजनाकादे थोबा घिसिङला गेकादे गाङ्साल नोन चिजि । थेला आथुम्बा म्हाङ थुम्ना लाबा थेन डेनरि तिगाइ गे लासेला ग्रेनगाउराइ दोङसे प्रतिवद्धता लाजि ।

घिसिङला डोङ्बारि तामाङ चलचित्र गेदुङ थेन तामाङ चलचित्र काठाक्पा गेदुङसे दुङाल प्रसाल्बा मुला ।