याम्बु । नेपाल तामाङ घेदुङला च्युइछा छेजोम खाबा बेने लारि याम्बुरि लासेला ग्रा पिन्बा मुला । घेदुङला कामरेकुनु याम्बुरि चिबा कुछा संघीय दाछोकला चिसाङसे बेने २२ हेन्से २४ गते दोना छेजोम लाबा आप्ता लाबा ग्रेनगाउराइ जगतमान दोङसे ग्रादाङ पिन्बा मुला ।

चिसाङसे घेदुङ संघीय दाछोकदा छेजोम आयोजक दाछोकरि पोसि छेजोम स्योल्ना लाबारि ल्होलोल्होलो स्यानदाछोकजुगु स्होबा मुला । निबा दुगुरि चिबा चिसाङसे बेनेरि छेजोम लाबा आप्ता लाबासे थेनोन मितिदा दातेला चिसाङसे पारित लाबा ग्रेनगाउराइ दोङसे पाङ्जि । ह्युलरि ताइ लाबा गोछापाजोम्नाला चुनाव बेने २१ कुनुन ताबा हिन्साम जोम्ना खाबा दुगुरि ल्हेसेला आप्ता लाबा मुला ।  थेला लागि सचिवालयदा याङ्ताम पिन्बा मुला । बेनेलासंसद चुनाव लिच्छा ल्हेजि बिसाम घेदुङसे बिबा मितिरिन छेजोम लासेला मुला । चिसाङसे घेदुङला विधान डिक्लाबारि ग्रेनगाउराइ दोङला थुछापारि विधान डिक्लाबा दाछोक स्होबा मुला । न्होर डिछ्याना, गोछापा डिछ्याना, तेबाः, प्रचारप्रसार, डाजाङ डिछ्याना छ्यामला स्यानदाछोककादे स्होबा मुला ।

चिसाङरि जेन्जी ङ्योलोकलिच्छा फेल्गेबा ग्यालठिपा नाछाल थोरि समिक्षा लाबा मुबा । चिसाङसे ङ्योलोकरि ल्हुइ च्योल्बाकादेथोरि दुङाल प्रासाल्सि ह्युलठिम, संघीय लोकतान्त्रिक गणतन्त्र, धर्मनिरपेक्षा, समानुपातिक समावेशी डिछ्यादा सोना लाबारि खबरदारी लाबा आप्ता लाबा मुला । चिसाङरि छार फेल्गेजिन्बा ग्यालठिपा, छार खाबा दल थेन खेबाः दलकादे थोरि नोन काठुइ ताबा मुबा । चुनावरि तामाङला गोछापाकि सुनिश्चित लाबारि ध्यानकर्षण लाबा थेन चुनावरि रेबा तामाङकादे डाना लाबा भुमिका क्लाङ्बा चिसाङसे आप्ता लाबा मुला । नेपाल तामाङ घेदुङला कुछा छेजोम २०७८ बेने २९, ३० थेन नाम्दुङ १ कुनु याम्बुरिन ताबा मुबा ।  

(छिगकि दोनः बेने– फागुन, छेजोम– अधिवेशन, ग्रादाङ– जानकारी, दाछोक– समिति, आप्ता– निर्णय, ग्रा– सूचना, स्योल्ना– सम्पन्न, गोछापाजोम्न– प्रतिनिधिसभा, थुछापा– संयोजक, डिछ्याना– व्यवस्थापन, ङ्योलोक– आन्दोलन, फेल्गेबा– विकास, नाछाल– अवस्था, ग्यालठिपा– राजनीतिक, डिछ्या– व्यवस्था, फेल्गेजिन्बा– विकसित, खेबाः– पुरानो)